ސަޔަކުން ދިމާވިޔަސް، މަގެއްގެ މަތިން ދިމާވިޔަސް، ގެޔަކުން ދިމާވިޔަސް، މިސްކިތެއް ކައިރިން ދިމާވިޔަސް، މާރުކޭޓުން ދިމާވިޔަސް، ބުރިޖުން ދިމާވިޔަސް، ފޭސްބުކުން ނުވަތަ ވައިބަރުން ދިމާވިޔަސް، ކިރިޔާ ދަންނަ މީހެއްވިޔަސް މިދުވަސްވަރު އެންމެ ފުރަތަމަ އަހާލަނީ މިހެންނެވެ. ކުރިން އާންމު އުސޫލުން ފުރަތަމަ އަހާލަނީ ކޮބާ ފުރެންޑު ހާލު ކިހިނެއްހޭއެވެ. އެކަމަކު މިހާރު ހާލުއަހުވާލުގެ ވާހަކަ އަހާލަނީވެސް ވާހަކައިގެ މެދެކާ ހަމައަށް ގޮސްފައެވެ.
މިސުވާލު ކޮށްލުމާއެކު ޖަވާބުގައި ހަމަ ކޮންމެ މީހެއްގެ ކައިރީވެސް ބޭއިޚްތިޔާރުގައި އަހަރެންނަށް ދެވޭ އަވަސް ޖަވާބަކީ ކޮންކަމެއް ހެއްޔޭ އަހާލުމެވެ. ހަގީގަތުގައި މިދުވަސްވަރު ހަމަ ދެރަޙްމަތްތެރިޔަކު ބައްދަލުވާ ކޮންމެ ފަހަރަކު އެންމެ ފުރަތަމަ އެކަކު އަނެކަކަށް އަހާލެވެނީ ހަމަ އެ ސުވާލެވެ. އެކިމީހުންގެ ޖަވާބު ތަފާތު ވެދާނެއެވެ. އެކަމަކު އަހަރެންނަށް ހަމަ ކޮންމެ މީހަކު ކައިރީވެސް ފުރަތަމަ ދެވޭ ޖަވާބަކަށް އޮންނަނީ ކޮންކަމެއްޔޭ އަހާލުމެވެ. މީހަކު ސުވާލެއް ކޮށްފިއްޔާ ޖަވާބު ދޭންވާނީ ސުވާލު ސާފު ވެގެންތާއެވެ. މިސުވާލަކީ މިމަހުގެ 23 ވަނަ ދުވަހު އޮންނަ ރިޔާސީ އިންތިޚާބުގެ ނަތީޖާއަށް ދިޔުމުގެ ކުރިން އަހަރެމެންގެ އެންމެންގެ ޓެސްޓް ޕޭޕަރުގައި ފުރަތަމަ އޮތް ސުވާލެވެ.
ކުރިޔަށް އޮތީ ވަރުގަދަ އިންތިޚާބެކެވެ. ދިވެހިރާއްޖޭގެ ރިޔާސީ އިންތިޚާބެވެ. އިންތިޚާބު ކައިރިވެ، އަތާ ހަމައަށް ނިންމުން އަންނައިރު އަދިވެސް ލައްކަ ވާހަކަ ތިލަވެ، ލައްކަ މަންޒަރު ދެކޮޅުންވެސް ފެނިގެންދާނެއެވެ. ވޯޓު ކަރުދާސްކޮޅުގެ ފާހަގަ ޖަގާ ގޮޅީއާ ދިމާ އެންމެ މަތީގައި މިއޮތީ ދިވެހި ސަރުކަރާ މިވަގުތު ހަވާލުވެ އޮތް ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީނެވެ. އެމަނިކުފާނުގެ ރަނިންމޭޓް ޑރ މުޙަންމަދު ޝަހީމް އަލީ ސައީދުގެ ނަމާއެކުގައެވެ. އެއާ ޖެހިގެން ދެވަނައަށް މިއޮތީ އިދިކޮޅު ގިނަޕާޓީތަކާއި ލީޑަރުން ތަކެއް އަތާ އަތުގުޅާލައިގެން އުފައްދާފައި އޮތް އެކޯލިޝަނުގެ ފުރިހަމަ ތާއީދާއެކު ނެރެފައިވާ އެމްޑީޕީގެ ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) އެވެ. އިބޫގެ ނަމާއެކު ރަނިންމޭޓެއްގެ ގޮތުގައި ކާށިދޫ ދާއިރާގެ މެމްބަރު ފައިސަލް ނަސީމެވެ. ދެކެންޑިޑޭޓްގެ ކެމްޕޭންވެސް ކުރިޔަށް ދަނީ ވަރަށް ޖޯޝާއި ފޯރީގައެވެ. ވަރަށް ވާދަވެރި މާހައުލެއްގައެވެ.
