ސިނަމާލެ ބްރިޖަކީ ރައީސް އަބްދުﷲ ޔާމީނާއި ޗައިނާގެ ރައީސާ ދެމެދު އޮތް ގުޅުމުން އުފަންވި ބްރިޖެއް ކަމަށް ހައުސިން މިނިސްޓްރ ޑރ. މުހައްމަދު މުއިއްޒު ވިދާޅުވެއްޖެއެވެ.
ބްރިޖު ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައި ޑރ. މުއިއްޒު ވިދާޅުވީ އެ މަސައްކަތުގެ ބުރަކަމާއި ބިޔަކަން ހިތަށްއަރާފައި ވަނީކޮށް ރައީސް ޔާމީން ބްރިޖު އަޅުއްވަން ނިންމަވައި އެކަންކުރައްވާނެ ކަމަށް ނިންމެވި ކަމަށެވެ. އެހިސާބުން ޗައިނާ ސަރުކާރުގެ އެހީތެރިކަމާއެކު ބްރިޖުގެ މަސައްކަތް ފަށައި އެކަން ހަގީގަތަކަށް ވެގެން ގޮސްފައިވާ ކަމަށެވެ.
މިނިސްޓަރ ވިދާޅުވީ މިއީ އުފާވެރި ވަގުތެއް ކަމަށާއި އަދި އަންނަން އޮތް ޖީލަށް ވެސް މިއުފާވެރިކަން ފޯރާނެ ކަމަށް އެމަނިކުފާނު ވިދާޅުވިއެވެ. މި ބްރިޖަކީ ވިޔަފާރިއާއި އިގްތިސާދުގެ އިތުރަށް އާއިލީ ގުޅުމުގެ ބްރިޖެއް ކަމަށް ވެސް ވިދާޅުވިއެވެ. މިއީ ނަނާ ހުވަފެނެއް ނޫންކަމަށާއި މިއީ ބިނާ ހުވަފެނެއް ކަމަށް ވެސް މިނިސްޓަރ ވިދާޅުވިއެވެ.
"މިއީ މި ދެރައީސުންގެ (ޗައިނާގެ ރައީސާއި ދިވެހިރާއްޖޭގެ ރައީސް) ގުޅުމުގެ ތެރެއިން އުފަންވި ބުރިޖެއް. އޭގެ ކުރީގެ އެއްވެސް އިރެއްގައި އެއްވެސް ޒަމާނެއްގައި ކުރެވުނު ކަމަކުން މިބުރިޖަށް މަގުފަހިކަމެއް އެއްވެސް ވަރަކަށް ލިބިފައިވާ ބްރިޖެއް ނޫން. ކޮންމެ މީހަކު ކޮންމެ ވާހަކައެއް ކޮންމެތަނެއްގައި ދެއްކިޔަސް މިހަގީގަތެއް ބަދަލެއް ނުވާނެ،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކުރީގެ ރައީސުން ވިދާޅުވަމުން ގެންދެވީ ހުޅުލެއާއި މާލެއާ ދެމެދު ބްރިޖު އެޅޭނެ ނަމައޭ ކަމަށާއި އެހެންނަމަވެސް ރައީސް ޔާމީން ވަނީ އެވިދާޅުވި "ނަމަ" ފޮހެލައްވައި ބްރިޖު އެޅުން ހަގީގަތަކަށް ހައްދަވައި ދެއްވައިފައި ކަމަށެވެ. ދިވެހި ފަސްގަނޑުގައި ވަޅުލެފައިވާ ދިވެހި އަޖުދާދުންނަށް ވެސް މި މަންޒަރު ފެނުނުނަމަ ލޮލުން އުފާވެރިކަމުގެ ކަރުނަ ހިލޭނެ ޝަރަފްވެރި އަދި ފަޚުވެރި ގުރުބާނީއެއް ކަމަށްވެސް މިނިސްޓަރ ވިދާޅުވިއެވެ.
"މި ބްރިޖުއެޅަމަށް ކުރަންޖެހޭ ދިރާސާތަކާއި މަސައްކަތްކުރަންއޮތް ތަނަކީ މާސިންގާ ފުންކަނޑަކަށްވާތީ އުފުލަންޖެހޭނެ ބުރައާއި ބަލަންޖެހޭނެ ބެލުންތަކާއި އެކަމަށްއޮތް ވަގުތާމެދު އަޅުގަނޑަށް ވެސް ޚިޔާލުކުރެވުނު. މިދަންނަވަނީ ބޭފުޅަކަށް ހީފުޅުވެދާނެ ގޮތަށް ބުރިޖެއް ނޭޅެނެޔޭ އެކަމުގެ އިންޖީނިއަރިންކޮބައިހޭ އަޅުގަނޑޫގެ ހިތަށް އެރިވާހަކައެއްނޫން. މިދަންނަވަނީ ވަގުތާއި އިލްމާއި މަސައްކަތާއި ޚަރަދާއި އެމަސައްކަތްކުރަންއޮތް ގޮތަށް ވިސްނާލީމާ ކަމުގެ ބޮޑުކަން އިހުސާސް ކުރެވުނުވާހަކަ. މިޚިޔާލުގައި ހުއްޓައި ރައީސް ޔާމީން ބްރިޖު އެޅޭނެ ކަމަށާއި ބްރިޖުއެޅޭނެ ކަމަށް ނިންމަވައިފި. މިހާރު މިއޮތީ ބުރިޖު އަޅާފައި،" މިނިސްޓަރ ވިދާޅުވިއެވެ.
މިއިން ދައްކުވައި ދެނީ ފާއިތުވި ހަތަރު އަހަރު ރައީސް ޔާމީނަށް ކުރިމަތި ކުރުވި "ހަނގުރާމައިގެ" ތެރެއިން "ޒަޚަމްވެވަޑައިގެން" ވެސް ރައްޔިތުންނަށް ތަރައްގީ ގެންނަވަން އެމަނިކުފާނު ބޭނުންފުޅުވާ މިންވަރު ކަމަށް ވެސް ޑރ. މުއިއްޒު ވިދާޅުވިއެވެ.
