މުޅި އިދިކޮޅު ކޯލިޝަން ބިނާ ވެގެންވަނީ ރައްޔިތުން އެދޭ ކަންތައްތަކުގެ މައްޗަށް ކަމަށާއި އިދިކޮޅުގެ ވެރިކަމެއްގައި
ތަރައްގީގެ ނަމުގައި އިސްރާފު ނުކުރައްވާނެ ކަމަށް އިދިކޮޅު ޕާޓީތަކުގެ ރިޔާސީ ކެންޑިޑޭޓުގެ ރަނިންމޭޓް ފައިސަލް ނަސީމް ވިދާޅުވެއްޖެއެވެ.
އަރިއަތޮޅު ދެކުނުބުރީ އަށް ކުރައްވަމުން ގެންދަވާ ކެންޕޭން ދަތުރުފުޅެއްގައި މަންދޫއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވާ، ފައިސަލް ވިދާޅުވީ، މުޅި ކޯލިޝަން ބިނާ ވެގެންވަނީ ރައްޔިތުން އެދޭ ގޮތަށް ކަންކަންކުރުމުގެ މައްޗަށް ކަމަށެވެ. އެހެންކަމުން އެއްވެސް މީހެއްގެ ޚިޔާލާއި ލަފާ ކޯލިޝަނުން ބާކީވެގެން ނުދާނެ ކަމަށް ވެސް ވިދާޅުވިއެވެ. ހުރިހާ ރައްޔިތުންގެ އަޑުއެހުމަކީ މުހިންމު ކަމެއް ކަމަށާއި ކޯލިޝަންގެ ވިސްނުންހުރީ ރައްޔިތުން ބޭނުންވާ ކަންކަމަށް އިސްކަން ދިނުމަށް ކަމަށް ވެސް ފައިސަލް ވިދާޅުވިއެވެ.
މީގެ ކުރިން ވަނީ ރައްޔިތުން ބޭނުން ނުވާ ކަންތައްތައް ކުރުމަށް ސަރުކާރުން މަސައްކަތް ކޮށްފައި ކަމަށް އޭނާ ވިދާޅުވިއެވެ. އެހެންނަމަވެސް ގުޅިފައިވާ ޕާޓީތަކުގެ ސަރުކާރުގައި ރައްޔިތުންގެ ޚިޔާލާއެކު ރައްޔިތުން ބޭނުންވާކަންކަން ކޮށްދޭނެ ކަމަށް ވިދާޅުވިއެވެ.
އިސްރާފު ކުރުމަކީ އެބޭފުޅުންގެ ސަރުކާރުގައި ނުކުރައްވާނެ ކަމެއް ކަމަށާއި އެއީ އެބޭފުޅުން ދެނެވަޑައިގަންނަވާ ކަމެއް ނޫންކަމަށް ވެސް ވިދާޅުވިއެވެ. އަދި އެއްވެސް ބަޔަކު އިސްތިސްނާ ނުކުރައްވައި މުޅިގައުމަށް ތަރައްގީ ގެނެސްދެއްވާނެ ކަމަށްވެސް ފައިސަލް ވިދާޅުވިއެވެ.