ކެމްޕޭން މިހިސާބަށް އައިއިރު އެބަޔަކަށް އެރުނު ރަށަކަށް އަރައި އެބަޔަކަށް ތާއީދު ކުރާހާ ބަޔަކު އެއްކޮށްގެން ޖަލްސާތައް ބާއްވަނީއެވެ. އެއްބަޔަކު އަރައި ފާއިބާއިރަށްވެސް އަނެއް ބަޔަކު ގޮސް ބަޔެއް ރަށްރަށަށް އެބައަރައެވެ. ވާދަވެރިކަން އޮތީ އިންތިހާއަށެވެ. ޓީވީތަކުން އެނޫން އެއްޗެއް ނުފެނެއެވެ. އަބަދުވެސް އަޅުވާފައި ދައްކާފައި ހުންނަނީ އިންތިޚާބާބެހޭ ކޮންމެވެސް ވީޑިޔޯއެއް ނުވަތަ ފޮޓެލެކެވެ. އެބަޔަކު ތާއީދު ކުރާ ބަޔެއްގެ މަންޒަރާއެކުގައެވެ. ރަށްރަށުގައިވެސް އެފޯރިއެވެ. ޖަގަހަތަކުގައި ބޮޑިބަތް ކެއުމާއެކު، ދެމުނު ވަރަކަށް ދިދަ ދަމައި ބެނާތައް އައްސަނީއެވެ. އައްސައި ނިމިގެން އެތަނުން ދުރަށްދާއިރަށް އަނެއް ބަޔަކު ގޮސް ކަނޑާ ވައްޓާވެސް ލަނީއެވެ. މާލޭ އާއި ހުޅުމާލޭގެ ބަޔެއް މަގުތައްވެސް ދެބައިމީހުންގެ ދިދަފަތި ތަކުން އޮތީ ހިސާބަކަށް ހިޔާވެފައެވެ.
އިދިކޮޅުންވެސް އަދި ޕީޕީއެމުންވެސް ބޮޑެތި ޖަލްސާތައް މާލޭގައި ބޭއްވުމުގައި ވާދަވެރިކަން މިއޮތީ އިންތިހާއަށް އަރާފައެވެ. ދެބައިމީހުންވެސް ބޮޑު ޖަލްސާ ބާއްވައިގެން އެބަޔެއްގެ ސައިޒު، މަންޒަރާއި ފޮޓޯއިން އެހެރަގެން ދަނީ ދައްކަނީއެވެ. އެ ޖަލްސާއަށްވުރެ މިޖަލްސާގައި މީހުން ގިނަ ކަމަށް ދެބައިމީހުންވެސް ދަނީ ބުނަމުންނެވެ. ޑުރޯނެއް މައްޗަށް ފޮނުވައިގެން ނެގިހާ ފޮޓޯއެއް ސޯޝަލް މީޑިޔާގައި އެހެރަދަނީ އެނބުރެމުން ސެނބުރެމުންނެވެ. ކޮންމެ ބަޔަކުވެސް ދެބައި މީހުންގެ ބޮޑު ޖަލްސާގެ ފޮޓޯގައި މީހުން ގިނަކޮޅަކީ ތިމާމެން ކަމުގައި އެހަރެގެން ދަނީ ލިޔެ އޮއްސަމުންނެވެ.
ޒާތެއްގެ އަޑެއް ހުންނަ ޑުރޯނެއް ބޮލާ ދިމާމައްޗަށް އުދުއްސައިގެން އެސޮރު ލައްވައި ނެގިހާ ފޮޓޯއެއް ފޭސްބުކަށް ދޫކޮށްލަމުން ކޮންމެ ބަޔަކުވެސް ބުނަނީ ސައިޒު ބޮޑީ އަހަރެމެންގެ ކޮޅު ކަމަށެވެ. އަނެއްކޮޅު ޖަލްސާގެ ފޮޓޯއިން ސައިޒު ފެންނަނީ ކުޑަކޮށެވެ. ކޯލިޝަނުންވެސް އަދި ޕީޕީއެމުންވެސް އެއޮތީ ޑުރޯނަށް ވީވަރަކުން ސައިޒު ދައްކައިދީ، އެންމެ ބޮޑު ސައިޒުގެ ފޮޓޯއެއް ނަގާފައެވެ. އެކަމަކު ބަޔެއް މީހުން އެބަޔެއްގެ ޖަލްސާގެ ފޮޓޯ ބޮޑު ސައިޒުގެ ފުރޭމަކަށް ނުލެވޭހާ ބޮޑުކޮށްލުމަށް ފަހު އަނެއް ބައިމީހުންގެ ޖަލްސާގެ ފޮޓޯ ސުޓޭމްޕު ސައިޒަށް ކުޑަކޮށްލައި، އަސްލެއް، ފޭކެއް ވަކިކުރަން ނޭނގޭ ވަރުކޮށްލާތީ ނިކަން ހެއްވައެވެ.
