އަސްލު ލިޔުއްވީ: ޑޮކްޓަރ މުޙައްމަދު ރިޒަލް އިސްލާމް ނަދުވީ
ފަހަކަށްއައިސް ދުނިޔޭގައިވަނީ މުޖްތަމަޢުގެ ރީތި އުސޫލުތަކަށް ގޮންޖަހައި ބަޣާވަތްކޮށްފައިވާ ހަޑިހުތުރު ޖިންސީ އެތަކެއް ރަވައްޔާތަކެއް ފެތުރި ޢާންމުވެފައެވެ. އަދި ކީއްތޯއެވެ؟ ނުބައި ނުލަފާ ރޭވުންތަކެއްގެ ޒަރީޢާއިން އެކަންތައް ގެންދަނީ ދުނިޔޭގައި ފަތުރައި ޢާންމުކުރަމުންނެވެ. އެކަމަށްޓަކައި ވެށި ތައްޔާރުކުރަމުންނެވެ. ޤާނޫނީގޮތުން އެކަންކަން ހުއްދަކުރެވޭނެ ހީލަތާއި ބަހަނާތައް ހޯދަމުންނެވެ. އޭގެތެރެއިން ހިމެނޭ ނުރައްކާތެރި ހަޑިހުތުރު އެއްކަމަކީ Homosexuality ގެ ނަންދީފައިވާ ފާފަވެރި ކުޅިއެވެ. މިނަމަކީ ދެކަލިމަޔަކުން އުފެދިފައިވާ ބަހެކެވެ. އޭގެތެރެއިން އެއްކަލިމައަކީ Homo އެވެ. ޤަދީމީ ގްރީކްބަހުގެ ލަފުޒެކެވެ. މާނައަކީ Same (އެއްގޮތް) އެވެ. އަނެއް ކަލިމައަކީ Sexus އެވެ. ލެޓިންބަހުގެ ލަފުޒެކެވެ. މާނައަކީ ޖިންސީ އެދުންފުއްދުމެވެ. މިދެ ކަލިމަ އެކުވެގެން އުފެދިފައިވާ Homosexuality އިން ދޭހަކޮށްދޭ މާނައަކީ މީހަކު އޭނާއަކީ ފިރިހެނަކު ކަމުގައިވިޔަސް އަންހެނަކު ކަމުގައިވިޔަސް ތިމާއާ އެއްޖިންސެއްގެ މީހަކާ ދިމާޔަށް ޖިންސީގޮތުން ހިތްލެނބި އެމީހެއްގެ ޒަރީޢާއިން ތިމާގެ ޝަހްވާނީ އެދުންފުއްދުމެވެ. ދިވެހި ބަސްފޮތުގައި މި މަފްހޫމު އަދާކުރުމަށް އޮންނަ ބަހަކީ "އެއްޖިންސުންއުޅުން" މިބަހެވެ.
އެއްޖިންސުންއުޅުމުގެ ފިކުރާއި ފަލްސަފާ
ފިޠުރަތުން ވަނީ އެންމެހައި މަޚްލޫޤުން ދިރިއުޅޭންވާގޮތުގެ އުޞޫލުތަކެއް އެކަށައަޅުއްވައިފައެވެ. އެ އުޞޫލު އެންމެހައި މަޚްލޫޤުންގެ ކިބައިގައި ވަދީޢާކުރައްވައިފައެވެ. އެހެންކަމުން ދުނިޔެ ފެށުނީއްސުރެ އަންނަނީ އެ ކަނޑައެޅިފައިވާ ފިޠުރީގޮތަށް ޢަމަލުކުރެވެމުންނެވެ. ފެށުނީއްސުރެ އިންސާނީ ނައުޢަށްވަނީ އޭނާގެ ފިކުރު ހިންގުމާއި ގޮތް އިޚްތިޔާރުކުރުމުގެ މިނިވަންކަން ދެއްވައިފައެވެ. ނަތީޖާއެއްގެގޮތުން ބައެއްމީހުންވަނީ އެބައިމީހުންގެ ދިރިއުޅުމުގައި ފިޠުރަތާ ޚިލާފު ގޮތްގޮތް އިޚްތިޔާރުކޮށްފައެވެ. ޙަޔާތުގެ އެހެނިހެން ދާއިރާތަކެކޭ އެއްގޮތަށް ޝަހްވާނީ އެދުންފުއްދުމުގައިވެސް ފިޠުރަތުން ކުރައްސަވައިދެއްވައިފައިވާ ޗާޓުން ބޭރުވެފައެވެ. ޞަދޫމީންގެ ފަހުން ތާރީޚުގެ ހުރިހައި ދައުރުތަކެއްގައިވެސް އެފަދަމީހުން ފެނެއެވެ. އެކަމަކު އެފަދަ މީހުނާމެދު މީހުން ބަލައިއުޅުނީ ނަފުރަތާއި ފޫހިކަމާއި ނިކަމެތިކޮށްލުމުގެ ނަޒަރުންނެވެ. އެފަދަ މީހުންގެ ޢަމަލާމެދު އެންމެންވެސް ރުޅިއާދެއެވެ. އެފަދަ މީހުންނަކީ އިންސާނީ ސަލާމަތް ފިޠުރަތާއި ލަޠީފު ޛައުޤަށްހުރި ބުރައެއްކަމުގައި ދެކެއެވެ. އެކަށީގެންވީ ހުރިހައި ރޮނގަކުން އެހުތުރު ޢަމަލާމެދު މީހުން ފޫހިކުރުވާގޮތް ހަދައެވެ. އެހެންކަމުން މީލާދީ ސަނަތުން ނަވާރަވަނަ ސައްތަޔާ ހަމަޔަށް ދުނިޔޭގެ ގާތްގަނޑަކަށް ހުރިހައި ޤައުމުތަކެއްގައިވެސް އެ ފާޙިޝު ޢަމަލާމެދު ބަލަމުންއައީ އަދަބުދޭންޖެހޭ ކުށެއްކަމުގައެވެ. ބައެއް ޤައުމުތަކުގައި އެކުށުގެ އަދަބަކީ މަރައިލުމެވެ. އުސްތަނަކުން ވައްޓައި މަރައިލުމެވެ. އަންދައިލުމެވެ.
