ސްކޮޓިޝް ނޭޝަނަލް ޕާޓީ (އެސްއެންޕީ) ގެ ލީޑަރު ޙަމްޒާ ޔޫސުފް ސްކްޓްލޭންޑްގެ ފަސްޓް މިނިސްޓަރު (ބޮޑުވަޒީރު) ކަމުގެ ހުވައިކުރައްވައިފިއެވެ. އިނގިރޭސި އިއްތިހާދު، ޔުނައިޓެޑް ކިންގްޑަމްގައި ހިމެނޭ ތިން ގައުމު ކަމުގައިވާ ސްކޮޓްލޭންޑް، ވޭލްސް އަދި ނޯދަން އަޔަރލޭންޑުގެ ބޮޑުވަޒީރުންނަށް ކިޔަނީ ފަސްޓް މިނިސްޓަރއެވެ.
ޔޫރަޕްގެ ބޮޑު ސިޔާސީ ޕާޓީއެއްގެ ލީޑަރަކަށް ވެވަޑައިގަތް ފުރަތަމަ މުސްލިމަށް ވެވަޑައިގަތުމުގެ އިތުރުން އޭނާއަކީ އިނގިރޭސި އިއްތިހާދުގައި ހިމެނޭ ގައުމެއްގެ ބޮޑުވަޒީރުކަން ކުރައްވާ މުސްލިމް ފުރަތަމަ ބޭފުޅާއެވެ. އޭނާ މީގެ ދެދުވަސް ކުރިން އެސްއެންޕީގެ ލީޑަރުކަމަށް ހޮވިވަޑައިގަތީ، އެޕާޓީގެ ލީޑަރުކަމުގައި ހުންނެވީ ނިކޮލާ ސްޓާޖަން އެމަގާމުން އިސްތިއުފާދެއްވުމާ ގުޅިގެން ބޭއްވި އިންތިޚާބު ކާމިޔާބުކުރައްވައިގެންނެވެ.
ޕާކިސްތާނުން ސްކޮޓްލޭންޑަށް ހިޖުރަކުރި ޢާއިލާއަކަށް ނިސްބަތްވެވަޑައިގަންނަވާ އުމުރުފުޅުން 37 އަހަރުފުޅުގެ ޔޫސުފް ފަސްޓް މިނިސްޓަރުކަމުގެ ހުވައި ސްކޮޓްލޭންޑުގެ އެންމެ މަތީ ކޯޓު، ކޯޓް އޮފް ސެޝަންސްގައި ހުވައި ކުރެއްވިއިރު އޭނާ ހުންނެވީ ޕާކިސްތާނުގެ ހެދުމެއް ކަމުގައިވާ ޝޭރްވާނީއެއް ތުރުކުރައްވައިގެންނެވެ. އަދި އޭނާގެ ދަރިކަނބަލުންނާއެކު އެ މަންޒަރު ބައްލަވަން ކޯޓަށް ވަޑައިގެން އިންނެވި އޭނާގެ އަނބިކަނބަލުން ނާދިޔާ އައްނަކްލާއަކީ ފަލަސްޠީނު އާއިލާއަކަށް ނިސްބަތްވެވަޑައިގަންނަވާ ބޭފުޅެކެވެ.
ރަސްގެފާނު ޗާލްސް ދެވަނައަށް ވަފާތެރިވުމުގެ ހުވައިކުރެއްވުމަށް ފަހު ދެއްކެވި ވާހަކަފުޅުގައި އޭނާ ވިދާޅުވީ އޭނާގެ ހުވަފެންފުޅަކީ އިނގިރޭސި ރަސްކަންއުވާލައި އެގައުމުގައި އިންތިޚާބީ ވެރިކަމެއް ގާއިމުކުރުމާއި، ސްކޮޓްލޭންޑް އިނގިރޭސިވިލާތުން ވަކިކޮށް މިނިވަން ގައުމަކަށް ހެއްދެވުމެވެ.
ފަސްޓް މިނިސްޓަރުކަމުގައި ހުވައިކުރެއްވުމަށް ފަހު އޭނާ ވަނީ 9 ވަޒީރުންގެ ކެބިނެޓެއް އިއުލާންކުރައްވާފައެވެ. ކެބިނެޓްގައި ހިމެނިވަޑައިގަންނަވާ 6 ވަޒީރުންނަކީ އަންހެން ބޭފުޅުންނެވެ. އަދި މިއީ ސްކޮޓްލޭންޑުގެ ތާރީޚުގައި އަންހެނުންގެ އަޣުލަބިއްޔަތު އޮތް ކެބިނެޓެއް އެކުލަވާލެވުނު ފުރަތަމަ ފަހަރެވެ.
އޮންލައިން ނޫހެއް ކަމުގައިވާ 'ދަ ކޮންވަޒޭޝަން' އިން ފާހަގަކޮށްފައިވާ ގޮތުގައި ޙަމްޒާ ޔޫސުފް ސްކޮޓްލޭންޑުގެ ފަސްޓް މިނިސްޓަރުކަމަށް ވަޑައިގަތުމަކީ އިނގިރޭސިވިލާތަށް އަންނަމުންދާ ތާރީޚީ ބަދަލުތަކުގެ ސިލްސިލާއަށް އިތުރުވި ބޮޅެކެވެ. އިނގިރޭސި ބޮޑުވަޒީރުކަމުގައި މިހާރު ހުންނެވި ރިޝީ ސުނާކްއަކީ ހިންދޫ ބޭފުޅަކަށް ވާއިރު، އިނގިރޭސިވިލާތުގެ ބޮޑުވަޒީރު ކަމާއި، އިނގިރޭސިވިލާތުގެ ބައެއްގެ ގޮތުގައި ހިމެނޭ ގައުމެއްގެ ފަސްޓް މިނިސްޓަރުކަން ކްރިސްޓިއަން ނޫން ދެބޭފުޅުން ކުރެއްވުމަކީ ތާރީޚީ ކަމެއް ކަމުގައި އެ ނޫހުން ފާހަގަކޮށްފައި ވެއެވެ.
