(30 މާރިޗު 2023 ގައި ޝާއިއުކުރި ބަޔާ ގުޅޭ)
އަޝްހަރު ރުޅިއައިސްފައިހުރިވަރުން ، ޚައިރާދުވެސް ކުރިމަތީހުރުމާއެކު ، އެއްޗެކޭ ބުނަން އަނގަހުޅުވާލާކަށް އަމްޖަދަކަށް ނުކެރުނެވެ. އެގަސް ގެނެސް އެތާނގައި ބެހެއްޓިތަން އޭނާ ނުދެކޭ ކަމުގައި ޚައިރާދު ބުންޏެވެ. އެއީ ދޮގެއްނޫނެވެ. އެކަމަކު ، އެގަސް ހުރިތަނުން އެހެންތާކަށް ގެންދަން އަމްޖަދުގާތު ބުނީ ޚައިރާދެވެ. އެގަސް އެތާ ބެހެއްޓިތަން ޚައިރާދަށް ނުފެނުނުނަމަވެސް ، ޚައިރާދަށް އަޞްލު އެހެދުނީ ދޮގެކެވެ.
އެވަގުތުން ފެށިގެން ޚައިރާދުގެ މޫނުމަތިން ކަންބޮޑުވުމުގެ އަސަރު ފެންނަން ހުއްޓެވެ. ރޭގަނޑު ކައިގެން ، ބޮޑުބޭބެއާ ދެމީހުން ވާހަކަ ދައްކާލަން ތިބިއިރުވެސް ، ބަޝީރަތުވެސް އެކަން ފާހަގަ ކުރިއެވެ. އެހެނަސް ، ބަޝީރަތުގާތުވެސް ޚައިރާދު އެވާހަކައެއް ނުބުނެއެވެ. ގެންފައިހުރި ބިރެއްގެ ބޮޑުކަމުންނެވެ. އަޝްހަރު އެމިންވަރަށްވެސް ރުޅިއައިސްހުރިތަން މީގެ ކުރިން ޚައިރާދަށް ފެނިފައެއް ނެތެވެ. ރޭގަނޑު ކައި ނިމިގެން ، ބަޝީރަތު ޚައިރާދަށް ގޮވައި އޭނާއާއެކު ގެންދިޔައެވެ. އެއީ ބަޝީރަތަށް އާދަވެފައިހުރި ކަމެކެވެ. އަޝްހަރަށް ޚައިރާދު ގޮވައިގެން އުޅެން އެނގި އާދަވަންދެން ، އަޝްހަރަށް ބަރޯސާކޮށް ، ބަޝީރަތުގެ އާދަ ދޫކޮށްލާކަށް ބަޝީރަތު ، އަދި ބޭނުމެއް ނޫނެވެ. އެކަމަކު ، ޙާލަތު ބަދަލުވަމުން އަންނަކަން ބަޝީރަތަށްވެސް އެނގެއެވެ. އަޝްހަރުގެ އަތްމައްޗަށް ޚައިރާދު މުޅިން ދޫކޮށްލަންވީމަ ބަޝީރަތަށް އެނގޭނެއެވެ.
ފޫހިވެފައި ޓީވީބަލަން އަޝްހަރު އިނެވެ. އެއްފަހަރު ޓީވީ ނިއްވައިލާނެއެވެ. އަނެއްކާ ދިއްލައިލާނެއެވެ. އަޝްހަރު އެއިންނަނީ ، ބައްޕަ ، ޚައިރާދު ގޮވައިގެން ދިޔައިމަ ، ބައްޕައާ ދެމީހުން އަނގަތަޅާ ނިމިގެން ޚައިރާދު އަންނާނެ ވަގުތަކަށް އިންތިޒާރު ކޮށްގެންނެވެ. އެތައް އިރެއްފަހުން ، ޚައިރާދު އައިސް އަޝްހަރުގެ ކުރިމަތީ ހުއްޓިލިއެވެ.
ތިމަންނަގެ ޝަކުވާ ބައްޕަގާތުކޮށް ނިމުނީތޯ ސުއާލުކޮށް ، އަޝްހަރު ޝަކުވާ ކުރިއެވެ. އޭރުވެސް ، ހެނދުނުއްސުރެ އަޝްހަރަށް ފެންނަމުން އައި ނުތަނަވަސްކަން ، ޚައިރާދުގެ މޫނުމަތީން ފެންނަން ހުއްޓެވެ. އަޝްހަރުގެ އެއްވެސް ޝަކުވާއެއް ، ބައްޕަގާތު ނުކުރާކަމަށް ޚައިރާދު ބުންޏެވެ. އޭގެ ބަދަލުގައި އަޝްހަރަށް އޭނާކުރީ ތަޢުރީފުކަމުގައި ބުންޏެވެ.