ހުޅަނގުގައި އެތާނގެ ޚާއްޞަ ފަސްމަންޒަރުގައި އިމެއްނެތް މިނިވަންކަމުގައި ހިންގައިލެވުނު ހަމަހަމަކަމާއި ޝަޚްޞީ މިނިވަންކަމާއި އިންސާނީ ޙައްޤުތަކުގެ ނަމުގައި ބުރުއްސައިލި ނަގުލުވައިގެ ބާރުގައިވަނީ އިންސާނީ އިޖްތިމާޢީ އެތައް އަގުތަކެއްގެ ބިންގާ ގުޑުވައިލައިފައެވެ. ހުޅަނގުގެ މީހުން ބުނާންފެށިއެވެ. އިންސާނާ ހައްދަވައިފައިވަނީ މިނިވަނެއްގެ ގޮތުގައެވެ. އޭނާއަކީ އޭނާ ރުހޭގޮތަކަށް ޢަމަލުކުރެވޭނެ މީހެކެވެ. އޭނާގެ ބަހާއި ޢަމަލަށް އެއްވެސްކަހަލަ އިމެއް ކަނޑައެޅުމަކީ އޭނާގެ މިނިވަންކަން ނިގުޅައިގަތުމެވެ. އޭނާ ކުރާ އެއްވެސް ޢަމަލެއްގެ ސަބަބުން އޭނާއާ އެހެންމީހުނާ ތަފާތެއް ކުރުމަކީ އޭނާގެ ހަމަހަމަކަމުގެ ޙައްޤަށް އަރައިގަތުމެވެ. އެގޮތުން އެއްޖިންސުންއުޅުމާމެދު ހުޅަނގުން ބެލީ ޢަމަލެއް ކަމަކަށެއް ނޫނެވެ. ރަވައްޔާއެއް ކަމުގައެވެ. ނުވަތަ ދިރިއުޅުމުގެ ފާޑެއް ނުވަތަ ގޮތެއްކަމުގައެވެ. އެގޮތުން އެއްޖިންސުންއުޅުމަށްވަނީ ފަލްސަފީ ބިންގަލެއް ހޯދައިދީފައެވެ.
އެއްޖިންސުންއުޅޭ މީހުންވަނީ ހަތަރު ބަޔަކަށް ބަހައިލެވިފައެވެ.
1. Lesbian: އަންހެނާ. ޖިންސީގޮތުން އަންހެނުންނަށް ހިތްކިޔާ ނުވަތަ ޝައުޤުވެރިވާ.
2. Gay: ފިރިހެނާ. ޖިންސީގޮތުން ފިރިހެނުންނަށް ހިތްކިޔާ ނުވަތަ ޝައުޤުވެރިވާ.
3. Bisexual: ފަރުދެއް (އަންހެނަކަށްވިޔަސް ފިރިހެނަކަށްވިޔަސް) އަންހެނުންނަށްވެސް އަދި ފިރިހެނުންނަށްވެސް ހިތްކިޔާ ނުވަތަ ޝައުޤުވެރިވާ. މިފަދަ މީހުން ހިތްކިޔަނީ ކޮންޖިންސަކަށް ކިހައިވަރަކަށްތޯ މިންއަޅާނެ މިންގަނޑެއްވަނީ އެކުލަވައިލެވިފައެވެ. އެމިންގަނޑަށް ނަންދީފައިވަނީ އެ މިންގަނޑު އީޖާދުކުރި މީހާގެ ނަމަށް ނިސްބަތްކޮށް Kinsey Scale ގެ ނަމުންނެވެ.
4. Transgender: އެމީހެއްގެ ކިބައިގައި ފިރިހެންކަމާއި އަންހެންކަން ހުންނަ މީހުން. އެފަދަ މީހުންނަށް ޚުންޘާއިންނޭ ކިޔައެވެ.
މި ހަތަރު ބާވަތުގެ މީހުންނަށް ކުރުކޮށް ކިޔާނަމަކީ LGBT ންނެވެ. މި ހަތަރުބައިގައި ހިމެނޭ މީހުންނާމެދު ބަލައިފައިވަނީ އެއްޖަމާޢަތެއް ނުވަތަ އެއްކޮމިއުނިޓީއެއް ކަމުގައެވެ. އެބައިމީހުންގެ އިންފަހަނަޅައިފައިވާ ޖިންސީ ހިތްކިޔުމަކީ ފިޠުރީ ކަމެއްކަމުގައިވަނީ ކަނޑައަޅައިފައެވެ. އެފަދަ މީހުނާ އެއްކޮޅަށްވަނީ ތަޙްރީކުތައް ހިންގައިފައެވެ. އެބައިމީހުންނަށް ކަންފަހިކޮށްދީ ރައްކައުތެރިކަން ލިބޭގޮތަށްވަނީ ޤާނޫނުތައް ހަދައިފައެވެ.
ހުޅަނގުގެ ވަރުގަދަ މަސައްކަތް
ކުރީންވެސް ދެންނެވި ފަދައިން އެއްޖިންސުންއުޅުމުގެ ފާފަވެރި ޢަމަލާމެދު ޢާންމުންގެ މެދުގައިވެސް އިހަށްއޮތީ އިންތިހާދަރަޖައިގެ ނަފުރަތެވެ. އެންމެންވެސް ބަލަމުންއައީ އެކަމަކީ ހަޑިމުޑުދާރު ކަމެއްކަމުގައެވެ. ގޮތްކުޑަ ޢަމަލެއް ކަމުގައެވެ. ޤައުމުތަކުގެ ޤާނޫނުތަކުގައި އެކަމަށްވަނީ ހަރުކަށި އަދަބުތައް ކަނޑައަޅައިފައެވެ. އެހެންކަމުން މި ލަދުހުތުރު ޢަމަލުކޮށްއުޅޭ މީހުންނަކަށްވެސް އެކަން ފާޅުކުރާކަށެއް ނުކެރެއެވެ. އެކަން އޮންނަނީ ސިއްރެއްގެ ގޮތުގައެވެ. ނަމަވެސް މީލާދީން ނަވާރަވަނަ ސައްތައިގެ ފަހުކޮޅުން ފެށިގެން އެއްޖިންސުންއުޅޭމީހުންނަށް މޫސުން ރަނގަޅުވާން ފަށައިފިއެވެ. ވައިފަހިވާން ފަށައިފިއެވެ.
