(16 އޭޕްރީލް 2022 ގެ ބަޔާ ގުޅޭ)
ރަމަޟާންމަހަށް ޚާއްޞަކޮށް ، އަޅުގަނޑުގެ މާބޮޑު ޕްރޮގްރާމްތަކެއް ނުގެންގުޅެމެވެ. ރޭގަނޑު ބަދަލުވާނީ ދުވާލަށެވެ. އަދި ދުވާލު ބަދަލުވާނީ ރޭގަނޑަށެވެ. ރޭގަނޑު ، ހުޅަނގުގެ ފިލްމުތައް ބަލަމެވެ. ހަމައެއާއެކު ، ކީރިތި ޤުރުއާންވެސް ކިޔަވަމެވެ. އަދި ތާސްވެސް ކުޅެމެވެ. ހެނދުނު އަޅުގަނޑު ނިދަނީ ، ކަރީމް އޮފީހަށްދިޔައިމައެވެ. ހަވީރުވަންދެން އޮންނަނީ ނިދާފައެވެ. ހަނދާންކޮށް ކޮންމެ ދުވަހަކުވެސް މެންދުރުނަމާދަށް ތެދުވަމެވެ. އަދި ޢަޞުރުނަމާދުވެސް ދޫކޮށެއްނުލަމެވެ. ޢަޞުރު ނަމާދަށްފަހު ގިނައިރު ކީރިތި ޤުރުއާން ކިޔަވައިލަން އިންނަމެވެ. އެހައި ގިނަވަގުތު ނިދާފައި އޮންނާތީ ލިބޭ މޮޅެއް އެބަ އޮވެއެވެ. އެއީ ބަނޑުހައިވުމާ އަދި ފެންބޮވައިގަނެގެން ކަރުހިއްކުމުގެ އަސަރު އިޙްސާސް ނުވާކަމެވެ. މާކަންތައް ބޮޑުވެގެން ރޯދަވީއްލަން ޖެހިއްޖިއްޔާ ވަރަށް ލަދުގަންނަން ޖެހޭނެއެވެ.
ރަމަޟާން މަހުގެ ދުވަސްތަކުގައި ސާރާ ވަރަށްގިނައިން އަޅުގަނޑާއެކު އުޅޭނެއެވެ. ޢާއިލާގެ ކަމެއްގައި ސާރާއަށް ގެއިން ނުނުކުމެވޭގޮތް ވެއްޖެނަމަ ، އަޅުގަނޑުގެ ދަރިފުޅު މަހާ އަޅުގަނޑާއެކު އުޅޭނެއެވެ. ހަވީރުވެގެން އަންނައިރު ހުންނަނީ ބަނޑުހައިވެގެންގޮސް އަވަދިވެފައެވެ. އަޅުގަނޑުމެން ގޮވައިގެން ސާރާމެންގެޔަށް ދާނީ ، ހަވީރު ކަރީމް އޮފީހުން އައިއްސައެވެ. ރޯދަމަހުގެ 19 ދުވަސް ހޭދަވެއްޖެއެވެ. ނަޞީބަކުން އަޅުގަނޑު ، އެންމެ ރޯދައެއްވެސް ދޫކޮށެއްނުލަމެވެ. އެކަމަށްޓަކައި އަޅުގަނޑު ފަޚުރުވެރިވަމެވެ. ދުވާލުއެއްކޮށް ހޭދަކޮށްލަނީ ، އެންމެ ފެންފޮދެއްވެސް ނުބޮއެވެ. އެންމެ ސިނގިރޭޓެއްވެސް ނުބޮމެވެ. އެއަށްވުރެ މާމުހިންމު ކަމެއް އަދި އެބައޮތެވެ. އެންމެ ރާފޮދެއްވެސް ނުބޮމެވެ. ރާބޯހިތްވެސް ނުވަނީއެވެ. އެއީ ރަމަޟާންމަހުގެ ބަރަކާތުން ކަމަށް ވެދާނެއެވެ.