" ކަމެއްދިމާވީ ހެއްޔެވެ ؟ ހެނދުނުއްސުރެ ޚައިރާދުގެ މޫނުމަތިން ފެންނަންފެށި ނުތަނަވަސްކަން އަދިވެސް ނުފިލާ އެބަހުއްޓެވެ. ބުނެބަލާށެވެ ! ކިހިނެއްވީ ހެއްޔެވެ ؟ " އަޝްހަރު ސުއާލު ކުރިއެވެ.
އަޝްހަރުގެ ސުއާލަށް އެތައް ފަހަރަކު މިހާރު އެއްޖަވާބެއް ، ޚައިރާދަށް ދެވިއްޖެއެވެ. ކަމެއް ނުވެއޭ ބުނެއެވެ. އެކަމަކު އަޝްހަރު ، އޭނާގެ ސުއާލު އެކުރަނީ ކަމެއްވެގެން ނޫންހެއްޔެވެ ؟ އަޝްހަރަށްވެސް ކަމެއް ފާހަގަ ކުރެވިގެންނޫން ހެއްޔެވެ ؟ އެންމެފަހުން ، ޚައިރާދަށް މާބޮޑަށް އުނދަގޫވެގެން އަޝްހަރާ ގާތަށް ޖެހިލައި ކުރިމަތީ އިށީނދެ ، ވާހަކައެއް ބުނަން ބޭނުންވާކަމުގައި ބުނެ އޭނާގެ ވާހަކަ ފެށްޓިއެވެ.
ހެނދުނު އެގަސް ، އަތްވަށް ނެރެން އަމްޖަދުގާތު ބުނީ އަހަރެންނެވެ. އަހަރެންނަކަށް ގަސްގަހާބެހޭ އެއްވެސްކަމެއް ނޭނގެއެވެ. އެއްވެސް މަޢުލޫމާތެއް ނޭނގިހުރެ ، ގަހަށް ގޮތްގޮތް ހަދައިގެން ނުވާނެކަން އަހަރެންނަށްވެސް އެނގެއެވެ. އެހެނަސް ، އަވީގައި ބަހައްޓަންޖެހެނީ ކޮންކަހަލަ ގަހެއްކަމެއް ނޭނގެއެވެ. އަދި އަވިނިވާވާ ގޮތަށް ބަހައްޓަންޖެހެނީ ކޮންކަހަލަ ގަހެއްކަމެއްވެސް އަހަރެންނަކަށް ނޭނގެއެވެ. ނޭނގިހުރެ އަހަރެންނަށް އެއޮތީ ކޮށްގެން ނުވާނެ ކަމެއްކުރެވިފައެވެ. އެގަސް އަތްވަށްލީ މީހަކު ނޭނގޭކަމަށް ، އަޝްހަރުގާތު ، އަހަރެންނަށް ހެނދުނު ބުނެވުނީ ، އަޝްހަރު ރުޅިއައިމަ ، އަހަރެން ބިރުގެންފައިހުރިލެއް ބޮޑުކަމުންނެވެ. އަހަރެންނަށް އެއޮތީ ދޮގެއް ހެދިފައެވެ. އެއީ ، އަހަރެން ކޮށްގެންވާނެކަމެއްނޫނެވެ. އަހަރެންނަށް މަޢާފު ކުރާށެވެ. ހެނދުނުއްސުރެ އަހަރެން މިހުންނަނީ އެކަމާ ކަންބޮޑުވެފައެވެ. ކިތަންމެ ކުޑަނަމަވެސް ، ދޮގެއްވާނީ ދޮގަކަށެވެ. އެވާހަކަ އަހަރެން ބުނާނީ ކާކުގާތުގައި ހެއްޔެވެ ؟ ދޮގެއްހަދައި ނިދަން އަރައި ، އަހަރެންގެ ލޮލަކަށް ނިންޖެއް ނުއަންނާނެއެވެ. އަހަރެންގެ ބައްޕަ ބުނެފައި ވެއެވެ.