އެންމެފުރަތަމަ މަރްޙަލާގައިވަނީ އެއްޖިންސުންއުޅުން އަދަބުދޭންޖެހޭ ކުށުގެ ލިސްޓުން އުނިކޮށްފައެވެ. އެގޮތުން މީލާދީން ވިހިވަނަ ސައްތައިގެ ދެބައިން ކުރީބައިގައި ހުޅަނގުގެ ވަރަށްގިނަ ޤައުމުތަކުގެ ޤާނޫނުވަނީ ބަދަލުކޮށްފައެވެ. އެއްޖިންސުންއުޅުމުގެ އަދަބުވަނީ އުނިކޮށްފައެވެ. ދެވަނަ މަރްޙަލާގައި LGBT ގްރޫޕްތަކުންވަނީ ޢާންމު ފެންވަރުގައި އެވެރީންގެ ކަންތައް އިންތިޒާމުކުރާން ފަށައިފައެވެ. އެގޮތުން ކަނޑައެޅިފައިވާ ދުވަސްތަކެއްގައި ޢާންމު ތަންތާނގައި މުޒާހަރާކުރާން ފަށައިފިއެވެ. އެ މުޒާހަރާތަކަށް ދީފައިވަނީ Pride Parade ގެ ނަމެވެ. މުޒާހަރާތަކުގެ އިތުރަށް ކޮންފަރެންސްތައްވެސް ބާއްވަން ފަށައިފިއެވެ. މުޒާހަރާތަކާއި ކޮންފަރެންސްތަކުގެ ޒަރީޢާއިން އެބައިމީހުންގެ "ޙައްޤުތަކަށް" އެދި އަޑުއުފުލާން ފަށައިފިއެވެ. އެއްޖިންސުންއުޅޭމީހުންނާމެދު އެހައިތަނަށް ބެލެވިފައިވަނީ ސަރުކާރުގެ ދާއިރާއާއި އިންތިޒާމީ ދާއިރާތަކަށާއި، ޢަސްކަރީ މަޤާމުތަކަށް އަހްލުވެރިނޫން ބަޔަކުކަމުގައެވެ. އެކަމަކު އެއްޖިންސުންއުޅޭމީހުން ތޮށިގަނޑު ފަޅައިލައިފައިނުކުމެ ރޭވުންތެރިކަމާއެކު ކުރާންފެށި މަސައްކަތްތަކާއި އެއުރެންގެ ފިއްތުންތަކުގެ ސަބަބުން މަޑުމަޑުން އެބައިމީހުންގެ "ޙައްޤުތައް" ޤަބޫލުކުރެވޭން ފަށައިފިއެވެ. ހުރިހައި މަޤާމުތަކަކަށްވެސް އެބައިމީހުން އަހްލުވެރިކަމުގައި ބަލައިގަނެވިއްޖެއެވެ. އެހެންކަމުން ސަރުކާރުގެ ދާއިރާއާއި ޢަސްކަރިއްޔާއާއި، ފަނޑިޔާރުގެތަކާއި ޤާނޫނު ހެދުމުގެ ދާއިރާއާއި ހިންގުމުގެ ދާއިރާއާއި ހުރިހައި ސެކްޓަރތަކަކުންވެސް އެއްޖިންސުންއުޅޭކަމަށް ފާޅުގައި އެއްބަސްވެ ކުޑަވެސް ޖެހިލުންވުމެއް ލަދުވެތިކަމެއްނެތި އެކަން ފާޅުކުރާ މީހުންގެ މޫނުތައް ފެންނާން ފަށައިފިއެވެ. ތިންވަނަ މަރުޙަލާގައި އެބައިމީހުންނަށްޓަކައި "ދާއިމީ އެކުއުޅެވުމުގެ" ޤާނޫނުތައް (Partnership Acts) ފާސްކުރެވިއްޖެއެވެ. ދެޖިންސުގެ މީހުން (Hetrosexuals) ކާވެނީގެ ގުޅުމުން ގުޅިގެން ދެމަފިރީންގެ ގޮތުގައި ދިރިއުޅެ ތަފާތު އިޖްތިމާޢީ އަދި ތަމައްދުނީ ޙައްޤުތައް ލިބިގަންނަފަދައިން އެއްޖިންސުންއުޅޭމީހުންވެސް ބައިވެރީންގެ ގޮތުގައި ރަޖިސްޓްރީވެވޭގޮތް ހަމަޖެހިއްޖެއެވެ. އެބިންގަލުގެ މަތީގައި މިލްކިއްޔަތާއި ވިރާސަތާއި އިމިގްރޭޝަނާއި ޓެކުހާއި، ސޯޝަލް ސެކިއުރިޓީގެ ޙައްޤުތައް ހޯދޭގޮތްވެއްޖެއެވެ. އެފަދަ ޖޯޑުތަކަށް "ކުދީން ބަލައިގަތުމުގެ" (Adaption) ޙައްޤުވެސް ދެވިއްޖެއެވެ. މިދިޔަ ސަތޭކަވަރަކަށް އަހަރުގެ ތެރޭގައި ޔޫރަޕް ވަނީ މި ހަލާކުހުރި މަގުގައި ހިނގޭން އޮތްގޮތަކަށް ހިނގޭންއޮތް އެންމެ ދުރަކަށް ހިނގައިފައެވެ.
އެއްޖިންސުންއުޅުން މަނާކުރުމާއި އިންސާނީ ޙައްޤުތައް
އެއްޖިންސުންއުޅުމަށް ތާއީދުކުރާ މީހުން ނުހަނު ފޯރިއާއި ޖޯޝާއެކު ގަދައަޑުން ބުނަމުން އަންނަނީ އެއްޖިންސުންއުޅުން މަނާކުރުމަކީ މިނިވަންކަމާއި ތަފާތުނުކުރުމާއި ހަމަހަމަކަމުގެ ޙައްޤާ ޚިލާފު ކަމެއްކަމުގައެވެ. ނަމަވެސް މި ފާޙިޝް ޢަމަލު ހުއްޓުވުމަކީ އިންސާނީ ޙައްޤުތަކާ ޚިލާފުކަމެއް ނޫނެވެ. އެހެނީ ތަހްޒީބީ އިންސާނީ މުޖްތަމަޢެއްގައި އެއްވެސްމީހަކަށް އިމެއް ކަނޑައެޅިފައިނެތް މިނިވަންކަމުގެ ޙައްޤެއް ނުދެވެއެވެ. ކޮންމެމީހަކުވެސް މުޖްތަމަޢު ޤަބޫލުކުރާ އަގުތަކަށާއި އެކަށައެޅިފައިވާ ހަމަތަކަށާއި އުޞޫލުތަކަށް އިޙްތިރާމްކުރާންޖެހެއެވެ. މިސާލަކަށް މީހަކު ރޯއޮރިޔާމުންހުރެ ގެއިން ނުކުމެގެން މަގުމަތީގައި އުޅުމާއި ޢާންމު ތަންތަނަށް ދިޔުމަކީ އޭނާގެ ޙައްޤެއްކަމުގައި ބުނިކަމުގައިވިޔަސް އެކަން ޤަބޫލެއް ނުކުރެވެއެވެ. އޭނާއަށް އެކަންކުރުން މަނާކުރެވެއެވެ. މި މައްސަލައިގައި ހަމަހަމަކަމާއި ތަފާތު ނުކުރުމުގެ ޙައްޤަށް ޙަވާލާދިނުމަކީ ރަނގަޅު ގޮތެއްވެސް ނޫނެވެ. އެގޮތަކަށް ވަކާލާތެއް ނުކުރެވޭނެއެވެ. ހަމައެފަދައިން އެއްޖިންސުންއުޅުމުގެ ފާޙިޝް ޢަމަލުކުރާ މީހަކުގެ ކިބައިން އެކަން މަނާކުރުމަކީ އިންސާނެއްގެ ޙައިސިއްޔަތު އޭނާއަށް ލިބޭންޖެހޭ އަސާސީ ޙައްޤަކުން މަޙްރޫމުކުރުމެއް ނޫނެވެ. އަދި ކީއްތޯއެވެ؟ އެކަން މަނާނުކޮށްފި ކަމުގައިވާނަމަ އިންސާނިއްޔަތަށް އިހާނެތިކޮށްހިތައި ނިކަމެތިކޮށްލެވެނީއެވެ.
