ރަޝިޔާގެ ސުޚޯއީ އެސް-ޔޫ 35 މަރުކާގެ ހަނގުރާމަމަތީ މަތިންދާބޯޓު ގަންނަން ނިންމައި، މިކަމާގުޅޭ ގޮތުން ރަޝިޔާއާއެކު އެއްބަސްވުމަކަށް އާދެވިފައިވާކަމަށް އީރާނުން ބުނެފިއެވެ.
އެކުވެރި ދައުލަތްތަކުގެ ޖަމްއިއްޔާ (އދ.) އަން ކަނޑައަޅާފައި ހުންނަ މިޝަންއާ ހަވާލާދީ އީރާނުގެ ރަސްމީ ނިއުސް އެޖެންސީ (އިރްނާ) އިން ބުނި ގޮތުގައި، އެގަމުގެ ހަނގުރާމަތީ މަތިންދާބޯޓުތަކުގެ ފްލީޓް ޒަމާނީކުރުމަށް އެގައުމުން ތަފާތު ގައުމުތަކާ ވާހަކަދައްކާފައި ވެއެވެ.
"އެބޯޓުތައް ވިއްކަން ތައްޔާރަށް އޮތްކަން ރަޝިޔާއިން ވަނީ ހާމަކޮށްފައި." އދ.ގައި ހުންނަ އީރާނުގެ މިޝަނުން ބުނެފައި ވެއެވެ. އެ މިޝަނާ ހަވާލާދީ އިރްނާއިން ބުނެފައިވާ ގޮތުގައި އދ. ގެ ސަލާމަތީ މަޖިލީހުގެ ގަރާރު 2231 ގެ ދަށުން އީރާނަށް ހަތިޔާރުވިކުން މަނާކޮށްފައި އޮތް އޮތުން 2020 ވަނަ އަހަރު ވަނީ ނިމުމަކަށް އައިސްފައެވެ. އެހެންކަމުން އީރާރަށް ސުޚޯއީ މަތިންދާބޯޓު ގަތުމަށް ހުރަހެއް ނެތެވެ.
ރަޝިޔާއިން ގަތުމަށް އީރާނުން ނިންމާފައިވަނީ ކިތައް މަތިންދާބޯޓުކަމާ، މިއެއްބަސްވުމުގެ އަގަކީ ކިހާވަރެއްކަން އީރާނުން ހާމަކޮށްފައި ނުވާއިރު، ހަނގުރާމަމަތީ މަތިންދާބޯޓު ގަންނަން އެހެން ބައެއް ގައުމުތަކާއެކު އީރާނުން ވާހަކަދައްކަމުންދާ ކަމުގެ ޚަބަރުވެސް ވަނީ ފެތުރިފައެވެ.
ބައެއް މަސްދަރުތަކާ ހަވާލާދީ އިސްރާއީލުގެ ޚަބަރުފަތުރާ ބައެއް ވަސީލަތްތަކުން ކުރިން ބުނެފައިވާ ގޮތުގައި ރަޝިޔާއިން އީރާނަށް ސުޚޯއީ 24 މަތިންދާބޯޓު ވިއްކުން އެކަށީގެންވެއެވެ.
ރަޝިޔާއިން ޔުކްރޭނަށް އެރިފަހުން އީރާނާ ރަޝިޔާއާ ދެމެދު އަސްކަރީ ގުޅުން އިތުރަށް ބަދަހިވެފައިވާކަން ވަނީ ފާހަގަކުރެވިފައެވެ. އީރާނުގައި އުފައްދާ އަސްކަރީ ޑްރޯން ރަޝިޔާއަށް ވިއްކާފައި ވާއިރު، ސީއެންއެންއިން ޚަބަރު ދީފައިވާ ގޮތުގައި، ޔުކްރޭނުގަ ރަޝިޔާ ސިފައިން އަތުގައި ޖެހޭ އެމެރިކާގެ ހަތިޔާރު ރަޝިޔާއިން ދަނީ އީރާނަށް ފޮނުވަމުންނެވެ. އެމެރިކާން ގަބޫލުކުރާ ގޮތުގައި މިފަދަ ހަތިޔާރު ޓެކްނޮލޮޖީ ނަކަލުކޮށްގެން އީރާނުން އެފަދަ ހަތިޔާރު އުފެއްދުމަށް މަސައްކަތްކުރާނެއެވެ.
ރަޝިޔާ ސުޚޯއީ މަރުކާގެ މަތިންދާބޯޓުތަކަކީ އެމެރިކާގެ ހަނގުރާމަމަތީ މަތިންދާބޯޓުތަކާއި، އެއްހަމައެއްގައި ވާދަކޮށްލެވޭ، އަޑަށްވުރެ ބާރަށް ދަތުރުކުރާ، ޖައްވުން ޖައްވަށް އަދި ޖައްވުމަށް ބިމަށް ފޮނުވާ މިސައިލް އުފުލުމުގެ ގާބިލުކަން ލިބިފައިވާ، އެއްފަހަރާ 30 އަމާޒުހޯދައި، އޭގެތެރޭން 8 އަމާޒަށް އެއްފަހަރާ ހަމަލާދެވޭ ފެންވަރުގެ މަތިންދާބޯޓުތަކެކެވެ.
އިރާނުގެ ވައިގެ އަސްކަރިއްޔާގައި މިހާރު ހުރި މަތިންދާބޯޓުގެ ތެރޭގައި ރަޝިޔާގެ މިގް މަރުކާގެ މަތިންދާބޯޓާއި، ސުޚޯއީ މަރުކާގެ މަތިންދާބޯޓުގެ އިތުރަށް، ޗައިނާގެ އެފް- 7 މަރުކާގެ މަތިންދާބޯޓު ހިމެނެއެވެ. އަދި 1979 ވަނަ އަހަރުގެ އިސްލާމީ އިންގިލާބު ކުރިން އެމެރިކާއިން އީރާން ވިއްކާފައި ހުރި އެފް-4 އަދި އެފް-5 މަރުކާގެ މަތިންދާބޯޓު ހިމެނެއެވެ.