" ދޮގުހަދަން ، ފުރަތަމަ ފަހަރު ވަރަށް ފަސޭހަ ވާނެއެވެ. އޭގެފަހުން ، އެދޮގު ފޫބައްދަން އެތައްދޮގެއް ހަދަން ޖެހޭނެއެވެ. އެދޮގުތައް މަތިމައްޗަށް ހެދުން އެއީ އިންސާނާއަށް ، މުޞީބާތަކަށް ވާނެއެވެ. އަދި ، ތެދު ހެދުން އެއީ ފުރަތަމަ ފަހަރު ވަރަށް އުނދަގޫ ކަމަކަށް ވާނެއެވެ. އެއަށްފަހު ، ތެދު ހެދުން އެއީ ފަހަރަކަށްވުރެ ފަހަރެއް ފަސޭހަކަމާއެކު ކުރެވޭ ކަމަކަށް ވެގެންދާނެއެވެ. " ބައްޕަގެ ބަސްތައް ޚައިރާދު އިއްވައިލިއެވެ. އަދި އިތުރަށް ބުންޏެވެ.
" ހެނދުނު އަހަރެންނަށް ހެދުނު ދޮގުމަތީގައި އޮވެ ، މިރޭ އަހަރެންނަކަށް ނުނިދޭނެއެވެ. އަހަރެންނަށް މަޢާފު ކުރާށެވެ ! އަޝްހަރު ރުޅިއައިސް ހުރީމަ އަހަރެން ބިރުގަތީއެވެ. ހަދާނެގޮތް ބޮޑުވީއެވެ. " ޚައިރާދު ބުންޏެވެ.
އަދިވެސް ތިހުރީ ބިރުންހޭ އަހައި އަޝްހަރު ، ޚައިރާދުގެ ދެއަތުގައި ހިފައިލިއެވެ. ޚައިރާދު އެހުރިހާ ވާހަކައެއް ދެއްކިއިރުވެސް ، ފުންވިސްނުމެއްގެ ތެރެޔަށް ގެއްލި ، ހިނިތުންވެފައި އަޝްހަރު އިނެވެ. ޚައިރާދުގެ ބިރުގެންފައިވާ ލޮލަށް ބަލަހައްޓައިގެން އިނދެ އަޝްހަރު ބުންޏެވެ.
" ޚައިރާދު ތިއީ ، ވަރަށް ހެޔޮލަފާ އަންހެން ކުއްޖެކެވެ. އަހަރެންގެ މުޅި ޢުމުރުގައިވެސް ، ތިހާ ޚުލްޤު ރަނގަޅު ، ހެޔޮލަފާ އަންހެންކުއްޖަކު ނުދެކެމެވެ. އަބަދުވެސް ތިގޮތުގައި ހުންނާށެވެ ! ތެދުވެރިކަން އެއްވެސް ޙާލެއްގައި ޚައިރާދާ ވަކިވެގެންދިޔަ ނުދޭށެވެ ! އެއީ ޚައިރާދުގެ ޠަބީޢަތުގައިވާ އަގުހުރި ، މާތް ސިފައެކެވެ. " އަޝްހަރު އޭނާގެ ވާހަކަ ނިންމައިލިއެވެ.
އަޝްހަރުގެ ވާހަކަތަކުން ، ޚައިރާދު ލަދުގަތެވެ. ޚައިރާދުގެ ދެތުންފަތަށް ރަކި ހިނިތުންވުމެއް ވެރިވިއެވެ. މަޑުމަޑުން ތެދުވެގެން ، ކޮޓަރިޔާ ދިމާއަށް ހިނގައިގަތް އިރުވެސް ، އަޝްހަރު އޭނާގެ އަތުން ދޫކޮށެއް ނުލައެވެ. ދެމީހުން ކޮޓަރިޔަށް ގޮސްވަނީ އެކީގައެވެ.
ހެނދުނު ހޭލައިގެން ، އަޝްހަރުގެ އާދައިގެމަތިން ، ގަސްތަކާ ކުޅެ ، ގަހަށް ފެންދީ ، ފަތްތައް ރީތިކޮށްލުމަށް ބަގީޗާތެރޭ ގަސްމުށިތަކެއްކައިރީގައި އިނެވެ. ފަރި ހިނގުމެއްގައި ޚައިރާދު އައިސް ، އަޝްހަރަށް ޖޫސްތަށްޓެއް ދިއްކޮށްލިއެވެ. ޖޫސްތަށީގައި ހިފައި އެތާ ވިނަގަނޑުމަތީ ، އަޝްހަރު ހަމަޖެހިލިއެވެ. ޚައިރާދު ޖޫސްތަށި ހިފައިގެން އައީތީ އަޝްހަރު ވަރަށް އުފާކުރިއެވެ. ޚައިރާދު ޖޫސްތަށި ނުގެނެސްދިނަސް ، އޭނާ އަމިއްލަޔަށް ގޮސްވެސް ޖޫސް ތަށްޓެއް ބޯލެވިދާނެއެވެ. އެކަމަކު ޚައިރާދުގެ އެ ޢަމަލުން ، އަޝްހަރުގެ ހިތް އުފާވީތަންފެނުމުން ، އެހާ ކުޑަކަމަކުން ، މާބޮޑަށް ޖަޒުބާތީ ވާކަށްނުވާނޭ ބުނެ ޚައިރާދު ސަމާސާ ކޮށްލިއެވެ.
