މިނިސްޓަރ އޮފް އެޑިޔުކޭޝަން ޑރ. ޢާއިޝަތު ޢަލީ އައްޑޫ ސިޓީއަށާއި ފުވައްމުލަކު ސިޓީއަށް މިއަދު ފެއްޓެވި ދަތުރުފުޅުގައި އައްޑޫ ސިޓީގެ ޕްރިންސިޕަލުންނާ ބައްދަލު ކުރައްވައިފިއެވެ.
މި ބައްދަލު ކުރެއްވުން އޮތީ އައްޑޫ ސިޓީ މަރަދޫ އިރުޝާދިއްޔާ ސްކޫލުގައެވެ. މިބައްދަލުވުމުގައި ވަނީ ސްކޫލްތަކަށް ދިމާވެފައި މައްސަލަތަކާއި އެކަންކަން ޙައްލު ކުރެއްވުމާ ބެހޭގޮތުން މަޝްވަރާ ކުރައްވައިފައިއެވެ. އަދި އަންނަ އަހަރަށް ރާވާފައިވާ ކަންކަން ކަމާއި އެކަންކަން ހިންގެވުމާ ބެހޭގޮތުން ވެސް މަޝްވަރާ ކުރެއްވި ކަމަށް މަޢުލޫމާތު ލިބިފައިވެއެވެ.
މިދަތުރުފުޅަކީ ސްކޫލްތަކުގައިހުރި ކަންބޮޑުވުންތައް އޮޅުންފިލުއްވުމަށް ކުރައްވާ ދަތުރުފުޅެއް ކަމަށް މަޢުލޫމާތު ލިބިފައިވެއެވެ.
މިނިސްޓަރ މިއަދުވަނީ ސްކޫލުތަކުގެ ގްރޭޑް 8 ގެ ދަރިވަރުންގެ ބެލެނިވެރިންނާއި ޕީޓީއޭއާ ވެސް ބައްދަލު ކުރައްވައިފައެވެ. މިއަދު 1:45 ސްކޫލްތަކުގެ ޓީޗަރުންނާ ވެސް މިނިސްޓަރ ބައްދަލު ކުރައްވާ ގޮތަށް ވަނީ ހަމަޖެހިފައެވެ. އެ ބައްދަލުކުރެއްވުން ވެސް އޮންނާނީ އިރުޝާދިއްޔާގައެވެ.
އައްޑޫސިޓީ ގުޅިފައިވާ ރަށްތަކަށްފަހު މިނިސްޓަރ މިއަދު މެންދުރުފަހު ހުޅުމީދުއަށް ވަޑައިގަންނަވާނެއެވެ. އެ ދެރަށަށް ވަޑައިގެން ވެސް ސްކޫލް ތަކުގެ ޕީޓީއޭއާއި ޓީޗަރުންނާއި ގްރޭޑް 8 ގެ ދަރިވަރުންގެ ބެލެނިވެރިންނާ ބައްދަލު ކުރައްވާނެއެވެ.
މިނިސްޓަރ ގެ މިދަތުރުފުޅުގައި މިރޭ އައްޑޫސިޓީ ކައުންސިލާ ވެސް ބައްދަލު ކުރައްވާ ގޮތަށްވަނީ ހަމަޖެހިފައެވެ.
މިދަތުރުފުޅުގައި އެކަމަނާ ފުވައްމުލަކަށް ވަޑައިގަންނަވާނީ މާދަމާއެވެ.