ދެމީހަކު ރުހިގެން ކަމެއްކުރުމުގެ ކުށް ވިސްނުން
މި މައްސަލައާ ގުޅުވައިގެން ވާހަކަދައްކާ ބައެއްމީހުން ބުނާ ވާހަކައެކެވެ. ދެމީހަކު ރުހި ޤަބޫލުވެގެން އެކަކު އަނެކެއްގެ ފަރާތުން ޖިންސީ ލައްޒަތު ހޯދުމަކީ (Mutual Consent) އަނެކަކާ ކޮންބެހޭކަމެއް ހެއްޔެވެ؟ ޖިންސީ ލައްޒަތު ހޯދާން އެއްބަސްވުމާއި ރުހިޤަބޫލުވުން ދެޖިންސުގެ ދެމީހެއްގެ ދެމެދުގައިވެސް އޮވެދާނެއެވެ. އެއްޖިންސުގެ ދެމީހެއްގެ ދެމެދުގައިވެސް އެ އެއްބަސްވުން އެއްބަސްވެވިދާނެއެވެ. އަންހެނަކާއި ފިރިހެނަކާ ދެމެދު އެދެމީހުންގެ ރުހުމާއި ޤަބޫލުގައި ޖިންސީ ގުޅުމެއް (Consensual Sex) ހިންގާކަށެއް (ޢާންމު އުޞޫލުން) މަނައެއް ނޫނެވެ. އެކަމަކީ އަދަބުދޭންޖެހޭ ކުށެއްކަމުގައެއް ނުބެލެވެއެވެ. ހަމައެފަދައިން ދެފިރިހެނަކު ނުވަތަ ދެއަންހެނަކު ރުހިޤަބޫލުވެގެން އެއްޖިންސުންއުޅުނުކަމުގައިވިޔަސް އެއީ ކުށަކަށް ހަދައި އަދަބުދީގެން ނުވާނެއެވެ.
ދެމީހެއްގެ ރުހުމާއި ޤަބޫލުވުމުގެ މި ތަޞައްވުރަކީ ތަހްޒީބީ އިންސާނީ މުޖްތަމަޢަކުން ޤަބޫލުކުރާނެކަމެއް ނޫނެވެ. އެކަން ވަޒަންކުރެވޭނީ މުޖްތަމަޢުގެ ހަމަތަކާއި ގަވާއިދުތަކުގެ މިންގަނޑުންނެވެ. ބަލާންޖެހޭނީ އިންސާނީ ރިވެތި ސުލޫކާއި ތަހްޒީބަށް ކިލަނބުކަމެއް ގެނުވައިފާނެކަމެއްތޯ ނުވަތަ ނޫންތޯއެވެ. އޭގެސަބަބުން މުޖްތަމަޢުގެ ހީރަސްކެނޑި ހަމަތައް ރޫޅިގެން ހިނގައިދާނެތޯ ނުވަތަ ނޫންތޯއެވެ. މިބާވަތުގެ ކަމެއްގެ މިސާލެއްގެގޮތުން ރިޝްވަތުދިނުމާއި ރިޝްވަތު ހިފުމާމެދު ވިސްނައިލަމާ ހިންގަވާށެވެ. ޝައްކެއްނެތެވެ. ރިޝްވަތުގެ ލޭންދޭންވެސް ހިނގަނީ ދެމީހެއްގެ ދެމެދުގައެވެ. ދެމީހުންގެ ރުހުމުގައެވެ.
މީހެއްގެ ރުހުމާއި ޤަބޫލުވުމުގެ މި ތަޞައްވުރަކީ ތަހްޒީބީ އިންސާނީ މުޖްތަމަޢަކުން ޤަބޫލުކުރާނެކަމެއް ނޫނެވެ. އެކަން ވަޒަންކުރެވޭނީ މުޖްތަމަޢުގެ ހަމަތަކާއި ގަވާއިދުތަކުގެ މިންގަނޑުންނެވެ. ބަލާންޖެހޭނީ އިންސާނީ ރިވެތި ސުލޫކާއި ތަހްޒީބަށް ކިލަނބުކަމެއް ގެނުވައިފާނެކަމެއްތޯ ނުވަތަ ނޫންތޯއެވެ. އޭގެސަބަބުން މުޖްތަމަޢުގެ ހީރަސްކެނޑި ހަމަތައް ރޫޅިގެން ހިނގައިދާނެތޯ ނުވަތަ ނޫންތޯއެވެ. މިބާވަތުގެ ކަމެއްގެ މިސާލެއްގެގޮތުން ރިޝްވަތުދިނުމާއި ރިޝްވަތު ހިފުމާމެދު ވިސްނައިލަމާ ހިންގަވާށެވެ. ޝައްކެއްނެތެވެ. ރިޝްވަތުގެ ލޭންދޭންވެސް ހިނގަނީ ދެމީހެއްގެ ދެމެދުގައެވެ. ދެމީހުންގެ ރުހުމުގައެވެ. އެކަމަކު ރިޝްވަތުދިނުމާއި ރިޝްވަތު ހިފުމަކީ ކުށެކެވެ. ވަރަށްބޮޑު ކުށެކެވެ. އެކަން ސާބިތުވެއްޖެކަމުގައިވާނަމަ ބޮޑު އަދަބުން އަދަބު ދެވެއެވެ. ސަބަބަކީ އެކަން ހުއްދަކޮށްފިކަމުގައިވާނަމަ ފޭރުމާއި ލޫޓުވުމާއި، ތެދުވެރިކަމެއް ނެތުމާއި މީހުންގެ ޙައްޤުތަކަށް އަރައިގަތުން ޢާންމުވެދާނެތީއެވެ. މުޅި މުޖްތަމަޢު ފިތުނަފަސާދައިން ފުރިދާނެތީއެވެ.