އިންސާނާގެ ހަށިގަނޑުގެ ތެރޭގައި ދައުރުވާ އިޙްސާސްތަކާ ގުޅިފައި އެތައްކަމެއް ހުންނަކަމުގައި އަޝްހަރު ބުންޏެވެ. އިންސާނާއާ އަޅައިލާ ހެޔޮކޮށްހިތާތަން ފެނުނީމަ އެއިޙްސާސްތައް އުފަލަށް ބަދަލުވާނެއެވެ. އަޝްހަރު ، ފަތިހު ތެދުވެ ފާޚާނާއިން ނުކުތްއިރު ، އޭނާގެ ހެދުންތައްހުރީ ނަގައިދީފައެވެ. ނަމާދުކޮށް ނިމުނުތަނާ ، ހޫނު ސައިތަށްޓެއް ގެނެސްދިނެވެ. އެއީ ޚައިރާދު ، އޭނާއާ އަޅައިލާކަމުގެ ހެއްކެއްކަމަށާއި އެކަމާ ވަރަށް އުފާވިކަމުގައި އަޝްހަރު ބުންޏެވެ. އަދި ހުރިހާ އަނބިންވެސް އެމީހުންގެ ފިރިންނަށް އެވަރަށް ލޯބިން އަޅާލައި ، ޚިދުމަތް ކޮށްދޭނެނަމަ ކިހާ ރަނގަޅު ހެއްޔޭ ބުންޏެވެ.
" އެއީ އެހާ ޚާއްޞަކަމެއްނޫނެވެ. އެހުންނަނީ ކޮންމެ އަނތްބަކުވެސް ، އެމީހުންގެ ފިރިންނަށް އަދާކޮށްދޭންޖެހޭނެ ޚިދުމަތެވެ. " ޚައިރާދު ބުންޏެވެ.
އަޝްހަރަށް އެވާހަކަ ޤަބޫލެއް ނުކުރެވުނެވެ. އެއީ ހުރިހާ އަންހެނުން އެމީހުންގެ ފިރިންނަށް އަދާކޮށްދޭނެ ޚިދުމަތެއްނޫންކަމުގައި އަޝްހަރު ބުންޏެވެ. އެމީހުންގެ ހަށިގަނޑުގައި ، ޚައިރާދުގެ އޮންނަ ކަހަލަ އިޚްލާޞްތެރި ހިތެއް ނުއޮންނާނެކަމުގައި ބުންޏެވެ. އަޝްހަރުގެ ތަޢުރީފްގެ ބަސްތަކުން ޚައިރާދު އިނީ ލަދުގަނެ މަޑުމޮޅިވެފައެވެ. އަޝްހަރު ޤަބޫލުކުރާގޮތުގައި އޭނާއަކީ ވަރަށް ނަސީބުގަދަ މީހެކެވެ. އަޝްހަރަށް ޚައިރާދު އެލިބުނީ ، އޭނާއަށް ކުރެވިފައިވާ ރަނގަޅު ކަންތައްތަކެއްގެ ބަދަލުގައެވެ. ﷲ ގެ ހެޔޮ ރަޙުމަތްފުޅެއްގެ ގޮތުގައެވެ. ހެޔޮއެދޭ އިޚުލާޞްތެރި ހިތަކުން އޭނާގެ މައްޗށް ކުރެވުނު ދުޢާއެއްގެ ރަޙުމަތެކެވެ.
އެދުވަހަކީ ، ސާރާގެ އުފަން ދުވަހެވެ. އަޝްހަރާއި ޚައިރާދު ، ނަލަހެދިގެން ސާރާގެ އުފަންދުވަހުގެ ޕާޓީއަށް ދިޔައެވެ. ޕާޓީގެ ތެރޭގައި ސާރާގެ ނަޒަރު ހުއްޓިފައި އޮތީ އަޝްހަރުގެ މައްޗަށެވެ. އަޝްހަރު އެތަނަށް އައުން އެއީ އުފަންދުވަހުގެ އެންމެ އަގުބޮޑު ހަދިޔާކަމުގައި ސާރާ ބުންޏެވެ.
