ރާއްޖޭގައި އެންމެފަހުން އުފެއްދި ސިޔާސީ ޕާޓީ މޯލްޑިވްސް ތާރޑުވޭ ޑިމޮކްރެޓްސް (އެމްޓީޑީ) ގެ ރައީސަކަށް ރާއްޖޭގެ ކުރީގެ ނާއިބު ރައީސް އަޙުމަދު އަދީބު ހަމަޖެއްސެވި ކަމުގެ ލިޔުންތައް އިލެކްޝަންސް ކޮމިޝަން (އީސީ) އަށް ހުށަހަޅައިފައި ނުވާކަމަށް އެ ކޮމިޝަނުން ވިދާޅުވެއްޖެއެވެ.
އީސީގެ މެމްބަރު އަދި ތަރުޖަމާނު އަޙުމަދު އަކުރަމް ވިދާޅުވީ އެމްޓީޑީގެ ރައީސަކަށް އަދީބު ހަމަޖައްސަވައި އެކަން އެޕާޓީން އަންގަވާފައި ނުވާކަމަށާއި އެކަމާބެހޭ ލިޔެކިޔުންތައް ހުށަހެޅުމުން ޤާނުނޫގައި އޮންނަ ގޮތަށް އީސީން ކަންކަން ކުރިއަށް ގެންދަވާނެ ކަމަށެވެ.
އެމްޓީޑީގެ ސީނިއަރ ނާއިބު ރައީސް އިސްމާޢީލް ޢާސިމް ވިދާޅުވެފައިވަނީ އެކަމާބެހޭ ލިޔެކިޔުންތައް އީސީއަށް ހުށަހަޅުއްވާނެ ކަމަށެވެ. އެހެންނަމަވެސް އެލިޔުންތައް ހުށަހަޅުއްވާނެ ކަމަށް އޭނާ ވިދާޅުވި ތާރީޚު މިހާރުވަނީ ފަސްވެ ގޮސްފައެވެ.
ސީޔާސީ ޕާޓީތަކުގެ ޤާނޫނު ބުނާގޮތުން ޙުކުމެއް ތަންފީޒު ކުރަމުންދާ މީހަކަށް ޕާޓީއެއްގެ މެމްބަރޝިޕް އޮތުން ފިޔަވައި އެއްވެސް މަޤާމެއްގައި ނުހުރެވޭނެއެވެ. އަދީބަކީ ތަފާތުކުށުގެ ސަބަބުން 33 އަހަރުގެ ޖަލުޙުކުމެއް ތަންފީޒު ކުރަމުންދާ ބޭފުޅެކެވެ.
"އެމްޓީޑީގެ ރައީސް ކަމަށް އަދީބު އައްނަޔްކުރި ވާހަކައެއް އެބޭފުޅުން (އެމްޓީޑީ) ނެތް އަދި ކޮމިޝަނަށް ހުށަހަޅައިފައެއް. ހުށަހެޅުމުން އެއަށް ގޮތެއް ނިންމާނީ. ކޮމިޝަނުން ޤަބޫލުކުރަނީ ހުރިހާ ކަމެއްވެސް ހިނގަންޖެހޭނީ ޤާނޫނާ އެއްގޮތަށް ކަމަށް،" އަކުރަމް ވިދާޅުވިއެވެ.