ދެބައިމީހުންވެސް، މީހުންނެރެ ބޮޑެތި ފޮޓޯ އާއި ބޮޑެތި އަދަދުތައް ޖަހައި، ބުނަމުން ދަނީ 23 ގެ ވޯޓުގެ ކުރިން އިންތިޚާބު މިއޮތީ އަހަރެމެނަށް ކާމިޔާވެފައި ކަމަށެވެ. މަންޒަރު ސާފު ކަމަށެވެ. އިދިކޮޅު ކޯލިޝަނުންވެސް އަދި ޕީޕީއެމުންވެސް މެއެވެ. އެހެން އެ ބުނަނަނީ ވަރަށްގިނަ މީހުން ދެބައިމީހުންވެސް އެއްތާކަށް ޖަމާ ކުރުމަށް ފަހުއެވެ. އެބަޔަކަށް ތާއީދު އޮތްވަރު އެބަޔަކު ދެއްކުމަށް ފަހުއެވެ. ޕާޓީ ރޫހާއި ޖޯޝުން ފުރިއުތުރި އަރާވަރަށް ވިރުވާއަޅާފައިވާ ހިތްގައިމު ލަވަތަކާއެކު ބޭއްވި ބިޔަ ބޮޑު ޖަލްސާ ތަކަށް ފަހުއެވެ.
މިހުރިހާ ކަމެއް މިހެން ހުރިނަމަވެސް އިންތިޚާބުގެ ސާފު ނަތީޖާ ބައްދަލު ކުރާނީ 23 ވަނަ ދުވަހު ރައްޔިތުން ނުކުމެލާ ވޯޓުންނެވެ. ޑުރޯނު މައްޗަށް ފޮނުވައިގެން ދެބައިމީހުން ނެގި ފޮޓޯއިން ސަޕޯޓަރުންގެ އަދަދު އެއްވެސް ބަޔަކު ހާމަނުކުރިޔަސް ނުވަތަ ސާފު އަދަދު ބުނަން ނޭނގުނަސް 23 ވަނަ ދުވަހު ޑުރޯނު މައްޗަށް ނޫދުއްސައިވެސް ރައްޔިތުން ވޯޓު ފޮއްޓަށް އެއަޅާ ކަރުދާސް ކޮޅާއެކު ދެބައިމީހުން ޑުރޯނު ފޮނުވައިގެން ނެގި ފޮޓޯގައި ގިނައީ ކޮންބަޔެއްގެ ސަޕޯޓަރުންނެއްކަންވެސް ސާފުވާނެއެވެ.
ދެބައިމީހުންގެ ބިޔަ ޖަލްސާތަކުގައި ޑުރޯނުން ނެގި ފޮޓޯތަކަށް ނާރާ ހިސާބު ދުރުގައި ޓީވީތަކުން މަންޒަރު ބަލަންތިބި އެންމެންވެސް 23 ވަނަ ދުވަހުގެ އެއްވުމަށް ނުކުމެ ސާފު އަދަދު ދައްކާނެއެވެ. އިލެކްޝަން ކޮމިޝަނުން އެ އަދަދު ރަސްމީކޮށް އިއްވާ ހިސާބުން މިހާރު ދެބައިމީހުން ޖަހަމުންދާ ހިސާބުތަކުގެ ސައްޙަ ނަތީޖާ ފެންނަން އޮންނާނެއެވެ. އެހާހަމައިން އޮންނާނީ ވީގޮތާއި މީހުން ގިނަކޮޅެއްވެސް މުޖައްރިބުވެ ނިމިފައެވެ. ރިޔާސީ ރޭސް އަދި މިދަނީ ވަރަށް ވާދަވެރި ކޮށެވެ.
