(9 އޭޕްރީލް 2022 ގެ ބަޔާ ގުޅޭ)
މުނީރާގެ ކައިވެނި
މުނީރާގެ ކައިވެންޏާ ގުޅިގެން، ޢަލީއާއެކު އެ ހިންގުނު ނާކާމިޔާބު މުޢާމަލާތަށްފަހު ގެޔަށްދިޔަގޮތަށްގޮސް އެނދުމައްޗަށް ވެއްޓިގަތީމެވެ. ބޮލުގައިވެސް ރިއްސާފަހުރީ ވަކިވަރަކަށްނޫނެވެ. ރޭގަނޑުގެ ކެއުމަށްވެސް ކޮޓަރިއަކުން ނުނުކުންނަމެވެ. އަޅުގަނޑަކީ، އަޅުގަނޑުގެ ޢާއިލާގެ ކާގަޑިތަކުގައި މޭޒުމަތިން ގައިމުވެސް ފެންނާނެ އެކެކެވެ. އެކަމަކު، ކާއެއްޗަކާދިލާ ބަލައިލާނެ ހިތްވަރުވެސް އެރެޔަކު ނުލިބުނެވެ. ނިދަން ވަނުމަށްފަހު، އެދުވަހު ޢަލީއާއެކު ދެކެވުނު ވާހަކަޔާއި ކަންހިނގިގޮތުގެ މަޢުލޫމާތު، އަޅުގަނޑުގެ ފިރިމީހާ ކިޔައިދިނެވެ. އެވާހަކަތައް ކުރިން އަޅުގަނޑަށް އަޑުއިވިފައި އޮތްކަމަކަށް ނުހަދަމެވެ. އަޅުގަނޑަށް ގިސްލާފައި ރޮވެންފެށިއެވެ. އަދި ކަންބޮޑުވެފައިހުރީ، އަޅުގަނޑުގެ ފިރިމީހާ، ކަރީމް، އަޅުގަނޑު މަސަލަސްކޮށްދެވޭތޯ މަސައްކަތްކުރިއެވެ.
އަނެއްދުވަހުގެ ހެނދުނަކީވެސް މާޔޫސްކަމުން ފުރިގެންވީ ވަގުތެކެވެ. ކަރީމް އޮފީހަށްދިޔައިރުވެސް، އަޅުގަނޑަށް އޮވެވުނީ ނުތެދުވެ އެނދުގައެވެ. އެނދުންތެދުވާހާ ހިތްވަރެއް ނުލިބުނެވެ. އެހެން އޮއްވާ އަނެއްކާވެސް ހަނދާންވާންފެށީ، ޢަލީއެކުޅުނު ކުޅިގަނޑުގެ މަތިންނެވެ. ހާދަހާ އަނިޔާވެރި ބަފައެކެވެ. މުނީރާ އެމީހާ ގަނޑާ އިނދެގެން އެފަކީރު އުޅެންޖެހޭނެ ނިކަމެތިޙާލު ހިތަށް ގެނެވުމާއެކު ގައިން ހީބިހި ނަގައިގަތެވެ. ބާވީސް އަހަރުގެ ޅަ ޒުވާން އަންހެންކުއްޖަކު، ދުވަސްވީ މުސްކުޅިއެއްގެ އަތުގަ ޖެހުނީމަ ދެންވާނެގޮތް، މިޞްރަށް ކުރި ދަތުރުގައި ހާދީގެ ފަރާތުން އޮތީ ފެނިފައެވެ. އެދަތުރުގައި ހާދީގެ އަނިޔާވެރިކަން ކުރިމަތިވީ މީހެއްގެ އެންމެ 8 އަހަރުވެސް ނުވާ ކުޑަކުއްޖަކަށެވެ. އެކުއްޖާއަށް ހާދީ ހަދައިލި އަނިޔާވެރި ވަޙުޝީގޮތްތައް އަދިވެސް ލޮލުގެ ކުރިމަތީ ފެންނަ ފަދައެވެ. ވަލުޖަނަވާރެއްވެސް އެހައި އަނިޔާޥެރިވެފައި ވަޙުޝީ ނުވާނެކަން ކަށަވަރެވެ. އެކަންކަމުގެ މަތިން ހަނދާންވެފައި ކުރެވޭނެ އެއްވެސް ކަމެއްނެތި އޮތް ޙާލުގައި އަޅުގަނޑުގެ ހިތަށް އައީ ހިތަށް އުނދަގޫވި ސުއާލެކެވެ.
