ހދ. ހަނިމާދޫ އެއަރޕޯރޓް ޖެޓީ ސަރަހައްދުގައި އަޅާފަ އޮތް ލޯންޗެއް ދިޔަވެ އަޑިއަށް ހިގައްޖެއެވެ.
އެމްއެންޑީއެފްގެ މީޑިއާ އޮފިސަރު ކެޕްޓަން އިބްރާހީމް އާޒިމް ވިދާޅުވީ މިހާދިސާ ހިނގާފައިވަނީ މިއަދު މެންދުރު 13:51 އެހައިކަންހާއިރު ކަމަށެވެ. އަޑިއަށްގޮސްފައިވަނީ ހދ. ކުޅުދުއްފުށީ "ކިރުނަ" ނަމަކަށް ކިޔާ ލޯންޗެކެވެ. މި ހާދިސާގެ ރިޕޯރޓް ލިބުމާއެކު އެމްއެންޑީއެފް ނޮދަން އޭރިއާ ހަނިމާދޫ ޕޯސްޓްގެ ސިފައިން ވަނީ ލޯންޗް ތިލަކުރުމުގެ މަސައްކަތް ފަށައިފައެވެ.
ސިފައިން ކުރި މަސައްކަތުން މި ލޯންޗް ތިލަކުރެވިފައިވަނީ މިއަދު މެންދުރު 14:30 އެހައިކަންހާއިރު ކަމަށް އާޒިމް ވިދާޅުވިއެވެ. މި މަސައްކަތުގައި ހދ. ހަނިމާދޫ އެއަރޕޯރޓްގެ އެހީތެރިކަން އެމްއެންޑީއެފް ނޮދަން އޭރިއާ ހަނިމާދޫ ޕޯސްޓްގެ ސިފައިންނަށް ވަނީ ލިބިފައި ކަމަށްވެސް އޭނާ ވިދާޅުވިއެވެ.
މި ލޯންޗް ޖެޓީކައިރިއަށް އަޑިއަށް ގޮސްފައިވަނީ ފަޅުތެރޭގައި އަޅާފައިވަނިކޮށް ކަނޑުގަދަވެ ދިޔަވުމުގެ ސަބަބުންނެވެ. ހާދިސާ ހިނގިއިރު އޭގައި އެއްވެސް މީހަކު ނެތެވެ.
