ރާވައިގެން އެކުގައި ހިންގުނު އަމަލެއް ކަމުގައި ބެލެވޭ ގޮތަށް ސުވިޑަންގެ ހުޅަނގުގައި 80 ކާރުގައި ރޯކޮށްލައިފިކަމަށް ފުލުހުން ބުނެފިއެެވެ. މިކަން ކޮށްފައި މިވަނީ އާއްމު އިންތިޚާބު ބާއްވަން ތައްޔާރުވަމުންދާ ދަނޑިވަޅެއްގައެވެ.
އެންމެ ގިނަ ކާރުގައި ރޯކޮށްލާފައިވަނީ ސުވިޑަންގެ ދެވަނައަށް އެންމެ ބޮޑު ރަށް ކަމުުގައިވާ ގޯތެންބާގުގެ 20 ހިސާބެއްގައި ހޯމަ ދުވަހުގެ ރެއެވެ.
ފުލުހުން ބުނީ ތުހުމަތުކުރެވޭ 16 އަހަރާއި 21 އަހަރާއި ދެމެދުގެ ބަޔަކު ގޯތެންބާގުގައި ހައްޔަރުކޮށްފައިވާ ކަމުގައެވެ. ފުލުހުން ބުނީ ލަފާކުރެވޭ ގޮތުގައި މިކަން ރާވާފައި ވަނި ސޯޝަލް މީޑިޔާގައެވެ. ކާރުތައް ރޯކޮށްގެން އެއްވެސް މީހަކަށް އަނިޔާ ވެފައި ނުވެއެވެ.
"މީގެ ކުރިން މިހާ ކާރުގައި ރޯކޮށްލާފައި ވަނިކޮށް އަހަރުންނަށް ދުވަހަކުވެސް ފެނިފައި ނުވޭ" ހުޅަނގު ސުވިޑަންގެ ފުލުހުންގެ ތަރުޖަމާނު ހާންޒް ލިޕެން އޭއެފްޕީއާ ވާހަކަދައްކަމުން ބުނެފައި ވެއެވެ.
ސުވިޑަންގައި ކާރުތަކުގައި ރޯކުރުމަކީ އާއްމުކޮށް ހިނގާ ކަމެކެވެ. ވެރިރަށް ސްޓޮކްހޯމުގެ އެހި ހިސާބުތަކުގައި މިފަދަ ހާދިސާތައް ކޮންމެ ދުވަހަކުހެން ހިނގައެވެ. އެހެންނަމަވެސް، މިއީ އެއްފަހަރާ މިހާ ގިނަ ކާރުގައި ރޯކޮށްލި ފުރަތަމަ ފަހަރެެވެ. މިކަން ގިނައިން ކުރަނީ ވަޒީފާއެއް ނެތި މަގުމަތީގައި އުޅޭ ޒުވާނުންނެވެ.
އިންތިޚާބުގެ ކެމްޕޭން ކުރިއަށްދާ ދުވަސްވަރެއްގައި މިކަން ހިނގުމުން ގިނަ ސިޔާސީ ބޭފުޅުން ގެންދަވަނީ މިކަމާ ނުރުހުން ފާޅުކުރައްވައި ވާހަކަދައްކަވަމުންނެވެ.
"ސުވިޑަން ދިގު މުއްދަތަކަށް މިކަން ތަހައްމަލްކޮށްފި. މިހާރު މިކަން ނިމުމަކަށް އަންނަންވެއްޖެ." އިދިކޮޅު ޕާޓީ ދަ މޮޑަރޭޓްސްގެ ލީޑަރު އުފްލް ކްރިސްޓެސަން ވިދާޅުވެފައި ވެއެވެ.
ފާއިތުވި 2017 ވަނަ އަހަރު ސުވިޑަންގައި 1457 ކާރުގައި ރޯކޮށްލާފައި ވާއިރު، 2016 ވަނަ އަހަރު 1641 ކާރުގައި ރޯކޮށްލާފައިވާ ކަމަށް ސުވިޑަންގެ ސިވިލް ކޮންޓެންޖީސް އެޖެންސީން ބުނެފައި ވެއެވެ.
