ރިޔާސީ އިންތިޚާބު ނިމިދިޔައީއެވެ. އިންތިޚާބުގެ ވަގުތީ ނަތީޖާ ގަބޫލުނުކޮށް ޕީޕީއެމުން ސުޕްރީމް ކޯޓަށް ވެއްދި މައްސަލަވެސް ނިމިދިޔައީއެވެ. އިންތިޚާބުގެ ވަގުތީ ނަތީޖާ އާއި ދާއިމީ ނަތީޖާއިންވެސް އަދި ސުޕްރީމް ކޯޓަށް ޕީޕީއެމުން ވެއްދި މައްސަލައިގައިވެސް ކުރި ލިބިވަޑައިގެން ދިޔައީ އިދިކޮޅު ކޯލިޝަނުން ދެއްކި ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙްގެ ކޮޅަށެވެ.
އެހެންކަމުން ކުރިޔަށް އޮތް ރިޔާސީ އާ ދައުރުގައި ދިވެހި ރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގެ ހުވާ ކުރައްވާނީ އިބްރާހިމް މުޙަންމަދު ސޯލިޙް ކަމާމެދު އުފެދިގެންދިޔަ ހުރިހާ ޝައްކެއް ވަނީ ފިލައި ގޮސްފައެވެ. އިންތިޚާބުގެ ވޯޓުގެ ނަތީޖާ އާއި ސުޕްރީމް ކޯޓުގެ ޙުކުމާއެކު އެކަން ސާފު ވެގެންދިޔަ ނަމަވެސް އަދިވެސް މުޅިން ސާފު ނުވާކަމެއް އިންތިޚާބާ ގުޅޭގޮތުން އެބައޮތެވެ. އެއީ ރައީސުލްޖުމްހޫރިއްޔާގެ މަގާމުގެ ހުވާ އިބްރާހިމް މުޙަންމަދު ސޯލިޙް ކުރައްވާނީ ކޮންދުވަހަކުތޯ އުފެދިގެން އުޅޭ ސުވާލެވެ.
އިންތިޚާބު ކާމިޔާބުކުރި ކޯލިޝަނުން ބުނަމުން ދަނީ ނޮވެމްބަރު މަހުގެ 11 ވަނަ ދުވަހަކީ ރައީސް ކަމުގެ ހުވާ ކުރައްވަންޖެހޭ ދުވަސް ކަމަށެވެ. އިލެކްޝަން ކޮމިޝަނުންވެސް ވަނީ އެފަދަ މޭރުމަކުން ވާހަކަ ދައްކަވާފައެވެ. ރައްޔިތުންގެ މަޖިލީހުގެ ނައިބު ރައީސް ރީކޯ މޫސާ މަނިކުވެސް ވަނީ ނޮވެމްބަރު 11 ވަނަ ދުވަހު އާ ރައީސަށް ހުވާ ކުރެއްވެންޖެހޭނެ ކަމަށް ވިދާޅުވެ ނޮވެމްބަރު 11 އަށް ބާރު ދެއްވާފައެވެ. ނޮވެމްބަރު 11 ގައި އާ ރައީސް ހުވާ ކުރެއްވުމަކީ ނިޒާމު އަލުން ހަމައަކަށް އެޅިގެންދާނެ ކަމެއް ކަމަށް އިދިކޮޅުން ދަނީ ބުނަމުންނެވެ.
ވެރިކަންކުރާ ޕީޕީއެމުން ތިބީކީ ނޮވެމްބަރު 11 ގައި އާ ރައީސަށް ހުވާ ކުރެއްވުމުގެ ފުރުޞަތު ދޭގޮތަކަށް ނޫނެވެ. ޕީޕީއެމުން ބުނަނީ އިބްރާހިމް މުޙަންމަދު ސޯލިޙް ހުވާ ކުރައްވަން ފުރުޞަތު ލިބޭނީ ރައީސް ޔާމީންގެ ވެރިކަމަށް ފަސް އަހަރު ފުރުމުން ކަމަށެވެ. ވެރިކަމުގެ ދައުރަކީ ފަސް އަހަރު ކަމަށާއި ރައީސް ޔާމީން ހުވާ ކުރެއްވި ދުވަހުން ފެށިގެން ފަސް އަހަރު ފުރޭނީ ނޮވެމްބަރު 17 އަށް ކަމަށެވެ. އެހެންކަމުން ނޮވެމްބަރު 11 ގައި އާ ރައީސް ހުވާ ކުރެއްވުމުގެ ފުރުޞަތު ގާނޫނުގެ ތެރެއިން ނެތް ކަމަށް ޕީޕީއެމްގެ އިސްބޭފުޅުން ތަކުރާރުކޮށް ދަނީ ވިދާޅުވަމުންނެވެ.
2013 ވަނަ އަހަރުގެ ރިޔާސީ އިންތިޚާބު ނިމިގެންދިޔަ ގޮތުން ރާއްޖޭގައި ފެށުނީއްސުރެ އާ ރައީސް ހުވާ ކުރައްވާ ދުވަސް ކަމުގައިވާ ޖުމްހޫރީ ދުވަހު (ނޮވެމްބަރު 11) ރައީސް ކަމުގެ ހުވާ ކުރައްވަން ރައީސް އަބްދުﷲ ޔާމީނަށް ފުރުޞަތު ލިބިވަޑައިނުގެންނެވިއެވެ.
އެހެންވެ މިހާރު އުފެދިގެން އުޅޭ ބަހުސަކީ އިންތިޚާބުން މޮޅުވީ ކޮންބަޔެއްތޯއެއް ނޫނެވެ. މޮޅުވި މީހުން ވޯޓުންނާއި ކޯޓުންވެސް ނިންމައިފިއެވެ. މިހާރު ސާފު ނުވެގެން މިއުޅެނީ ވެރިކަމުގައި ހުންނެވި ރައީސް މަގާމުން ދުރަށްޖެހިވަޑައިގަންނަވާނެ ދުވަހަކީ ކޮބައިތޯ އާއި އާ ރައީސް މަގާމާ ހަވާލުވެވަޑައިގަންނަވާނެ ދުވަހެކެވެ. މިކަންވެސް ރައްޔިތުންނަށް މިހާރު ސާފުވާން އެބަޖެހޭތާއެވެ. ކޮންމެވެސް ފަރާތަކުން ސާފު ގޮތެއް ނިންމަން އެބަޖެހެއެވެ. އެގާރަ ވިއްޔާ އެގާރައެވެ. ސަތާރަ ވިއްޔާ ސަތާރައެވެ.