ސުޢޫދީ އަންހެނުންގެ މިނިވަންކަމާއި ކުރިއެރުމަށް، އަދި އެމީހުންގެ ދިރިއުޅުމުގެ ޙާލަތު ރަނގަޅުކުރުމަށް، ސުލްޠާނާ އާލް ސަޢުދަށް، އަމިއްލަގޮތުން ކޮށްދެވޭނީ ކޮންކަމެއް ހެއްޔެވެ؟ ވަރަށް ކުޑަމިންވަރެކެވެ. މިއަދާ ހިސާބަށް ޙާލަތުއޮތްގޮތަށްބަލާއިރު، ސުލްޠާނާއަށް ކޮށްދެވެންއޮތީ ވަރަށް ކުޑަކަމެކެވެ. ފުރަތަމަ ފަހަރަށް، އަޅުގަނޑުގެ އަމިއްލަ ޙަޔާތުގައި އެކަން ޤަބޫލުކުރަން ޙާލަތު މިވަނީ މަޖްބޫރުކުރުވާފައެވެ. އަމިއްލަ ޢައިލާގެ އަމިއްލަ ކޮއްކޮއެއްގެ ފުރާނަ، މުސްކުޅި ވަޙުޝީ އިބިލީހެއްގެ މުށުތެރެއިން ނެރުމަށް، ކުރެވުނު ކަމެއް ނެތެވެ. ސުޢޫދީ އަންހެނުންގެ މިނިވަންކަމާއި ދިރިއުޅުމުގެ ޙާލަތު ރަނގަޅުކުރުމަށް، ސުލްޠާނާ ކުރަމުންދާ ދިރުމެއްނެތް އުއްމީދުގެ އަޞްލު ފެނިގެން އެދިޔައީ އިއްޔެއެވެ. އަމިއްލަ ޢާއިލާގެ ތެރެއިންނެވެ. އަޅުގަނޑުގެ އަމިއްލަ ނަފްސު، އަޅުގަނޑަށް މިހާރު ސިފަވަނީ، ރާބޮއެގެން، ހަށިގަނޑުންނާއި ދުލުން ވާގިދޫވެ، ލޮލުގެ ފެނުމަށް އަސަރުކުރުވާ އާރެއް ބާރެއްނެތި، މަސްތީ ޙާލަތުގައި ދެމިފައިތިބޭ މީހެއްގެގޮތަށެވެ. ހެނދުނު ސައިބުއިމުގެކުރިން ރާތަށްޓެއްބޯލުމަށް އަޅުގަނޑުގެ ހިތް މަޖްބޫރުކުރުވިއެވެ. ކާނާގެމަތިން ހަނދާން ނައްތައިލާފައި، ދިޔަގޮތަށްގޮސް ތަށިފުރެންދެން ރާ އަޅައިގެން، ނިދާކޮޓަރީގެ ބެލްކަނީގައި އިނދެ، ތަށިހުސްކުރަން ފަށައިފީމެވެ.
ގަނޑުވަރުތެރޭގެ އަމީރުންނާއި އަމީރާއިން އަދި ޝާހީ ޢާއިލާގެ ގިނަމީހުންނަކީ، ހުޅަނގުން ތަޢުލީމު އުނގެނި، އިނގިރޭސިބަސް ކިޔަވައިގެންތިބޭ ބަޔެކެވެ. ހާލަކުން މީހަކަށް އެފުރުޞަތު ގެއްލިފައި އޮވެދާނެއެވެ. އެހެނަސް، ފަހަކަށް އައިސް، ކަންހިނގަމުންގޮސްފައިވަނީ އެބީދައިންނެވެ. އެހެންކަމުން، ދުނިޔޭގެ ކުރިމަތީގައި، ޚާއްޞަކޮށް އިސްލާމީ ޤައުމުތަކުގެ ކުރިމަތީގައި، ސުޢޫދީ ޕްރިންސުންގެ ލާޗާރީ ދިރިއުޅުމުގެ ވާހަކަތަކަކީ މަޝްހޫރު ވާހަކަތަކެއްކަން އަޅުގަނޑަށް އެނގެއެވެ. ޗުއްޓީ ހޭދަކުރަން އަގުބޮޑެތި ޤައުމުތަކަށް ދާއިރު ޖެޓްގައި ގޮސް، އިޓަލީ ނުވަތަ ބޮމްބޭއިން، ބާނދީންގެ ގޮތުގައި ކުދިން ނަގައިގެން، ސަތޭކަ ނޫނީ އެއާ ކައިރިކުރާ ޢަދަދަކަށް ގްރޫޕް ހަދައިގެން މަޖާނެގުމަކީ ނުކުރާ ކަމެއްނޫނެވެ. ޗުއްޓީއަށް ގޮސްލާއިރު، 150 ކޮޓަރީގެ ދެރިސޯޓު ނުވަތަ ހޮޓަލުންވެސް ބައެއްފަހަރަށް ނުފުދެއެވެ. އެމީހުންގެ ދިރިއުޅުމަކީ އެހައިވެސް ފުދިގެންއުޅޭ ދިރިއުޅުމެކެވެ. އަޅުގަނޑުމެން، އިޓަލީއާ މިޞްރަށް ޗުއްޓީއަށް