ސޫދާނުގެ ރެޕިޑް ސަޕޯޓް ފޯސްއިން ސިފައިންނާ ދެކޮޅަށް ހަނގުރާމަ ފަށައިފި

ސޫދާނުގައި އަސްކަރީ ވެރިކަމެއް ކުރަމުންދާ އެގައުމުގެ ސިފައިނާ ދެކޮޅަށް ޕެރެ މިލިޓަރީ ބާރެއް ކަމުގައި ރެޕިޑް ސަޕޯޓް ފޯސް (އާރްއެސްއެފް) އިން ނުކުތުމާ ގުޅިގެން ދެ ފަރާތުގެ ދެމެދުގައި ގައުމުގެ އެކިކަންކޮޅުތަކުގައި ކުރިމަތިލުންތައް ހިނގަމުން އެބަދެއެވެ. އަސްކަރީ ދެބާރުގެ ކުރިމަތިލުމުގެ ތެރޭގައި 50 އަށްވުރެ ގިނަ މީހުން މަރުވެ 600 އެއްހާ މީހުން ވަނީ ޒަޚަމްވެފައެވެ. މަރުވެ ޒަޅަމްވި މީހުންގެ ތެރޭގައި ހަނގުރާމަކުރާ ސިފައިންވެސް ހިމެނެއެވެ.

އާރްއެސްއެފުން ބުނަނީ އެމީހުން ބާރުތަކުން ރިޔާސީ ގަނޑުވަރާއި، ސިފައިންގެ އެންމެމަތީ ވެރިޔާގެ ގެކޮޅާއި، ވެރިރަށް ޚުރްޠޫމްގެ އެއާޕޯޓާއި، ސަރުކާރު ޓީވީއާއި، އުތުރުގެ މަރްވީގައި އޮންނަ އެއާޕޯޓު ހިފާފައިވާ ކަމުގައެވެ. އެހެންނަމަވެސް، ވެރިކަމުގައި ތިބި ސިފައިން ވަނީ މިކަން ދޮގުކޮށްފައެވެ. އަދި މުސްތަގިއްލު ފަރާތަކުން މިކަން ކަށަވަރު ކުރެވޭ ގޮތް ވަނީ ނުވެފައެވެ.

ސޫދާނުގެ އަސްކަރިއްޔާގެ ދެބައިގެ ދެމެދުގައި ވަރުގަދަ ކުރިމަތިލުމެއް ފެށިފައި މިވަނީ ސޫދާން އަލުން މަދަނީ ވެރިކަމަކަށް ބަދަލުކުރުމާ ގުޅޭ ވާހަކަތައް ދެކެވެމުން ދަނިކޮށެވެ.

އެކުވެރި ދައުލަތައް (އދ.) ގެ ސެކްރެޓަރީ ޖެނެރަލް އެންޓޯނިޔޯ ގުޓަރޭޝް ވަނީ މި ތަޅައިފޮޅުން ވަރަށް ބޮޑަށް ކުށްވެރިކުރައްވައި، ސޫދާނުގައި ކުރިއަށްދާ ހަމަނުޖެހުން ވަގުތުން ހުއްޓާލުމަށް ގޮވައިލައްވާފައެވެ. މީގެ އިތުރަށް އެމެރިކާއާއި، ސައޫދީ އަރަބިއްޔާއާއި، ޔުނައިޓެޑް އަރަބް އެމިރޭޓްސް އިންވެސް ވަނީ އެއްވެސް ޝަރުޠަކާ ނުލައި ވަގުތުން ތަޅައިފޮޅުން ހުއްޓާލައި ވާހަކަދައްކައިގެން ކަންކަން ހައްލުކުރުމަށް ގޮވައިލާފައެވެ.

އަސްކަރީ ކުރިމަތިލުމުގެ ސަބަބުން ނުރައްކަލަށް ހުށަހެޅިފައިވާ އާއްމުންގެ ހާލަތު ގާތުން ބަލައި، އެހީތެރިވުމަށް މަސައްކަތްކުރަމުންދާ ސޫދާން ޑޮކްޓާސް ޔުނިއަން (އެސްޑީޔޫ) އިން ނެރުނު ބަޔާނެއްގައި ވާގޮތުން ޚުރްޠޫމް އެއާޕޯޓު ސަރަހައްދާއި، ވެރިރަށާއިން އިންވެގެން އޮތް އުއްމުދުރްމާންއާއި، ކައިރީގައިވާ އަވަށްތައް ކަމުގައިވާ ނިޔާލާ، އަލްޢުބައިދް އަދި އަލްފާޝިރުގައި ހިނގި އަސްކަރީ ކުރިމަތިލުންތަކުގެ ސަބަބުން 56 މީހުން މަރުވެ 595 މީހުން ޒަޚަމްވެފައިވާ ކަމުގައެވެ.

އިއްޔެ ފެށުނު ކުރިމަތިލުންތައް މިއަދުވެސް ކުރިއަށް ދާއިރު، ވެރިރަށް ޚުރްޠޫމާއި، އެރަށާ އިންވެގެން އޮންނަ އުއްމުދުރްމާނުގެ އެކި ހިސާބުތަކުން ބޯ ދުން އަރާތަން ފެނެއެެވެ.

2021 ގެ އިންގިލާބަށް ފަހު އޮތް އިންތިގާލީ ވެރިކަން ނިމުމަކަށް ގެނެސް ސޫދާނުގެ ވެރިކަން މަދަނީ ޑިމޮކްރެޓިކް ވެރިކަމަށް ބަދަލުކުރުމަށް ކުރެވޭ މަސައްކަތުގައި ސިފައިންގެ ވެރިޔާ ޖެނެރަލް ޢަބްދުލް ފައްތާޙް ބުރްހާންއާއި އާރްއެސްއެފްގެ ވެރިޔާ ޖެނެރަލް ޢަބްދުލް ޙަމީދު ދަޤަލޫ (ޙަމީދަތީ)އާ ދެމެދު ބޮޑެތި ޚިޔާލުތަފާތުވުންތަކެއް ވަނީ އުފެދުމެެވެ. ދެ ފަރާތުގެ ދެމެދުގައި ހަނގުރާމަ ފެށިގެން އުޅެނީ މި ދެބަސްވުންތަކުގެ ތެރޭންނެވެ.