ފަލަސްޠީނުގެ ރައްޔިތުންނަށް ބައިނަލްްއަގުވާމީ ގޮތުން ހިމާޔަތް ދިނުމާބެހޭ ގަރާރު އދ. ގެ އާއްމު މަޖިލީހުގެ ބޮޑު އަޣުލަބިއްޔަތަކުން ފާސްކޮށްފިއެެވެ.
ޢަރަބި ގްރޫޕުގެ ފަރާތުން އަލްޖީރިޔާ (އަލްޖަޒާއިރު)، އޯއައިސީ މެންބަރުންގެ ގުރޫޕުގެ ފަރާތުން ތުރުކީ އަދި އދ. ގައި އޮބްޒާވަރެއްގެ ދަރަޖަ ލިބިފައިވާ ފަލަސްޠީނު ގުޅިގެންް ހުށަހެޅި ގަރާރަށް އިއްޔެ އާއްމު މަޖިލީހުގައި ވޯޓުލީއިރު، 120 ގައުމު ވަނީ ގަރާރު ފާސްކުރުމަށް ވޯޓު ދީފައެވެ. އިދިކޮޅަށް ވޯޓު ދިނީ 8 ގައުމަކުންނެވެ. ވަކި ފަރާތަކަށް ނުޖެހި 45 ގައުމެއް ތިއްބެވެ. އެއީ މައިގަނޑު ގޮތެއްގައި ލެޓިން އެމެރިކާއާއި ޔޫރަޕުގެ ގައުމުތަކެވެ.
ހަމާސް ކޮށްވެރިކޮށް، ހަމަނުޖެހުން އުފެއްދުމާއި، އުދުވާނީ އަމަލުތަކަށް ހިތްވަރުދިނުމާއި، ރޮކެޓް ފޮނުވުމާއި، ކަރްމް ޗެކް ޕޮއިންޓަށް ހަމަލާދީ އިންސާނީ އެހީ ފޯރުކޮށްދިނުމަށް ހުރަސްްއެޅުމުގެ މަސްއޫލިއްޔަތު އެޖަމާއަތުން އުފުލަން ޖެހޭނެކަމަށް ބުނާ އިސްލާހެއް އެގަރާރަށް ގެންނަން އެމެރިކާ މަސައްކަތް ކުރިނަމަވެސް އެކަން ވީ ނާކާމިޔާބެވެ.
17 މާއްދާއެއްގެ މައްޗަށް އެކުލެވިގެންވާ މި ގަރާރުގެ ހަތް ވަނަ މާއްދާ ބުނާ ގޮތުން، އިސްރާއީލުން ގަދަބާރުން އަތްގަަދަކޮށްފައިވާ ހުޅަނގު އައްސޭރިއާއި ޣައްޒާގައި ދިރިއުޅޭ ފަލަސްޠީނު ރައްޔިތުންނަށް ހިމާޔަތާއި ރައްކާތެރިކަން ލިބިދޭނެ ފިޔަވަޅުތައް އަޅަން ޖެހެއެވެ.
ހުރިހާ ފާރަތަކުން ބައިނަލްއަގްވާމީ ގާނޫނުތަކަށް ހުރުމަތްތެރިކޮށް ހިތުމަށާާއި، މަދަނީންގެ އިންސާނީ ހައްގުތައް ރައްކާތެރިކުރުމަށާއި، ސަލާމަތީ މަޖިލީހުން މަދަނީންނަށް ސަލާމަތްތެރިކަމާއި، ހަމަޖެހޭ ދިރިއުޅުމެއް ހޯދައިދިނުމަށް ގަރާރުގައި ގޮވާލާފައި ވެއެވެ.
އަދި އިންސާނީ ޚިދުމަތާއި ސިއްހީ ޚިދުމަތް ފޯރުކޮށްދޭ ފަރާތްތަކަށް އެހީތެރިކަން ފޯރުކޮށްދީ އެކަމަށް މަގު ފަހިކުރުމަށްވެސް ގަރާރުގައި ގޮވާލާފައި ވެއެވެ.
އެމެރިިކާގެ ވީޓޯގެ ސަބަބުން ސަލާމަތީ މަޖިލީހުގައި އިސްރާއީލުން ހިންގާ އުދުވާނާ ދެކޮޅަށް އެެއްވެސް ގަރާރެއް ފާސް ނުވިޔަސް، އދ. ގެ އާއްމު މަޖިލީހުގައި ނަގާ ކޮންމެ ވޯޓެއް ބޮޑު ތަފާތަކު ފަލަސްޠީނު ކާމިޔާބުކުރާތީ، ދުނިޔެ އޮތީ ފަލަސްޠީނާއެކު ކަން ރަނގަޅަށްވެެސް ހާމަވެގެން ދެއެވެ.