ކަރީމާއި މަހާ ، އަޅުގަނޑަށް ހިތްވަރު ދިނުމުގެ ގޮތުން ހިނިތުން ވެލައެވެ. ސާރާވެސް ހުންނަނީ ވަރަށް އުފައު ވެފައެވެ. އަދި ލިބޭ ކޮންމެ ފުރުޞަތެއްގައި ހިތްވަރުދީ ބާރުއަޅައެވެ. އަމާނީވެސް ، އޭނާގެ ގޮތުގައި މަރުޙަބާކިޔައި އުފައުވެރިކަން ޙިއްޞާ ކުރެއެވެ. އެއްފަހަރަކަށް ނަމަވެސް ، އަޅުގަނޑުކުރަންބޭނުންވާގޮތަށް ރަމަޟާންމަހުގެ ކަންކަން ފުރިހަމަވެގެންދިޔައީތީ ވަރަށް ފަޚުރުވެރި ވެވެއެވެ. އަޅުގަނޑުމެންގެ ޢާއިލާގެ ހުރިހައި މިފަދަ އެއްވުންތަކުގައި ، ޢާއިލާގެ މެންބަރެއްގެ ގޮތުގައި ހާދީ ބައިވެރިކުރުމަށް ، ޢަލީ ވަރަށް މަސައްކަތް ކުރެއެވެ. އެމީހުން މޮރޮކޯއަށްގޮސް ، ހަނީމޫނުން އައީ އިއްޔެއެވެ. އެކަމަކު ، ހާދީއަކީ އަޅުގަނޑުމެންގެ ޝާހީޢާއިލާގެ ނާރެހާ ކައިރިޔަށް އައުމަށް ، ޢާއިލާގެ އެކަކުވެސް ހިތްހަމަޖެހޭފަދަ މީހެއްނޫނެވެ. އަޅުގަނޑުމެން ނިންމައިގެން ތިބީ ، ހާދީ ރޯދަވީއްލާނީ ، ހާދީގެ 4 އަނބިންނާ އެމީހުންނަށް ލިބިފައިވާ ދަރިންނާ އެކުގައި ކަމުގައެވެ. ކޮންމެހެން އަޅުގަނޑުމެންގެ ޢާއިލާގެ ތެރެޔަށް ހާދީމެން ވަންނާނެކަމެއް ނެތެވެ.
އެއްދުވަހަކު ، މުނީރާއާއި ހާދީ އަޅުގަނޑުމެންނާއެކު ރޯދަވީއްލަން އަންނަ ވާހަކަ ސާރާ ބުންޏެވެ. އެއީ މުނީރާ ކައިވެނިކުރިފަހުން ، ފެނިލަން ލިބޭފުރުޞަތުކަމަށްވާތީ އެއްވެސް ބަހަނާއެއް ނުދައްކަމެވެ. އެކަމަކުވެސް އެއްޗެކޭ ބުނެނުލައެއް ނުހުރެވުނެވެ.
"ހާދީ ކަހަލަ މީހަކާ އެއްމޭޒުގައި ކާންތިބޭނީ ކިހިނެއް ހެއްޔެވެ؟" އަޅުގަނޑަށް ބުނެވުނެވެ.
"ހަވީރުގެ ގަޑިޔަކީ ވަރަށް އުނދަގޫ ވަގުތުކޮޅަކަށް ވެދާނެއެވެ . އެކަމަކު ، ރަނގަޅަށް ދިމާވިކަމެއްގެ ގޮތުގައި ބަލައި ، އަހަރެމެން އެކަން ތަޙައްމަލް ކޮއްލާނީއެވެ." އަޅުގަނޑުގެ ބުރަކަށީގައި ފިރުމައިލަމުން ސާރާ ބުންޏެވެ. ހަވީރު ގަޑީގައި ، ބަނޑުހައިވެފަ ހުއްޓާ ، ނުދައްކަނވާ ވާހަކަ ދެއްކުނީމަ ވާނެގޮތް ވެއްޖެއެވެ. އަޅުގަނޑަށް ހާދީއާމެދު އެއްވެސް މިންވަރަކަށް ހިތްހަމަ ޖައްސައެއް ނުލެވޭނެއެވެ. ހާދީގެ ނަން ގަނެވޭ ކޮންމެ ވަގުތަކުވެސް ، މިޞްރުގެ ޙާދިސާގެމަތިން ހަނދާންވެއެވެ. އަޅުގަނޑު ، ޢުމުރު ހުސްވެ މަރުވުމަށްދާނދެން ، އެބިރުވެރި ، އަނިޔާވެރި ޢަމަލުތަކުގެ މަތިން ހަނދާން ނައްތައެއް ނުލެވޭނެއެވެ. ހާދީއަކީ ، ޝައިޠާނީ ވަޙުޝީ ޢަމަލުތަކަށް އަރާހުރި އިބިލީހެކެވެ. އޭނާއަކަށް އެކަމުގައި ކުޑައެއް ބޮޑެއް ނޯންނާނެއެވެ. މިޞްރުގެ އެ ޅަ އަންހެން ކުއްޖާ ނޮޅައިލީ އަޅުގަނޑުމެންގެ ލޯކުރިމަތީގައެވެ. މިވާހަކައިގާ ހާދީގެ ނަންގަނެވޭ ހަމަ ކޮންމެފަހަރަކީ ، އެބިރުވެރި އިޙްސާސްތައް ލިއްބައިދޭނެ ވަގުތެކެވެ.
"ހާދީގެ ބޭނުމަކީ ، ކޮންމެވެސް މަގަކުންލާފައި އައިސް ، ޝާހީޢާއިލާއާ ގުޅުމެވެ. އެކަން އޭނާ އެއޮތީ ކޮށްފައެވެ." އަޅުގަނޑު ބުނީމެވެ.
