ޔޯގާ ހަމަނުޖެހުމާ ގުޅިގެން ހައްޔަރުކުރި ޝައިޚް އާދަމް ނިޝާން ބިން އަލީ އާދަމް އާއި ޝައިޚް ފަޒްލޫން މުހައްމަދުގެ ބަންދުގެ މުއްދަތު އަނެއްކާ ވެސް އިތުރުކޮށްފިއެވެ.
އެ ދެ ޝައިޚުންގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަށް ގެންދިއުމުން އެ ކޯޓުން މިއަދު ވަނީ އެ ދެ ޝައިހުންގެ ބަންދަށް އިތުރު 16 ދުވަސް ޖަހާފައެވެ.
ޝައިޚް ފަޒްލޫނާއި ޝައިޚް ނިޝާން ބަންދުކުރީ ބައިނަލްއަގްވާމީ ޔޯގާ ދުވަސް ފާހަގަކުރުމަށް މިދިޔަ މަހުގެ 21 ވަނަ ދުވަހު ގަލޮޅު ދަނޑުގައި ބޭއްވި ހަރަކާތާއި ގުޅިގެންނެވެ.
އެ ހަރަކާތެއް ކުރިއަށް ދަނިކޮށް އެތަނަށް ބަޔަކު ވަދެ ހަމަނުޖެހުން ހިންގައި ތަކެއްޗަށް ގެއްލުންދީ ބިރުވެރިކަން އުފައްދާފައިވާ އިރު، މައްސަލައިގައި ޝައިޚް ނިޝާން އާއި ޝައިޚް ފަޒްލޫން ހައްޔަރުކުރުމަށްފަހު ފުރަތަމަ ބަންދު ކުރީ ހަތް ދުވަހަށެވެ. އަދި އެކި ފަހަރުމަތީން ބަންދުގެ މުއްދަތު ކުރަމުން އައިސްފައިވެއެވެ.
އެ ދެ ޝައިޚުންގެ ފަރާތުން ވަނީ ބަންދުގެ މައްސަލަ ހައިކޯޓުގައި އިސްތިއުނާފުކޮށްފައެވެ.
ޔޯގާ ހަމަނުޖެހުމާ ގުޅިގެން މިހާތަނަށް 21 މީހަކު ހައްޔަރުކޮށްފައިވާއިރު، ހަތް މީހަކު ވަނީ ދޫކޮށްލައިފައެވެ.