ހަމައެފަދައިން ބައެއް މުޖްތަމަޢުތަކުގައި ކާވެނީގެ މުނާސަބާގައި އަންހެނުންގެ އަތުން ޖަހީޒުގެ ނަމުގައި ސުމާރެއް ނޯންނަވަރަށް އަތުލާ މުދާއަތުލާ އަތުލުމުގެ ލޭންދޭނަކީވެސް މަނާކަމެކެވެ. އެކަމަކު ޢާންމުގޮތެއްގައި މިކަންވެސް ހިނގަނީ ދެފަރާތުގެ ރުހުމާ ޤަބޫލުގައެވެ. އެކަމަކު އެއީ މުޖްތަމަޢަށް ނުހަނުބޮޑު ހަލާކާއި ގެއްލުންހުރި ކަމެކެވެ. އެހެންކަމުން އެކަން ހުއްޓުވުމަށްޓަކައިވެސްވަނީ ގަވާއިދުތަކާއި ޤާނޫނުތައް ހެދިފައެވެ. އެހެންވެސް އިޖްތިމާޢީ ކުށްކުށުގެ މައްޗަށް ޤިޔާސުކޮށްގެންނެވެ. އެހެންކަމުން ނުބައިކަމެއް ކުރުމަށް ޤާނޫނީ ހުއްދަ ހޯދުމަށްޓަކައި އެކަންކުރީ ދެފަރާތުގެ ރުހުމާއި ޤަބޫލުގައޭ ބުނެގެން ފަރުޖެއްސޭކަށެއް ނޯންނާނެއެވެ. އެ ދަޢުވާއަކީ ބަލައިގަނެވޭނެ ދަޢުވާއެއް ނޫނެވެ.
އެއްޖިންސުންއުޅޭހިތްވުމަކީ ވިރާސީ ކަމެއްހެއްޔެވެ؟
ބުނެވޭގޮތުގައި ތިމާއާ އެއްޖިންސުގެ މީހުންގެ ފަރާތަށް ޖިންސީގޮތުން ލެނބެވޭގޮތްވުމަކީ (Sexual Orientation) ވިރާސީ (Genetic) އަދި ޚިލްޤީ (Congenital) ކަމެކެވެ. އެކަން ކަނޑައެޅެނީ ބަލިވެއިނުމުގެ ތެރޭގައެވެ. އަދި ކީއްތޯއެވެ؟ ބަލިވެއިނުމުގެ އެންމެކުރީކޮޅުގެ ދުވަސްތަކުގައެވެ. އެކަމުގެ ޒިންމާދާރަކަށްވަނީ އިންސާނާގެ ހަށިގަނޑުގައި ހުންނަ ބައެއް ޖީން (Gene) ތަކެވެ. އިންސާނާގެ އާދަތަކާއި އޭނާގެ ހޭޑިފޭޑިއާއި ވިސްނާގޮތާއި މިޒާޖު ބައްޓަންކުރަނީ އެ ޖީންތަކެވެ.
މިއީ ޙަޤީޤަތެއް ކަމުގައިވިޔަސް ޤަބޫލުކުރެވިފައިވާ އަނެއް ޙަޤީޤަތަކީ އިންސާނާގެ ދިރިއުޅުމުގެ ތަޖްރިބާތަކާއި އޭނާގެ ވަށައިގެންވާ މާހޫލުގެ ސަބަބުންވެސް އޭނާގެ ޖެނެޓިކް ކޯޑު (Genetic Code) ގެ ޢަމަލު ހުންނަގޮތަށް ނުވަތަ ސުލޫކަށް ބަދަލުއަންނަކަމެވެ. ބައެއް ޖީންތައް މާބޮޑަށް މަސައްކަތް ކުރާކަމެވެ. ނުވަތަ އެޖީންތަކުގެ މަސައްކަތް ލަސްވާކަމެކެވެ.
މިކަން ޤަބޫލުކުރެވުނު ކަމުގައިވިޔަސް މި ވިސްނުމަކީ އާލާވުމުގެ ފުރުސަތުދެވޭނެ ވިސްނުމެއްނޫނެވެ. މުޖްތަމަޢުގެ ސަލާމަތަށްޓަކައެވެ. މިސާލެއްގެގޮތުން ބައެއްމީހުންގެ ކިބައިގައި ނިރުބަވެރިކަމުގެ ވިސްނުން އުފެދެނީވެސް ޖީންގެ ސަބަބުންކަމުގައި ބުނެވެއެވެ. އެކަމަކު މިފަދަ ލެނބުންތައް ހުންނަ މީހުންނަކަށެއް އެބައިމީހުންގެ ޖަރީމާތައް ހިންގާކަށެއް ހުއްދައެއް ނުދެވޭނެއެވެ. އެކަން ކުރުމުން ކުށުގެ އަދަބަކުން އިސްތިސްނާއެއް ނުކުރެވޭނެއެވެ.
(އިންސާނާ ހެއްދެވި ފަރާތުން އޭނާގެ ފިޠުރަތުގައި ދެބައެއް ލައްވައިފައިވަނީ އޭނާ އިމްތިހާނުކުރެއްވުމަށްޓަކައެވެ. އޭނާއަށް ދެއްވައިފައިވާ ޚިޔާރުކުރުމުގެ ބާރުގައި ކުށްގޮތެއް އިޚްތިޔާރު ކުރުމަކީ ދުނިޔޭގައިވެސް އާޚިރަތުގައިވެސް އޭނާ ކުށުގެ އަދަބުން ސަލާމަތްވާނެކަމެއް ނޫނެވެ.)