"އަހަރެމެންނަށް ކުރެވޭނެ އެއްވެސްކަމެއް ، މިހާރަކު ނެތެވެ. ހާދީއަކީ މިހާރު އަހަރެމެންގެ ޅިޔަނެކެވެ. އެއީ އަހަރެމެންގެ ބޭބެ ޢަލީގެ ދަރިފުޅު ، މުނީރާގެ ފިރިމީހާއެވެ. ހާދީ ހިތްހަމަނުޖެހޭ ކަމެއްކުރެވިއްޖެނަމަ ، އެކަން ބާލާނީ މުނިރާއަށެވެ!" ސާރާގެ ދެއަތްއުފުލައިލަމުން ބުންޏެވެ.
"ެއީ ، ބަލެކްމެއިލް ކުރުމެކޭ އެއްފަދަ ކަމެކެވެ." ރުޅިވެރިކަމާއެކު އަޅުގަނޑަށް ބުނެލެވުނެވެ. މަހާ ސިއްރުސިއްރުން ، އޭނާގެ ކޮއްކޮ ، ނަޝްވާގެ ކަންފަތދޮށުގައި އެއްޗެކޭ ބުނެލިއެވެ. ހަމައެއާއެކު ، އަޅުގަނޑާއި ސާރާއާ ދެމީހުންނަށް އެއްފަހަރާ އެކުދިންނާ ދިމާއަށް ލޯބޮޑުކޮށްލެވުނެވެ. އަޅުގަނޑުގެ ރުޅިގަނޑު ގަދަވިކަހަލައެވެ.
"ކަލޭމެން ދެބެން ތިހެނީ ކޮންކަމަކާ ހެއްޔެވެ؟” އަޅުގަނޑުގެ އަޑު އިވިފައި މަހާގެ މޫނުމައްޗަށް ބަދަލުތަކެއް އައެވެ. އަދި ، އަޅުގަނޑު އިތުރަށް ނުބުނެހުއްޓާ ބޮޑުދޮގެއް ހަދައިލިއެވެ.
"މަންމާއެވެ! އަހަރެމެން މިދެއްކީ ސްކޫލުން ދިމާވި އަންހެން ކުއްޖެއްގެ ވާހަކައެވެ. އެހެން ވާހަކައެއް ނުދައްކަމެވެ." މާހާ ބުންޏެވެ.
"ދަރިފުޅާ ނަޝްވާ! ދޮގަކާއެކީ ރޯދަނުވީއްލާށެވެ. މިއީ މާތްވެގެންވާ ރަމަޟާންމަސްކަން ދަރިފުޅު ހަނދާން ނެތުނީހެއްޔެވެ؟" ސާރާ ވަރަށް ލޯތްބާއެކު ނަޝްވާ އާ މުޚާތަބު ކުރިއެވެ.
ނަޝްވާ އާ މަހާއަކީ އެއްވިސްނުމެއް އަދި އެއް އާދަތަކެއް ލިބިގެންވާ ދެބެންނެވެ. ތަފާތަކީ ، މަންމަޔަށް ދޮގެއް ހެދުމަކީ ނަޝްވާއަށް ދަތިކަމެކެވެ. އެކަމަކު އަޅުގަނޑުގެ ދަރިފުޅު ވަރަށް ރީތިކޮށް ދޮގެއް ހަދާލަފާނެއެވެ.
"އެއީ އާދައިގެ ޖޯކު ވާހަކައެކެވެ. މަންމާއެވެ!" ނަޝްވާގެ އަޑު އިވުނެވެ.
"އެހެން ހެއްޔެވެ؟ އެހެންވިއްޔާ ތިޔަޖޯކު މަންމަމެންނަށްވެސް އިއްވާލަ ބަލާށެވެ!" ސާރާ ބުންޏެވެ. ނަޝްވާ މަހާއާ ދިމާއަށް ބަލައިލިއެވެ. އުނދަގޫވެފައިހުރި ގޮތަކަށެވެ. އަދި ބިރުންހުރެ ބުނެލިއެވެ.
"މާހާ ބޭނުންވީ ކަރީމަށް އަހަރެމެން ފަންޑިތައެއް ހަދާށެވެ. އޭރަށް އޭނާގެ ފިރިހެންކަން އަބަދަށް ނިކަމެތިވެގެންދާނެއެވެ." ނަޝްވާގެ މިވާހަކަޔަށް ، ސާރާއަށް ބާރަށް ބުނެލެވުނެވެ.