ދިޔަދަތުރުގައި، ހާދީ އާއި ޢަލީ އެއުޅުނީ އެމީހުން ޗުއްޓީހޭދަކުރާ ގޮތަށެވެ. މިޞްރު މީހުންނަކީ، ހަށިގަނޑުން ބޮޑެތިވެފައި ދޮންބަޔެއްކަމުގައިވިޔަސް، އެންމެ އަށްއަހަރުގެ ޅަ އަންހެންކުއްޖަކަށް ހާދީމެން އެކުރި ޖިންސީ އަނިޔާއަކީ، ތަންފުކެއް ބޮޑުވަރެކެވެ. ޚަތިމުން ފުރައިލެވިފައި ހުންނަ ބިތް އަލަމާރި ނުވަތަ ރެކް އަނެއްފަރާތަށް އަނބުރައިލީމައި ރާފުޅި ފެންނަންހުންނަ ގޮތަށް ގަނޑުވަރުތެރޭ، ރާބުއިން ޢާންމުވެފައި އޮންނަ ވާހަކައިގާވެސް ޙަޤީޤަތެއް އޮތުން އެކަށީގެންވެއެވެ. އަޅުގަނޑުމެންގެ ގޭގައިވެސް އެކަން، މިއޮތީ ނޫންތޯއެވެ. އަޅައިލި ތަށި މަޑުމަޑުން ބޮމުންގޮސް ހުސްވިއއިރު، ސުލްޠާނާގެ ވަސްވާސްތައް ކޮޅުންލިއެވެ. އެއިރު ހަށިގަނޑަށްވެސް ހޫނުކަންވަނީ ލިބިފައެވެ.
މިހުރިހައިކަނކަމަކާ އެކުވެސް، އަޅުގަނޑުގެ އިތުރު ހިތްދަތިކަމެއް އެބައޮތެވެ. އެއީ މިފާއިތުވެދިޔަ ދުވަސްތަކުގައި، ރާބުއިމަށް އަޅުގަނޑު ހިތްޖެހިފައިވާ މިންވަރު، މައްޗަށްގޮސްފައި އޮތުމެވެ. ރަލާނުލައި ދިރިނުއުޅެވޭމީހަކަށް އަޅުގަނޑުވަނީބާވައެވެ؟ ޢަމަލުވެގެން ކުރެވޭ ނުކުރެވޭކަމެއް ނޭނގޭވަރުވުމަކީ ރަނގަޅުކަމެއްނޫނެވެ. ރަލާބެހޭގޮތުން އަޅުގަނޑުގެ ހިތުގައި މިއުފެދިގަތް އުދާސްތަކާގުޅިގެން އަމިއްލަ ނަފްސަށް އުނދަގޫވިއެވެ. އަދި، އަތުގައި އޮތް ތަށި އަތުކޮޅަށް ހޫރައިލެވުނެވެ. އަޅުގަނޑަށް ހަޅޭއްލަވައިގަނެވުނެވެ. މިކުރެވުނީ ކިހައިދެރަކަމެއް ހެއްޔެވެ؟ އަޅުގަނޑުގެ ދެއަތުން ލޯނިވައިކޮށް ދެއަތުގެ ތެރެޔަށް މޫނުލައި އެއްކޮށް ފޮރުވައިލެވޭތޯ މަސައްކަތްކުރީމެވެ.
ކުޑައިރުއްސުރެ، އަޅުގަނޑަށް ދަސްކޮށްދީފައިއޮތީ، މަސްތުވާ ކޮންމެ އެއްޗަކީ މުސްލިމުންނަށް ޙަރާމް އެއްޗެއްކަމުގައެވެ. މަންމަ، ރަލާބެހޭގޮތުން އަޅުގަނޑަށް ކިޔައިދީފައިވާ ވާހަކަތައް އަދިވެސް ހަނދާން އެބަހުއްޓެވެ. ރާބޮއެ މަސްތުވާ މީހުންނަށް، ކައުއިތުރު ރަސޫލާ ޞައްލަﷲ ޢަލައިހި ވަސައްލަމަ، ބަދުދުޢާ ކުރައްވައިފައިވާކަމަށް، މަންމަމެން ބުނެފައި ވެއެވެ. އިސްލާމދީނުގައި ރަލާބެހޭގޮތުން އައިސްފައިވާ ޙުކުމްތަކުގައި، އެ ގެންގުޅުނު މީހެއް، ވިއްކިމީހެއް، އުފުލިމީހެއް، ބުއިމީހެއް އަދި އުނގުރި އުފުރައިލަދިންމީހެއްވެސް ހަމަހަމައެވެ. އެއިންކޮންމެ މީހަކުވެސް އެކުރަނީ ފާފައެވެ. މަންމަގެ ނަޞޭޙަތާއި އިންޒާރާ އަދި ތަރުތިއްޔަތާ ދެކޮޅަށް، އަދި މަންމަޔަށްވީ ވަޢުދާ ޚިލާފުވެ، އަޅުގަނޑު މިވަނީ، ރާފޮދެއްބޮއިލުމުން ހިތަށް އަރާމުލިބޭމީހަކަށް ވެފައެވެ.
