ރައީސު އެރްދޮޣާން ރިޔާސީ ތިންވަނަ ދައުރަކަށް ހުވައިކުރައްވައިފި

ތުރުކީގެ ރައީސު ރަޖަބް ޠައްޔިބް އެރްދޮޣާން އިއްޔެ މަގާމުގެ ހުވައިކުރައްވައި ތިންވަނަ ރިޔާސީ ދައުރެއް ފައްޓަވައިފިއެވެ. އޭނާ މަގާމުގެ ހުވައި މިކުއްވީ ފާއިތުވި މޭ މަހު އެ ގައުމުގައި ބޭއްވި ރިޔާސީ އިންތިޚާބުގެ ދެވަނަ ބުރު %52.18 އާއެކު ކާމިޔާބުކުރައްވާފައެވެ.

އުމުރުފުޅުން 69 އަހަރުފުޅުގެ އެރްދޮޣާން ވަނީ 2014 ވަނަ އަހަރު ރައީސުކަމަށް ހޮވިވަޑައިގަތުމުގެ ކުރިން 2003 އިން 2014 އަށް އެގަމުގެ ބޮޑުވަޒީރުކަންވެސް ކުރައްވާފައެވެ. މިއާއެކު އޭނާ ވެވަޑައިގެންފައި ވަނީ މިޒަމާނުގެ ތުރުކީގައި އެންމެ ގިނަދުވަހު ވެރިކަން ކުރައްވާ ބޭފުޅާއަށެވެ.

"އަހުރެން ރައީސުގެ ގޮތުގައި ހުރެ، ޝަރަފުވެރިކަމާ، އަބުރުވެރިކަމާއެކު، މި މަތިވެރި ގައުމު ތުރުކީގެ ކުރިމަތީގައި ހުވައި މިކުރަނީ، މިގައުމު ދަމަހައްޓައި، ދައުލަތުގެ އިސްތިގުލާލު ރައްކާތެރިކުރުމަށް.... އަދި ވަކި ފަރާތަކަށް ނުޖެހި އަހުރެންގެ މަސްއޫލިއްޔަތު އަދާކުރުމަށް." ހުވައިކުރެއްވުމަށް ފަހު ގާނޫނުހަދާ މަޖިލީހުގައި ވާހަކަފުޅުދައްކަވަމުން އެރްދޮޣާން ވިދާޅުވިއެވެ.

"އަހަރުމެން ކުރިޔަށް ދާނީ ސިޔާސީ ޚިޔާލަށް، ނަސްލަށް، ދީނަށް ބެލުމެއް ނެތި ހުރިހާ އެންމެން ގޮވައިގެން." އޭނާ ވިދާޅުވިއެވެ.

85 މިލިއަން މީހުންގެ އާބާދީއެއް އޮތް ތުރުކީއަކީ ސަރަހައްދުގައި ނަގާކިޔާ ބާރުގަދަ ގައުމަކަށް ހެދުމުގައި ރައީސު އެރްދޮޣާން ވަނީ ބޮޑު ދައުރެއް އަދާކުރައްވާފައެވެ. ނޭޓޯ (ނޯތު އެޓްލާންޓިން ޓްރީޓީ އޮގަނައިޒޭޝަން) ގެތެރޭގައި އެމެރިކާ ފިޔަވައި ސިފައިންގެ އެންމެ ބޮޑު ލަޝްކަރު އޮތް ގައުމެވެ. ސީރިޔާ (ސޫރިޔާ) ގެ 3.7 މިލިއަން ރެފިއުޖީންނަށް އެގައުމުން މެހްމާންދާރީ އަދާކުރާއިރު، ޔުކްރޭން ހަނގުރާމައިގެ ސަބަބުން ދުނިޔެއަށް ގޮދަން ބޭރުކުރެވޭނެ މަގު ބަންދުވުމުން، އެރްދޮޣާން ވަނީ ޔުކްރޭންގެ ގޮދަން ދުނިޔޭގެ ގައުމުތަކަށް ބޭރުކުރުމާ ބެހޭ އެއްބަސްވުމަށް މަގުފަހިކުރައްވާފައެވެ.

ރައީސުކަމުގެ ހުވައިކުރެއްވުމަށް ފަހު އެކުލަވާލި ކެބިނެޓަކީ، އޭނާގެ ކުރީ ދައުރުގެ ކެބިނެޓާ މުޅިން ތަފާތު ކެބިނެޓެކެވެ. ކުރީ ދައުރުގެ ވަޒީރުންގެ ތެރޭން މަގާމު ބަދަލުނުވަނީ ހެލްތު މިނިސްޓަރު ފަޚްރުއްދީން ޚޯޖާއާއި ކަލްޗާ އެންޑް ޓޫރިޒަމް މިނިސްޓަރު މުޙައްމަދް ނޫރީ އެރްސޯއީގެއެވެ.

ދިގުމުއްދަތަކަށް ޚާރިޖީ ވަޒީރުކަން ކުރެއްވި މައުލޫދު ޖާވިޝްއޮގްލޫއަށް އެމަގާމު ގެއްލިފައިވާއިރު، އެ މަގާމަށް މިހާރު ވަޑައިގަތީ ނޭޝަނަލް އިންޓެލިޖެންސް އޮގަނައިޒޭޝަން (އެމްއައިޓީ)ގެ ކުރީގެ ވެރިޔާ ހަކާން ފިދާންއެވެ.