ސާރާ އޭނާގެ ރަޙުމަތްތެރިންނަށް ޚައިރާދު ތަޢާރުފް ކޮށްދިނީ ، ފަޤީރު އަވަށްގަނޑަކުން ، ތަހުޒީބީ މުޖުތަމަޢަކަށް އައުމުގެ ނަސީބު ލިބުނު ރަށްފުށުގެ އަންހެން ކުއްޖެއްގެ ގޮތުގައެވެ. އަދި ވާނުވާއެއް ނޭނގޭ ޙާލެއްގައި ، ފިލްމުތަކުން ފެންނަގޮތަށް އަޝްހަރާ ކައިވެނި ކުރެވި ، އަރިހުރަހަށް ނަސީބު އައިސް ލައްވައިލި ، އަންހެންކުއްޖެއްގެ ގޮތުގައެވެ. އަޝްހަރުގެ ބައްޕަ މަޖުބޫރުކޮށްގެން ، ޚައިރާދާއި އަޝްހަރުގެ ކައިވެނި ކުރެވުނީކަމުގައިވެސް ސާރާ ބުންޏެވެ. ސާރާގެ ވާހަކަތަކުން ، ޚައިރާދަށް ލިބުނު ލަދުވެތިކަމާއި އޭނާގެ ތަޢާރުފުން ޚައިރާދުގެ ނިކަމެތިކަން ހާމަކޮށްދިންބަސްތަކަށް ޚައިރާދުހުރީ އިސް އުފުލައިލަން ނުކެރިފައެވެ. ސާރާގެ ރައްޓެހިންގެ ފަރާތުންވެސް ، ޚައިރާދާ ކުރިމަތިވީ ލަދުގަންނަފަދަ ސުއާލުތަކެވެ. މައިންބަފައިން ނިޔާވެ ، އެކަނިވެ ޔަތީމުވެފައިވާ އަންހެނެއްގެ ގޮތުގައި އެމީހުން ޚައިރާދު ސިފަކުރަމުން ގެންދިޔައެވެ.
އެމީހުންގެ ވާހަކަތަކުން ޚައިރާދު ލަދުގަންނުވަމުންދިޔައިރު ، ޚައިރާދާ ދިމާއަށް ބަލަހައްޓައިގެން ހިނިތުންވެފައި ، އަޝްހަރު ދުރުގައި ހުއްޓެވެ. އެތަނުގައި އެވާ ކަމެއްގެ ހިލަމެއް އަޝްހަރަކަށް ނުވެއެވެ. ޚައިރާދަށްވެސް އިރުއިރުކޮޅުން އަޝްހަރާ ދިމާއަށް ބަލައިލެވެއެވެ. އޭނާގާތަށް އަޝްހަރު އަންނަން ބޭނުންވެފައިހުރި ގޮތަކަށެވެ. ޕާޓީ ނިމިގެން ގެޔަށްދިޔަ މަގުމަތީ ، ޚައިރާދު ހަމަހިމޭންކަންމަތީ އިންތަން ފެނި ކޮފީއެއްބޯލަން ބޭނުންތޯ އަޝްހަރު ސުއާލު ކުރިއެވެ. ސާރާގެ ޢަމަލުތަކުންނާއި ވާހަކަތަކުން ، ޚައިރާދަށް ކޮށްފައިވާ އަސަރު ފޮރުވަން މަސައްކަތް ކުރިއެވެ. އަދި ، ތަންކޮޅެއް އަވަހަށް ނިދާލަން ބޭނުންކަމުގައި ޚައިރާދު ބުންޏެވެ. ސާރާގެ ޢަމަލުތައް ކޮންމެވެސް ވަރަކަށް އަޝްހަރަށްވެސް ފާހަގަ ކުރެވުނެވެ. ޚައިރާދަށް ޚާއްޞަ ސަމާލުކަމެއްދީގެން އުޅުނުކަން އެނގުނެވެ. އަޝްހަރު ޤަބޫލުކުރިގޮތުގައި އެދެމީހުންގެ މެދުގައި އެއޮތީ ވަރަށް ގާތްގުޅުމެކެވެ. ފަހަރެއްގައިވެސް ސާރާގެ ހިތް އޮތްގޮތަކާއި ، ޚައިރާދާމެދު ޢަމަލުކުރިގޮތް ގޯސްގޮތަކަށް އަޝްހަރަކަށް ނުނެގުނެވެ.
(ނުނިމޭ)
varahves reethi