ރިޔާސީ ލޯންޗު ފިނިފެންމާގައި ބޮންގޮއްވާލި މައްސަލާގައި ކުރީގެ ނައިބު ރައީސް އަހްމަދު އަދީބުގެ މައްޗަށް ދައުލަތުން އުފުލި ޓެރަރިޒަމްގެ ދައުވާ ސާބިތުވެ 15 އަހަރަށް އޭނާ ޖަލަށްލުމަށް ކްރިމިންލް ކޯޓުން މިރޭ ޙުކުމް ކޮށްފިއެވެ.
މިރޭ އަދީބުގެ މައްޗަށް 15 އަހަރުގެ ޖަލުޙުކުމެއް އައިސްފައިވާއިރު، މިދިޔަ ހަފުތާގައި ވަނީ އޭނާގެ މައްޗަށް 10 އަހަރުގެ ޖަލުޙުކުމެއް ކޮށްފައެވެ. އެހެންކަމުން މިހާރު އަދީބު ޖަލުގައި ހުންވަން ޖެހޭ މުއަދަތު ޖުމުލަ 25 އަހަރަށް އެރީއެވެ.
އޭނާ 10 އަހަރަށް ޖަލަށް ލުމަށް މިދިޔަ ހަފްތާގައި ޙުކުމްކުރީ، މިދޔަ އަހަރުގެ މެއިމަހުގެ ފުރަތަމަދުވަހު ފިސްތޯލައެއް ގެންގުޅުނު މައްސަލާގައި ކުރި ޓެރަރިޒަމްގެ ދައުވާ ސާބިތުވުމުންނެވެ.
މިރޭ ކްރިމިނަލް ކޯޓުންވަނީ އަދީބުގެ ކުރީގެ ދެ ބޮޑީގަޑުން ކަމަށްވާ ހަސަން ރިކާޒާއި އަހްމަދު އާމިރުގެ މައްޗަށް ކޮންމެ މީހަކު 10 އަހަރަށް ޖަލަށްލުމަށް ޙުކުމްކޮށްފައެވެ. އެދެމީހުންގެ މައްޗަށްވެސް ދައުލަތުން ކޮށްފައިވަނީ ޓެރަރިޒަމްގެ ދައުވާ އެވެ.
ރައީސުލްޖުމްހޫރިއްޔާ ޢަބްދުﷲ ޔާމީންގެ ދެކަނބަލުން މިދިޔަ އަހަރު ހައްޖުގެ އަޅުކަމަށް ފަހު ރާއްޖެ ވަޑައިގެން، ހުޅުލޭ އެއާޕޯޓުން މާލެ އަށް ދަތުރުކުރެއްވި "ފިނިފެންމާ" ލޯންޗުގައި ބޮން ގޮއްވާލާފައި ވަނީ މިދިޔަ އަހަރުގެ ސެޕްޓެމްބަރު މަހުގެ 28 ވަނަ ދުވަހު އެވެ. އެޙާދިސާގައި ރައީސްގެ އަނބިކަނބަލުންނާއި، ބައެއް އެހެން ބޭފުޅުން ޒަޚަމްވެވަޑައިގަތެވެ. އެހެންނަމަވެސް ރައީސް ވަނީ އެޙަމަލާއިން ސަލާމަތް ވެވަޑައިގެންފައެވެ.
މިޙާދިސާއަށްފަހު އޭރުގެ ނައިބުރައީސް އަދީބަށް ތުހުމަތުކުރެވި އޭނާ ހައްޔަރުކުރުމަށްފަހު، މިހާތަނަށްވެސް ހުންނެވީ ބަންދުގައި ފުލުހުންގެ ބެލުމުގެދަށުގައެވެ. ރައްޔިތުންގެ މަޖިލީހުން އޭނާގެ އިތުބާރުނެތްކަމުގެ ވޯޓު ނަގައި މަޤާމުން ދުރުކުރީވެސް ބަންދުގައި ހުންނަވަނިކޮށެވެ.
އަދިވެސް އަދީބުގެ މައްޗަށް ބައެއް ދަޢުވާތައް އުފުލާފައިވެއެވެ. އޭގެ ތެރޭގައި އެމްއެމްޕީއާރުސީގެ ޚިޔާނާތުގެ މައްސަލައާއި، ރަސްމީ ޙައިސިއްޔަތު ނަހަމަގޮތުގައި ބޭނުންކުރިކަމުގެ ތުހުމަތުވެސް ހިމެނެއެވެ. މިމައްސަލަތަކުގެ ޝަރީޢަތް ދަނީ ކުރިއަށެވެ.