ނަފުސާނީ ބަލި
އެއްޖިންސުންއުޅުން ހުޅަނގުގައި އެންމެފުރަތަމަ ހިމެނީ ނަފުސާނީ ބަލިތަކުގެ ލިސްޓުގައެވެ. American Psychiatric Association އިން 1952 ގައި ވަނީ ނަފުސާނީ ބަލިތަކުގެ ލިސްޓުގައި މި ފާސިދު ޢަމަލު ހިމަނައިފައެވެ. Diagnostic and Statistical Manual of Mental Disorders ގެ ނަމުގައި ނެރުނު ލުއިފޮތުގައިވަނީ އެއްޖިންސުންއުޅުމަކީ ނަފުސާނީ ބައްޔެއްކަމުގައި ލިސްޓުކޮށްފައެވެ. ނަމަވެސް އެކަމާ އިޢުތިރާޟުކުރެވޭން ފެށުމުން 1973 ގައި ވަނީ އެއްޖިންސުންއުޅުމުގެ ބަލި އެލިސްޓުން ނަގައިފައެވެ. ދުނިޔޭގެ ޞިއްޙަތާބެހޭ އިދާރާ ވޯލްޑް ހެލްތު އެސެމްބްލީންވެސް 1977 ގެ ރިޕޯޓުގެ ICD-9 ގައި އެއްޖިންސުންއުޅުމަކީ ނަފުސިއްޔާތީ ބައްޔެއްކަމުގައި ކަނޑައެޅިއެވެ. ނަމަވެސް 1990 ގައި ވޯލްޑް ހެލްތު އެސެމްބްލީގެ 43 ވަނަ ބައްދަލުވުމުގެ ހުށަހެޅުންތަކާ ގުޅިގެން ICD-10 ގައިވަނީ އެ ފާސިދު ޢަމަލު ނަފުސިއްޔާތީ ބަލިތަކުގެ ފިހުރިސްތުން އުނިކޮށްފައެވެ.
1996 ގައި Chinese Society of Psychiatry އިންވެސް އެއްޖިންސުންއުޅުމަކީ ނަފުސާނީ ބައްޔެއްކަމުގައި ލިސްޓުކުރިއެވެ. އެކަމަކު އޭގެ ފަސްއަހަރު ފަހުން ޗައިނާއިންވެސް ވަނީ ނަފުސާނީ ބަލިތަކުން ލިސްޓުން އެއްޖިންސުންއުޅުމުގެ ބަލި އުނިކޮށްފައެވެ.
އަޅުގަނޑުމެންނަށް ނުހަނު ސާފުކޮށް އެނގޭފަދައިން އެއްޖިންސުންއުޅުމަކީ ނަފުސާނީ ބައްޔެއްކަމުގައި އެއްބަސްވުމާއި އެއަށްފަހު ނަފުސާނީ ބަލިތަކުގެ ލިސްޓުން އެބަލި އުނިކުރުމަކީ އެއްޖިންސުންއުޅޭ މީހުންގެ ޢަދަދު ގިނަވަމުންދިޔުމާއި އެއުރެންގެ ފަރާތުން މައްސަލައިގައި އިތުރުވަމުންދާ ފިއްތުންތަކުގެ ނަތީޖާއެވެ. އެއްޖިންސުންއުޅުން އޮންނާންޖެހެނީ ބައްޔެއްގެ ގޮތުގައެވެ. ޅަފަތުގައި އެކަން ފާހަގަކުރެވިއްޖެކަމުގައިވާނަމަ އެކަން ހިމަނާންޖެހެނީ އުފެދުމާ ގުޅިފައިވާ ޚިލްޤީ ބައްޔެއްކަމުގައެވެ.
ބައެއްކުދީންނަކީ އެކުދީންގެ އުފެދުމުގައި ޢުޒުރުވެރި ކުދީންނެވެ. ބައެއްކުދީންގެ އުފެދުމުގައި އުނިކަން ހުރެއެވެ. މިސާލެއްގެގޮތުން ދަންނަވާނަމަ ބައެއްކުދީން އުފަންވާއިރު އަތްފައިގައި ހަ އިނގިލި ހުރެއެވެ. ބައެއްކުދީންގެ ތުންފަތް ކެނޑިފައި ހުރެއެވެ. ބައެއްކުދީންގެ ބޯ އާދަޔާޚިލާފަށް ބޮޑެވެ. ނުވަތަ ހޯމޯންތަކުގެ ވަޒަންހަމަކަން ގެއްލިފައިވުމުގެ ސަބަބުން ޖިސްމާނީ ހެދިބޮޑުވުން ޢާންމު މިންގަނޑަށްވުރެ ލަސްވެއެވެ. މިފަދަ ގޮތްތައް ދިމާވުމުން އެކުދީން ދުނިޔެއަށް އައީ އެގޮތަށްކަމުގައިވާތީ ދެނެހުރިކަމަށްނަހަދައި އަޅައިނުލައި އެކުދީން ދޫކޮށްލަނީކީ ނޫނެވެ. އަދި ކީއްތޯއެވެ. އެކުދީންނަށް ފަރުވާދީ އެކުދީންނަށް ޢާންމު ދިރިއުޅުމެއް އުޅެވުމުގެ އެކަށޭނަކަން ހޯދައިދެވޭތޯ މަސައްކަތް ކުރެވެއެވެ. ހަމައެފަދައިން ބައެއްމީހުންނަކީ އުފެދުމުގައި އެއްޖިންސުންއުޅުމުގެ ފަރާތަށް ލެނބިފައިވާ މީހުންކަމުގައިވާނަމަ އެފަދަމީހުންގެ އެ ރަވައްޔާއަކީ ޚިލްޤީ އުނިކަމެއް (Congenital Abnormality) ކަމުގައިބަލައި އެފަދަމީހުންނަށްވެސް ބޭސްފަރުވާ ކުރާންޖެހެއެވެ. އާދެ، އެފަދަމީހުންގެ އެއްޖިންސުންއުޅުމުގެ ޒިހުނިއްޔަތު އިތުރަށް އާލާވާން ދޫކޮށްލަންވީކީ ނޫނެވެ. އެބައިމީހުންގެ ފާސިދު ރަވައްޔާގެ ޙިމާޔަތުގައި ޤާނޫނު ހަދާންވީކީ ނޫނެވެ.
ފިޠުރަތުގެ ނިޒާމާ ދެކޮޅަށް ބަޣާވަތްކުރުމެއް
އެއްޖިންސުންއުޅުމަކީ ފިޠުރަތުގެ ނިޒާމާ ދެކޮޅަށް ބަޣާވަތްކުރުމެކެވެ. ހަނގުރާމަ އިޢުލާންކުރުމެކެވެ. ކާއިނާތު އުފެދުނީއްސުރެ ކާއިނާތުގައި ލައްވައިފައިވާ ހުރިހައި އެއްޗެއްސެއްގެ މައްޗަށް ހިންގަވައިފައިވަނީ "ޖޯޑުޖޯޑުގެ" ނުވަތަ ޒައުޖިއްޔަތުގެ ޤާނޫނެވެ. ހުސްއެކަނި ޙަޔަވާނާތާއި ފަތްޕިލާވެއްޔާއި ގަސްގަހާގެއްސެއް ނޫނެވެ. ފުރާނައެއް ނުހުންނަ މާއްދާތަކުގެ މައްޗަށްވެސް ޗާލޫވެފައިވަނީ މި އުސޫލެވެ. މި ޤާނޫނެވެ. ޚުދު މާއްދާ (Atom) ގެ އަސާސީ ތަރުކީބުވުމުގައިވެސް ނައްސި ކަރަންޓާއި ފައްސި ކަރަންޓު އެކުލެވެއެވެ. ދިރުންހުންނަ ބާވަތްތަކުގައި ފިޠުރަތުން ފިރިހެން އަންހެންކަމުގެ ފަރަގު ލައްވައިފައިވަނީ ނަސްލު އުފައްދަވައި ދެމެހެއްޓެވުމަށްޓަކައެވެ. ދެޖިންސުގެ އެކުވުމުން ނަސްލު ދެމިގެން އައުމަށްޓަކައެވެ. އެ މަޤްޞަދު ފުރިހަމަކުރެއްވުމަށްޓަކައިވަނީ ދެޖިންސުގެ މެދުގައިވަނީ ދަމާބާރު ލައްވައިފައެވެ. ޖިންސީ ދަމާބާރު ލައްވައިފައެވެ.
