މާލޭގެ ޢިމާރާތްތަކުގައި އުފެދޭކުނި ބަހައްޓާނެ ޖާގަ އެޢިމާރާތެއްގައި އޮންނަންޖެހޭގޮތަށް އުސޫލެއްކަނަޑައަޅުއްވައި، ހައުސިން މިނިސްޓްރީން އެއުސޫލު އާއްމުކުރައްވައިފިއެވެ.
ހައުސިން މިނިސްޓްރީން އާއްމުކުރައްވާފައިވާ (ސެންޓްރަލް ވޭސްޓް ޑިސްޕޯސަލް ޗޫޓް) ނުވަތަ ކުނި ބަހައްޓާނެ ވަކި ޖާގައެއް، އިމާރާތުގައި ކަނޑައެޅުމާ ބެހޭ އުސޫލަކީ ސިއްހީ ގޮތުން ރައްކާތެރި މާހައުލެއް އިމާރާތްތަކުގައި ގާއިމް ކުރަމަށް އެކަށައަޅާފައިވާ އުސޫލެއް ކަމަށް އެ މިނިސްޓްރީން ވިދާޅުވެއެވެ.
މި އާ އުސޫލުގެ ދަށުން ހަތަރު ބުރިއަށް ވުރެއް އުސްކޮށް ހަދާ އިމާރާތްތަކުގައި ކަނޑައެޅިފައިވާ މިންގަނޑުތަކާއެއްގޮތަށް، ކުނި ބަހައްޓާނެ ޖާގަ ހުންނަންޖެހެއެވެ.
މި ޖާގަ ކަނޑައަޅަންވާނީ އިމާރާތުގެ ގްރައުންޑް ފްލޯ، ނުވަތަ އެނެމް ތިރީބުރީގައި ކަމަށް ވެސް އާއުސޫލުގައި ކަނޑައަޅުއްވާފައިވެއެވެ.
ކުނި ބެހެއްޓުމަށް، ޢިމާރާތްތަކުގައި ކަނޑައަޅާ ތަނުގެފާރާއި ތަޅުންގަނޑު ހަދާފައި ހުންނަޖެހޭނީ ޓައިލްސް ނުވަތަ ފަސޭހައިން ސާރުކުރެވޭ ކަހަލަ ބާވަތަކުން ކަމަށާއި އަދި، އެތަން ހުންނަންވާނީ، ވަސް އަދި އެނޫން އެހެން އެއްޗެއްވެސް ބޭރު ނުވާ ގޮތަށް ކަމަށްވެސް ހައުސިން މިނިސްޓްރީގެ އާ އުސޫލުގައި ބަޔާންކުރައްވާފައިވެއެވެ.
މި ފަދަ ޖާގައެއް ހެދާއިރު، ޑްރެއިނޭޖް ސިސްޓަމެއް އެތަނުގައި ހުންނަޖެހޭނެ ކަމަށްވެސް މި އުސޫލުގައި ވަނީ ބަޔާން ކުރައްވާފައެވެ.
ހައުސިން މިނިސްޓްރީން މި އުސޫލު އާއްމުކޮށް ގެޒެޓްކޮށްފައިވާ އިރު މި އުސޫލާ ޚިލާފުވެއްޖެ ނަމަ މާލޭ ޕްލޭނިން ގަވައިދާ ޚިލާފުވުމުން އަމަލު ކުރާނެ ގޮތާއި ކުރެވޭ ޖޫރިމަނާގެ އުސޫލު ގެ ދަށުން އަމަލު ކުރެވޭނެ ކަމަށް ވެސް އެ މިނިސްޓްރީން ހާމަކުރައްވައެވެ.
