ޔަމަނުގެ ހުދައިދާގައި ޔަމަނުގެ ސަރުކާރަށް ތާއީދުކުރާ ސިފައިންނާ ޙޫޘީ ހަނގުރާމަވެރިންނާ ދެމެދު ޖޫން މަހުއްސުރެ ހިނގާ ހަނގުރާމައިގެ ސަބަބުން އެ ޕްރޮވިންސުގެ 5 ލައްކަ 50 ހާސް މީހުުން ގެދޮރު ދޫކޮށް ހިޖުރަކޮޮށްފި ކަމުގައި އިންސާނީ އެހީދޭ ޖަމާއަތަކުން ބުނެފިއެވެ.
ނޯވޭޖިއަން ރެފިއުޖީ ކައުންސިލް (އެންއާރުސީ) އިން އިއްޔެ ނެރުނު ބަޔާނެއްގައި ވާގޮތުން އެ ޖަމާއަތުންނާއި، އިންސާނީ އެހީދޭ އެހެން ޖަމާއަތްތަކުން ވަނީ ހުދައިދާ ޕްރޮވިންސުގެ އެކި ހިސާބުތަކުން މީހުން ގެދޮރު ދޫކޮށް ދަތުރުކުރަމުން ދިޔަަތަން ބަލާފައެވެ.
ބަޔާން ބުނާގޮތުން މި ސެޕްޓެންބަރު މަހުގެ 7 އާއި 9 އެއީ ޔަމަނުގެ ހަނގުރާމައިގައި އެެންމެ ލޯ އޮހޮރުވުން ބޮޑު ދެ ދުވަހެވެ. އެ ދެ ދުވަހުގެ ހަނގުރާމައިގައި ހުދައިދާއިން 84 މީހުން މަރުވެފައި ވެއެވެ.
"ހުދައިދާ ސިޓީގެ އެތައް ދިމާއަކުން އެރަށަށް ހަމަލާތައް އަމާޒުވަމުން އެބަދެއެވެ. އޭގެ ތެރޭގައި ބަރު ހަތިޔާރުން އެެއްގަމު މަގުން ދެވޭ ހަމަލާއާއި، މެދުނުކެނޑި ދެެމުންދާ ވައިގެ ހަމަލާތައް ހިމެނެއެވެ." އެ ބަޔާނުގައި ވެއެވެ.
ހުދައިދާގެ ބަނދަރާއި އެ ޕްރޮވިންސުގައި ހުރި 3.5 މިިލިއަން މީހުންނަށް ބޭނުންވާ ގޮދަން އުފައްދާ ކާރުޚާނާތަކުގެ ސަލާމަތާމެދުވެސް އެންއާރުސީގެ ބަޔާނުގައި ކަންބޮޑުވުން ފާޅުކޮށްފައި ވެއެެވެ.
ސައޫދީ އަރަބިއްޔާ އިސްވެ އޮވެ އުފައްދާފައިވާ އަރަބި ކޯލިޝަންގެ އަސްކަރީ ބާރުގެ އެހީތެރިކަމާއެކު ޔަމަނު ސަރުކާރު ސިފައިން ވަނީ ޙޫޘީ ހަނގުރާމަވެރިން އަތުން ހުދައިދާ ޕްރޮވިންސާއި، އިސްތިރާތީޖީ ގޮތުން މުހިއްމު ހުދައިދާ ބަނދަރު އަތުލުމަށް ފާއިތުވި ޖޫން މަހުގެ 13 ވަނަ ދުވަހު ވަރުގަދަ ހަމަލާއެެއް ފަށާފައެވެ. މި ހަމަލާގައި ހުދައިދާގެ ސަރުކާރުގެ ސިފައިންގެ ބާރުގެ ދަށަށް އެ ޕްރޮވިންސުގެ އެކި ސަރަހައްދުތައް އައި ނަމަވެސް، ޙޫޘީންގެ ބާރުގެ ދަށުގައި ޕްރޮވިންސްގެ ބޮޑު ބައެއް އަދިވެސް އެބައޮތެވެ.
ޔަަމަނުގައި ސަރުކާރު ސިފައިންނާއި ޙޫޘީ ހަނގުރާމަވެރިނާ ދެމެދު ހަނގުރާމަ ހިނގާތާ 4 އަހަރު ވެއްޖެއެވެ. މި ހަނގުރާމައިގައި ޙޫޘީން ވަނީ ބައެެއް ސަރަހައްދުތަައް ހިފާފައެވެ. އޭގެ ތެރޭގައި ވެރިރަށް ސަންއާވެސް ހިމެނެއެވެ.
ހަނގުރާމައިގެ ސަބަބުން 3 މިލިއަނަށް ވުރެ ގިނަ މީހުންގެ ގެދޮރު ނެތިފައިވާ އިރު 8 މިލިއަން މީހުންނަށް ވަނީ ކާބޯތަކެތި ނުލިބުމުގެ ސަބަބުން ބަނޑަށްޖެހިދާނެ ކަމުގެ ބިރު ކުރިމަތިވެފައެވެ.