މި މަޤްޞަދަށްޓަކައި ޤުދުރަތުން އިންސާނީ ނައުޢު ހައްދަވައިފައިވަނީ އަންހެން ފިރިހެން ތަފާތު ދެޖިންސު އެކުލެވޭގޮތަށެވެ. އެދެޖިންސުގެ ޖިސްމާނީ އޮނިގަނޑާއި ނަފުސިއްޔާތީ ތަރުކީބު ލައްވައިފައިވަނީ އެއްޖިންސެއްގައި އަނެއް ޖިންސަކާމެދު ދަމާބާރު ހުންނަގޮތަށެވެ. ޖިންސީ ދަގައްފާނީބާރު ހުންނަގޮތަށެވެ. އެދެބައިމީހުންގެ މެދުގައި ޖިންސީގުޅުން ހިނގުމުގެ ނަތީޖާއެއްގެގޮތުން ދަރީން އުފެދި ނަސްލު ދެމިގެން އައުމަށްޓަކައެވެ. އެ ގުޅުމުގައި ލައްވައިފައިވާ ލައްޒަތަކީ ނުވަތަ މީރުކަމަކީ ފިޠުރަތުން އެ މަޤްޞަދު ފުރިހަމަކުރެއްވުމުގެ ޙަރަކާތް އުފެއްދެވުމެވެ. އެ ޚިދުމަތަށް ދެއްވާ އިނާމެއްވެސްމެއެވެ.
ފިޠުރަތުގެ މި ސްކީމާ ޚިލާފުވެ ތިމާއާ އެއްޖިންސުން ޝަހްވާނީ ލައްޒަތު ހޯދާން މަސައްކަތްކުރާ މީހާއަކީ ޙަޤީޤަތުގައި ފިޠުރަތާ ދެކޮޅަށް ހަނގުރާމަކުރާ މީހެކެވެ. އެ ހަނގުރާމައިގެ ސަބަބުން އޭނާއާއި އޭނާގެ އެކުވެރިޔާ (Partner) ގެ ޖިސްމާނީ ބައްޓަމަށާއި ނަފުސިއްޔާތަށް ނުބައި އަސަރުކުރެއެވެ. އެހެނީ ކޮންމެމީހަކުވެސް ތިމާގެ ޖިންސު ބޭނުންކުރާންވާނީ އެކަމަށްޓަކައި ޤުދުރަތުން ޖިންސު އުފެއްދެވި މަޤްޞަދުގައެވެ. އެ މަޤްޞަދާ ޚިލާފުވުމަކީ ފިޠުރަތަށް ޣަދަރުވެރިވުމެވެ. ފިޠުރަތުން ޝަހްވާނީ ލައްޒަތު ލައްވައިފައިވަނީ އިންސާނީ ނަސްލު އުފެއްދުމާއި ސިލްސިލާކުރުމުގެ މުހިންމު ޚިދުމަތުގެ ޒަރީޢާއަކަށެވެ. އެހެންކަމުން އެޚިދުމަތް ދިނުމަކާނުލައި ލައްޒަތު ހޯދާން މަސައްކަތްކުރުމަކީ ފިޠުރަތަށް ހަރާންކޯރުވުމެވެ.
ޢާއިލީ ނިޒާމާއި އިންސާނީ ތަމައްދުނު ސުންނާފަތިކުރުން
މުޖްތަމަޢެއް އުފެއްދުމަށްޓަކައި ހަމަޖެހި އެކަށައެޅިފައިވާ ޤާނޫނުތަކާއި ޢަމަލީ ދުސްތޫރާ އެއްގޮތްވާ ގޮތުގެމަތީން ފިރިހެނަކާއި އަންހެނަކު އެއްތަންވެއެވެ. ނަތީޖާއެއްގެގޮތުން ޢާއިލާއެއް ނުވަތަ ވަންހައެއް އުފެދެއެވެ. ދަރީންލިބި އެކުދީން ތަރުބިޔަތުވެއެވެ. ގާތްތިމާގެކަމާއި ދަނބިދަރި ދޮންދަރިކަމާއި ޅިޔަންފަހަރިކަމުގެ ޢާއިލީގުޅުން އުފެދިގެންއާދެއެވެ. އިންސާނީ ތަމައްދުނެއްގެ ނިރުފަޅައި ހެދިބޮޑުވެ މަލާއި މޭވާ އަޅައެވެ. އެ މުޖްތަމަޢުގައި ކޮންމެމީހަކުވެސް އެމީހެއްގެ ދައުރު އަދާކުރެއެވެ. ޙައްޤުތައް ލިބިގަނެއެވެ. ވާޖިބުތައް އަދާކުރެއެވެ.
