ރ. މާކުރަތު ކައުންސިލް އިދާރާއާއި، ޞިއްޙީ މަރުކަޒާއި އަދި ކޯޓު ޢިމާރާތް ހަލާކުކޮށް ވަދެ އެތަންތަނުގެ ތިޖޫރި ފަޅާލައިފިއެވެ.
ފުލުހުން ވިދާޅުވީ މިމައްސަލަ ފުލުހުންނަށް ރިޕޯޓު ކޮށްފައިވަނީ މިއަދު ހަވީރު 6:19 ގައި ކަމަށެވެ.
ފުލުހުން ވިދާޅުވީ އެރަށު ޞިއްޙީ މަރުކަޒުގެ ތިޖޫރި ވަނީ މަގަށް ގެންގޮސްފައި ކަމަށެވެ. އޭގެ އިތުރަށް އެތަނުގެ އޮފީސްތެރޭގައި ހުރި ގިނަ ޢަދަދެއްގެ ފައިސާ ވެސް ގެންގޮސްފައިވާ ކަމަށް ވިދާޅުވިއެވެ.
ކައުންސިލް އިދާރާގައި ހުރި ތިޖޫރި ފަޅާލުމަށްފަހު އެއިން ގިނަ ޢަދަދެއްގައި ފައިސާ ވަގަށް ނަގައިފައިވާ ކަމަށް ވެސް ފުލުހުން ވިދާޅުވިއެވެ .އޭގެ އިތުރަށް ކޯޓުގެ ތިޖޫރި ވެސް ވަނީ ފަޅާލައިފައެވެ. އެހެންނަމަވެސް އޭގައި ފައިސާއެއް ނުހުންނާނެ ކަމަށް މަޢުލޫމާތު ލިބިފައިވާ ކަމަށް ފުލުހުން ވިދާޅުވިއެވެ. އެކަމަކު އެތަނުގެ އޮފީސްތެރޭގައި ބަހައްޓާފައިހުރި ފައިސާތަކެއް ވަނީ ވަގަށް ގެންގޮސްފައެވެ.
މި ޙާދިސާތައް ހިންގާފައިވާ ގަޑިއެއް އެނގިފައެއް ނުވެއެވެ. މިއީ އެއްބަޔަކު އެއްވަގުތެއްގައި ރާވައިގެން ކުރިކަމެއް ކަމެއް އަދި އެކިފަހަރުމަތިން ކުރިކަމެއް ކަމެއްވެސް އެނގިފައެއް ނުވެއެވެ.
އެ ތަންތަނުން ނަގާފައިވަނީ ކިހާ ޢަދަދެއްގެ ފައިސާއެއް ކަމެއް ވެސް ފުލުހުން އަދި ހާމައެއް ނުކުރައްވައެވެ.
ފުލުހުން ވިދާޅުވީ މިމައްސަލަ ބަލަމުންދާ ކަމަށާއި މިހާތަނަށް މިކަމާ ގުޅިގެން އެއްވެސް މީހަކު ބަންދުކޮށްފައި ނުވާ ކަމަށެވެ.
