އީރާނާއެކު ދުނިޔޭގެ ބޮޑެތި ބާރުތަކުން ވެފައިވާ ނިއުކުލިޔާ އެއްބަސްވުން ސަލާމަތްކުރުމަށް އީރާން ރިވޮލިއުޝަނާރީ ގާޑްސް ކޯޕްސް (އައިއާރްޖީސީ) އެމެރިކާއިން އެކުލަވާލާފައިވާ ޓެރަރިސްޓު ޖަމާއަތްތަކުގެ ލިސްޓުން އުނިކުރަން ޖެހޭނަމަ އެކަން ނުކުރައްވާނެ ކަމުގައި އެމެރިކާގެ ރައީސު ޖޯ ބައިޑަން ވިދާޅުވެއްޖެއެވެ.
ރައީސުކަމާ ހަވާލުވެވަޑައިގަތް ފަހުން މެދުއިރުމައްޗަށް ކުރައްވާ ފުރަތަމަ ދަތުރުފުޅުގައި މިހާރު އިސްރާއީލުގައި ހުންނެވި ބައިޑަން މިހެން ވިދާޅުވެފައި ވަނީ އިސްރާއީލުގެ އެން-12 ޗެނެލަށް ދެއްވި ބަސްދީގަތުމެއްގައެވެ.
އެހެންނަމަވެސް، އޭނާ ވިދާޅުވީ ކުރީގެ ރައީސު ޑޮނާލްޑް ޓްރަމްޕްގެ ވެރިކަމުގައި އެމެރިކާ ނިއުކުލިޔާ އެއްބަސްްވުން ދޫކޮށްލުމަކީ ރަނގަަޅު ފިޔަވަޅެއް ނޫންކަމަށާއި، އެމެރިިކާ އެއްބަސްވުަމަށް އެނބުރި އައިސް، އެ އެއްބަސްވުމުން ސަލާމަތްކުރެވޭތޯ މިހާރުވެސް މަސައްކަތްކުރަމުންދާ ކަމަށެވެ.
ބައިޑަން އިތުރަށް ވިދާޅުވެފައި ވަނީ އީރާނާ ދެކޮޅަށް ބާރުގެ ބޭނުންކުރަން އެމެރިކާ ބޭނުންނުވާ ކަމުގައެެވެ. އެހެންނަމަވެސް، އީރާނުން ނިއުކުލިޔާ ހަތިޔާރުއުފައްދުން ހުއްޓުވުމަށް އެކަންކުރަން "އެ ނޫން އެއްވެސް ގޮތެއް ނެތިއްޖެނަަމަ" އެކަން ކުރައްވާނެ ކަމުގައެވެ.
އިސްރާއީލަށް ކުރައްވާ ދަތުރުފުޅުގައި ވާހަކަފުޅުދައްކަވަމުން ބައިޑަން ވާނީ އޭނާއަކީ ޞަހްޔޫނީއެއް (ޒަޔަނިސްޓެއް) ކަމަށް ދޭހަވާ ގޮތަށް ވާހަކަފުޅު ދައްކަވާފައެވެ.
"ޞަހްޔޫނީއަކަށް ވާން ކޮންމެހެން ޔަހޫދީއަކަށް ވާން ނުޖެހޭ. އެމެރިކާއާއި އިސްރާއީލުގެ ރައްޔިތުންގެ މެދުގައިވާ ގުޅުމަކީ 'ކަށީގެ އެތެރެއަށް ފޯރާފައިވާ' ގުޅުމެއް. އިސްރާއީލާއި އެމެރިކާގެ ގުޅުން ދުވަހަކުވެސް ބަދަހިނުވާ ވަރަށް ބަދަހިވެފައިވާކަމަށް އަހަރެން މިބުނަނީ ފަޚުރުވެރިކަމާއެކު." ބައިޑަން ވިދާޅުވިއެވެ.
އިސްރާއީލަށް ތާއީދުކުރައްވައި ވާހަކަފުޅުދެއްކެވުމަށް ފަހު ބައިިޑަން ވިދާޅުވީ ފަލަސްޠީނުގެ ބިމުގައި ދެ ދައުލަތް (އިސްރާއީލާއި ފަލަސްޠީނު) ގާއިމުކުރުމަށް އޭނާ ތާއީދުކުރައްވާ ކަމުގައެވެ.
ބައިޑަންއަށް މަރުހަބާ ދަންނަވައި ވާހަކަދައްކަމުން އިސްރާއީލުގެ ބޮޑުވަޒީރު ޔައިރް ލަޕިޑް ބުނެފައި ވަނީ ބައިޑަން އަކީ "މަތިވެރި ސަޙްޔޫނީއެއް" ކަމުގައެވެ. އޭނާ އިތުރަށް ބުނެފައިވާ ގޮތުގައި ބައިޑަންއަކީ އިސްރާއީލުގެ އެންމެ ގާތް ރަހުމަތްތެރިންގެ ތެރޭގައި ހިމެނިވަޑައިގަންނަވާ ބޭފުޅެކެވެ.
ރައީސު ބައިޑަން އިސްރާއީލުން ވަޑައިގަންނަވާނީ ސައޫދީ އަރަބިއްޔާއަށެވެ. އެ ގައުމުގައި އޭނާ ގަލްްފް ކޯޕަރޭޝަން ކައުންސިލް (ޖީސީސީ) ގެ މެންބަރު ގައުމުތަކުގެ ވެރިންނާ ބައްދަލުކުރައްވާނެއެވެ. ޖީސީސީގައި ހިމެނެނީ ސައޫދީ އަަރަބިއްޔާ، ބަހްރޭން، ކުވޭތު، އޮމާން، ޤަޠަރު އަދި ޔުނައިޓެޑް އަރަބް އެމިރޭޓްސް (ޔޫއޭއީ) އެވެ. ބައިޑަންގެ މެދުއިރުމަތީގެ ދަތުރުފުޅަކީ އިސްރާއީލާއި އަރަބި ބައެއް ގައުމުތައް ހިމެނޭހެން އީރާނާ ދެކޮޅަށް މަސައްކަތްކުރާ އިއްތިހާދެއް އުފެއްދުމެވެ.