ނަމަވެސް އެއްޖިންސުންއުޅުމަކީ ޚާންދާނީ އިދާރާއަށް ދެވޭ ނިރުބަވެރި ވަރުގަދަ ޙަމަލައެކެވެ. އެހެނީ ޢާއިލާއެއް އުފެދޭންޖެހެނީ ބަޔާންކުރެވުނު ފިޠުރީ އުސޫލުގެ މަތީންނެވެ. އެއްޖިންސުންއުޅުމުން މިދެންނެވި ފިޠުރީ އުޞޫލަށް އުނިކަން ލިބެއެވެ. އެއްޖިންސުންއުޅޭމީހާއަކީ އޭނާއާ އެއްޖިންސަކުން ކާވެނިކޮށްގެން އިންސާނީ ނައުޢު ސިލްސިލާކުރުމުގައި ތިމާގެ ޒިންމާއިން ރެކިގަންނަ މީހެކެވެ. ޢާއިލާއެއް އުފެއްދުމާއި ތިމާއާ ޢާއިލީގުޅުމުން ގުޅިފައިވާ މީހުންނަށް ތިމާ އަދާކުރާންޖެހޭ ޚިދުމަތަށް ފިލާމީހެކެވެ. އަނެއްކޮޅުން އޭނާ ތަމައްދުނީ ހުރިހައި އިދާރާތަކަކުން ފައިދާ ލިބިގަނެއެވެ. އެކަމަކު އެއްޖިންސުންއުޅޭމީހާ އެއިދާރާ ތަރައްޤީކުރުމުގެ އެއްވެސް ޒިންމާއަކާ ޙަވާލެއް ނުވެއެވެ. އެހެންކަމުން އެއްޖިންސުންއުޅުން ޙިމާޔަތްކުރުމަކީ ޢާއިލީ ނިޒާމުގެ އިދާރާ ހަލާކުކޮށް ސުންނާފަތިކުރުމުގެ މަސައްކަތެކެވެ. އިންސާނީ ތަމައްދުނަށްދެވޭ ނުރައްކާތެރި ނިރުބަވެރި ޙަމަލައެކެވެ. އޭގެނަތީޖާއެއްގެގޮތުން އިންސާނީ ތަމައްދުނުގެ ފޭރާމުގެ އުއިގަނޑު ކޮށައިލެވި ވަކިވަކިވެގެންދިޔުމުގެ ނުރައްކާ އިންތިހާޔަށް އެބައޮތެވެ.
އެއްޖިންސުންއުޅޭ މީހުން އެދެނީ އެބައިމީހުންނަށް އެއްޖިންސުން ކާވެނިކުރުމުގެ ހުއްދަ ދިނުމަށެވެ. ކާވެނީގެ ބަނދެވެމުން ބަނދެވުމަށްފަހު ދެމަފިރިޔަކަށްލިބޭ ހުރިހައި ޙައްޤުތަކެއް ލިބިދިނުމަށެވެ. މިކަން ޤަބޫލުކުރުމުގެ މާނައަކީ ކާވެނީގެ އިދާރާއަށް ޙަމަލަދިނުމެވެ. އެ އިދާރާގެ އަހަންމިއްޔަތު ނައްތައިލުމެވެ. ކަންމިހެން ހުރުމާއެކުވެސް ބައެއް ޤައުމުތަކުންވަނީ އެއްޖިންސުންއުޅޭ މީހުން އެދޭއެދުން ޤަބޫލުކޮށްފައެވެ. ކާވެންޏަށްފަހު ޤާނޫނީގޮތުން ދެމަފިރިޔަކަށް ލިބޭ ހުރިހައި ޙައްޤުތަކެއް ލިބިދޭން އެއްބަސްވެފައެވެ. ޙަޤީޤަތުގައި އެޤައުމުތަކުގައި ކާވެނީގެ އެއްވެސް މާނައެއްނޯވެއެވެ. ޙައިސިއްޔަތެއްނެތެވެ. އިޖްތިމާޢީ ދިރިއުޅުމުގައިވަނީ ރޫޅުމާއި ބައިބައިވުން އުފެދިފައެވެ. މީހުން އެއްތަންވަނީ މުދަލާއި ފައިސާގެ މަންފާގެ ބިންގަލުގެ މަތީގައެވެ. އެގޮތަށް އެއްވެ އެބައެއްގެ ޝަހްވާނީ އެދުންފުއްދައެވެ. ބޭނުންހައިދުވަހަކު އެކުގައި އުޅެއެވެ. ބޭނުންވުމުން ވަކިވެގެން ހިނގައިދެއެވެ. އިމެއްނެތް މިނިވަންކަމާއި، ނަފުސާނީ އެދުންތަކަށް އަޅުވެތިވުމާއި އަމިއްލަ މަންފާއަށް އަޅުކަންކުރުމުގެ ސަބަބުން އެބައިމީހުންގެ މުޖްތަމަޢުތައް ބަދަލުވެފައިވަނީ ޖަނަވާރު ކޮށިތަކަކަށެވެ.
ޢާންމު ޞިއްޙަތަށްހުރި ބިރެއް
އެއްޖިންސުންއުޅުމުގެ ސަބަބުންލިބޭ ބޮޑެތި ގެއްލުންތަކުގެ ތެރެއިން ހިމެނޭ އެއްކަމަކީ އޭގެސަބަބުން ޢާންމު ޞިއްޙަތަށް ކުރިމަތިވާ ބޮޑެތި ނުރައްކާތަކެވެ. މި ފާޙިޝް ޢަމަލުގެ ސަބަބުން އެކަންކުރާ މީހުންނަށް ޖިސްމާނީ އަދި ނަފުސާނީ އަފޫރުއްބަ ގެއްލުންތަކެއް ލިބެމުންދާއިރު މިނުބައި ޢަމަލުގެ ނުރައްކައުތެރި ނަތީޖާގެ އަސަރު އެހެން އެތައްބަޔަކަށްވެސް ފޯރައެވެ. އެއްޖިންސުންއުޅޭ މީހުންގެ ވަށައިގެންއުޅޭ މީހުންނަށެވެ. އެބައިމީހުނާ ގުޅުންއޮންނަ މީހުންނަށެވެ.
ވޭތުވެދިޔަ ސައްތައިގެ އަށްޑިހައިގެ އަހަރުތަކުގައި ހުޅަނގުގައިކުރި ސާރވޭތަކުން އެނގިފައިވާގޮތުގައި އެއްޖިންސުންއުޅޭ މީހުންގެ އެވްރެޖު ޢުމުރު ވަރަށްބޮޑަށް ކުރުވެއެވެ. 2002 ގެ ސާރވޭއަކުން އެނގިފައިވަނީ އެއްޖިންސުންއުޅުމުގެ ފާޙިޝް ޢަމަލުކުރާ މީހުން އެކަން ނުކުރާ މީހުންނަށްވުރެ ދެބައިކުޅައެއްބައި ޢުމުރު ކުރުކަމެވެ. އެއްޖިންސުންއުޅުމަކީ އެނުބައި ޢަމަލާއެކު ގައިންގަޔަށްއަރާ ބަލިތަކާއި ގައިންގަޔަށްނާރާ އެތަކެއް ބަލިތަކެއްގެ "ހަދިޔާ" ގެންނަކަމެކެވެ. އެކަމަށް އާދަވެފައިވާ މުޖްރިމުންނާއެކު އެބައިމީހުންނާ ގުޅިގެންއުޅޭ މީހުންނަށް އޭގެ ނުރަނގަޅު ނަތީޖާގެ ރަހަ ދެކޭންޖެހެއެވެ. ބައެއް މިސާލުތައް ހުށަހަޅައިލަމެވެ.
(ނުނިމޭ)
