ސްރީލަންކާގައި މަރުގެ އަދަބު ދިނުން އަލުން ފެށުމަށް ރައީސު މައިތުރިޕާލާ ސިރިސޭނާ ނިންމެވުމާ ގުޅިގެން އެގައުމުގެ ޖަލުތައް ބަލަހައްޓާ އިދާރާއިން ދަންޖައްސާނެ މީހަކު ހޯދަން ފަށައިފިއެވެ.
ޖަލުތަކުގެ ތަރުޖަމާނު ތުޝާާރާ އުޕުލްދެނިޔާ ބުނި ގޮތުގައި، ޑްރަގް އެތެރެކުރާ މީހުން އުމުރަށް ޖަލަށް ލުމުގެ ބަދަލުގައި މަރުގެ އަދަބުދޭން ރައީސު ސިރިސޭނާ ނިންމެވުމާ ގުޅިގެން، ދަންޖައްސާނެ މީހަކު ހޯދަން ވަރަށް އަވަހަށް އިއުލާންކުރާނެއެވެ.
ސްރީލަންކާގައި 1976 ގެ ފަހުން މީހަކަށް މަރުގެ އަދަބު ދީފައި ނުވެއެވެ. މީހުންމެރުމާއި، ރޭޕްކުރުމާއި، މަސްތުވާ ތަކެތި އެތެރެކުރުން ފަދަ ބޮޑެތިކުށްތަކުގައި އާއްމުކޮށް މަރުގެ ހުކުމް އިއްވާފައި ވީނަމަވެސް އެ ހުކުމް އުމުރަށް ޖަލަށްލުމަށް ލުއިކޮށްލަނީއެވެ. ޖަލުގައި ރަސްމީކޮށް ދަންޖައްސާ މީހެއްގެ މަގާމު އަދިވެސް އޮތްނަމަވެސް، އެމަގާމުގައި ތިބި ތިން މީހުންވެސް 2014 ވަނަ އަހަރު މަގާމު ދޫކޮށް ދިއުމާ ގުޅިގެން އެމަގާމުގައި މިހާރު އެއްވެސް މީހަކު ނެތެވެ.
އޭއެފްޕީއާ ވާހަކަ ދައްކަމުން އުޕުލްދެނިޔާ ބުނި ގޮތުގައި "ކުރިން ތިބި އެންމެން ވަޒީފާ ދޫކޮށްލާފައި ދިޔައީއެވެ." އޭނާ އިތުރަށް ބުނިގޮތުގައި "މީހުންނަށް މަރުގެ އަދަބުދޭން ފަށަން ސަރުކާރުން މިހަފުތާގައި ނިންމުމާ ގުޅިގެން ދަންޖައްސަން ތައްޔާރަށް އަހަރުމެން ތިބެން ޖެހޭނެވެ."
އޭނާ ބުނި ގޮތުގައި އެ މަގާމަށް ހޮވޭ މީހަކަށް މަހަކު 35000 ރުޕީސް (220 ޔޫއެސް ޑޮލަރު) ގެ މުސާރައެއް ލިބޭނެއެވެ.
މަސްތުވާ ތަކެއްޗާ ދެކޮޅަށް ކުރާ މަސައްކަތް އިތުރުކޮށްފައި ވާއިރު، މަސްތުވާތަކެތި އެތެރެކޮށް ވިއްކުމުގެ ކުށް ތަކުރާރުކޮށް ސާބިތުވާ މީހުންނަށް މަރުގެ އަދަބު ދެވޭނެ ކަމުގައި ރައީސު ސިރިސޭނާ ވަނީ ފާއިތުވި ހަފުތާތެރޭގައި ވިދާޅުވެފައެވެ. ސިރިސޭނާ ވިދާޅުވީ "މަރުގެ ހުކުމް ތަންފީޒު ކުރުމު އަމުރުގައި ސޮއިކުރަން ތައްޔާރު" ކަމުގައެވެ. އަދި މަސްތުވާ ތަކެތި ވިއްކާ މީހުން ހައްޔަރުުކުރަން ސިފައިން ބޭނުންކުރުމަށްވެސް ތައްޔާރަށް ހުންނެވި ކަމުގައެވެ.
"މަސްތުވާ ތަކެތި އެތެރެކޮށް ވިއްކުމުގެ ކުށް ސާބީތުވާ މީހުންގެ ހުކުމް ލުއިކުރުމުގެ ބަދަލުގައި، ދެން އަހަރުމެން އެމީހުން ދަންޖައްސާނީ" ސަރުކާރުގެ ތަރުޖަމާނު ރަޖިތު ސެނަރަތުނޭ ބުންޏެވެ. "އަހަރުމެންނަށް ޚަބަރު ލިބުނު ގޮތުގައި ސިފައިން ބޭނުންކޮށްގެން މަސްތުވާތަކެތި ކޮންޓުރޯލު ކުމުގައި ފިލިޕީންސް ވަނީ ކާމިޔާބު ހޯދާފައި، އަހަރުމެން އެމީހުން ކުރި ގޮތަށް އެކަން ކުރަން ބޭނުން" އޭނާ އިތުރަށް ވިދާޅުވިއެވެ.
ޖަލުގެ ތަރުޖަމާނު އުޕުލްދެނިޔާ ބުނި ގޮތައި، މަރަން ޖެހޭ މީހުންގެ ލިސްޓުގައި 373 މީހުން އެބަތިއްބެވެ. އޭގެ ތެރޭގައި މަސްތުވާތަކެތީގެ އެންމެ ނުރައްކާތެރި 18 މީހުން އެބަތިއްބެެވެ.