"ދަރިފުޅާއެވެ! ތިޔަކަހަލަ ކަންކަން ހިތަށް ނުގެންނާށެވެ. އެކަހަލަ ވިސްނުން ހިތުގައި ބާއްވާށެވެ. އެކަހަލަ ކަންކަމަކީ ހަމައެކަނި ، ﷲ ގެ ކުޅާދުންވަންތަކަމުގެ ދަށުގައިވާ ކަންކަމެވެ." މަހާ އެހައި ފަސޭހަގޮތަކަށް ދޮގެއްހަދައިލީތީ އަޅުގަނޑަށް ރުޅި އިސްކުރެވުނެވެ. އެކަމަކު ނަޝްވާއަކަށް ދޮގެއް ނުހެދޭނެއެވެ. ވަރަށް ހިތްހަމަނުޖެހިފައިހުރި ގޮތަކަށް އަޅުގަނޑު ، މަހާއާދިމާއަށް ބަލައިލީމެވެ. މަހާ އަދިވެސް ، ފަންޑިތައާއި ސިހުރުފަދަ ކަންކަން ޤަބޫލުކުރަނީ ހެއްޔެވެ ؟ މަހާއައިސް އަޅުގަނޑުގެ ގައިގާ ބައްދާލައި ރައްކައުތެރިކަން ހޯދިއެވެ. މީގެ ފަސް ހަތަރު އަހަރުކުރިން ، މަހާވަނީ އޭނާގެ ބޭބެޔަށް ސިހުރެއްހަދަންއުޅެނިކޮށް ބޭޒާރު ވެފައެވެ. އަޅުގަނޑާއި ކަރީމް ޤަބޫލުކޮށްގެން މިތިބީ ، ސިހުރު ހެދުމުގެ ނުބައިކަން މަހާއަށް ވިސްނައިދިނީމަ ، އެކަން އޭނާގެ ހިތުން ފުހެލައިގެންހުރި ކަމަށެވެ. އެކަމަކު ، އެހެންނެއް ނުވިތާއެވެ. އަޅުގަނޑުމެންގެ ޝާހީޢާއިލާގައި ، ސިހުރު ހާހޫރައަށް ތަބާވާ މީހުންތިބިކަން އަޅުގަނޑަށް އެނގެއެވެ.
އަޅުގަނޑުގެ ހިތުގައި އޮތްއެއްޗެއް ސާރާ އަކަށް ނާންގަމެވެ. އެކަމަކު ، އަޅުގަނޑުވެސް ޤަބޫލުކުރާގޮތުގައި ، މުސްކުޅިވެފައިހުރި ހާދީއަށް ކަމެއްކޮށްގެން އޭނާގެ ފިރިހެންކަމަށް ގޮތެއްވެއްޖެނަމަ ، އެއީ މުނީރާއަށް ލިބޭ ރައްކައުތެރިކަމެކެވެ. ކޮންމެގޮތެއްވިޔަސް ، ހާދީއަށް އެފަދަކަމެއް މެދުވެރިވެއްޖެނަމަ ، މުނީރާއަށް ވަރިޔަށް އެދުމުގެ ޙައްޤު ލިބިގެންދާނެއެވެ.
ސުޢޫދީ ޢަރަބިއްޔާގައި ، ފިރިމީހާ ބޭނުންއިރަކު އޭނާގެ އަނބިމީހާ ވަރިކުރެވިދާނެއެވެ. އެއްވެސް ސަބަބެއް އަދި ޢުޒުރެއް ދައްކާކަށް ނުޖެހެއެވެ. އެހެންނަމަވެސް ، ސުޢޫދީ އަންހެނުންނަކަށް އެޙައްޤެއް ނޯވެއެވެ. އެފަދަ ނަޞީބެއް ނެތެވެ. އެހެންނަމަވެސް ، ޢާއިލާ ބެލެހެއްޓުމަށް ނުކުޅެދުން އަދި އަނބިފިރިކަމުގެ ގުޅުން ހިންގަން ނުކުޅެދުންފަދަ ކަމެއް މެދުވެރިވެއްޖެ ޙާލަތެއްގައި ، އުނދަގުލުންނަމަވެސް ، އަނބިމީހާއަށް ވަރިވާން އެދުމުގެ ފުރުޞަތު އޮވެއެވެ. އެހެންނަމަވެސް އެއީ ވަރަށް އުނދަގޫ ކަމެކެވެ.
ހާދީއާއި މުނީރާ ރޯދަވީއްލަން އަތުވެއްޖެއެވެ. އަޅުގަނޑަށް ފުރަތަމަވެސް އަޅައިގަތީ ، މުނީރާގެ މޫނުމަތީގައިވާ ނުތަނަވަސްކަމާއި ބިރުވެރިކަމެވެ. މުޅިމީހާ ހުރީ ހިކި އަނަރޫފަވެފައެވެ. ހާދީއާ ދިމާކޮށްނުލައި އަޅުގަނޑަށް ކެތެއް ނުވިއެވެ.
(ނުނިމޭ)
Vvv.reethi