އާލް ސަޢުދުގެ ރަސްކަމުގެ ޝާހީ ޢާއިލާގައި، ރާބޮއެހަދަނީ ހަމައެކަނި އަޅުގަނޑު އެކަންޏެއްނޫނެވެ. އަޅުގަނޑުގެ އަމިއްލަ ޢާއިލާގެ ތެރޭގައިގިނައީ ރަލާ ދޯޅު، ކޮއްކޮއިންނާއި ބޭބެއިންނާއި ދައްތައިންނެވެ. އެޙަޤީޤަތް ބަދަލެއްނުވާނެއެވެ. މާކުރީއްސުރެ ފެށިގެން ހުޅަނގުން ތަޢުލީމު އުނގެނި ޢަރަބީންގެ ސަޤާފަތާ މަސްހުނި އާދަތަކުން، ހުޅަނގަށް ބުރަވާ އެތައްބަޔަކު ޝާހީޢާއިލާގެ ތެރޭގައި އެބައުޅެއެވެ. އެބައިމީހުން، ރަލުގެބާވަތްތައް ހަމައެކަނި ވިއްކަނީއަކީނޫނެވެ. ބޯންވެސް ބޮއެވެ. ދީނާއި އިސްލާމީ އުޞޫލުތަކާ އަދި ޤާނޫނަކަށް އެމީހުންނެއް ނުބަލައެވެ. އަޅުގަނޑުމެންގެ މައިންނަށް ކަށްވަޅުގައިވެސް ނޯވެވޭނެއެވެ.
ރާބުއިމަކީ، ޤާނޫނީގޮތުން މަނާކަމެއްކަން، ސުޢޫދިއްޔާ ޢަރަބިއްޔާގައި ދިރިއުޅޭ ކޮންމެ މީހަކަށްވެސް، ވަރަށް ސާފުކޮށް އެނގޭނެއެވެ. ހަމައެއާއެކު، ރާބުއިމާގުޅިގެން ނުވަތަ ރާވިއްކުމާގުޅިގެން ކޮންމެ އަހަރަކުވެސް، ސުޢޫދީ ރައްޔިތުންނާއި ބިދޭސީންކުރެ އެތައްބަޔަކަށް، ސުޢޫދީ ޤާނޫނުގެ ދަށުން ކުށްވެރިވެ އަދަބު ލިބެއެވެ. އަދި، ސުޢޫދީ ޝާހީ ޢާއިލާގެ މެންބަރުންނަށް މިޤާނޫނު ނުހިނގާކަންވެސް އެންމެންނަށް އެނގޭ މެއެވެ. ޝާހީޢާއިލާގެ ފިރިހެނުންނަކީ ކޮންމެފަދަ ކަމެއްކުރިޔަސް އަދަބެއް ނުލިބޭނެ ބަޔަކުކަންވެސް އެންމެންނަށް އެނގޭނެއެވެ. ޝާހީޢާއިލާގެ މެންބަރުން، ހުރިހައި ޤާނޫނީ ކުށްތަކުންވެސް އޮންނަނީ އިސްތިސްނާ ކުރެވިފައެވެ.
ނިދަން އޮށޯވެ އޮވެ، ޝާހީޢައިލާގެ މެންބަރުންކުރެ ޑްރަގާއި ރަލަށް ގޮސްހުސްވެފައިތިބި މީހުންގެ، އަޅުގަނޑުގެ ދެއަތުގެ އިނގިލިން ގުނަން ފެށީމެވެ. އިނގިލިތައް ހުސްވަންދެން ގުނިއިރު، އެމީހުން ހުހެއްނުވިއެވެ. އެއީ ދެއަތުގެ އިނގިލިތަކުން ގުނާލެވޭވަރަށްވުރެ ގިނަ ޢަދަދެކެވެ. ވޭތުވެދިޔަ އަހަރުތަކުގައި މިކަންބޮޑުވެގެންގޮސް، އެކަމަށް ފަރުވާދޭ ކްލިނިކްތައް ސުޢޫދީގައިވަނީ ހުޅުވިފައެވެ. ސުޢޫދީ ޝާހީޢާއިލާގެ އަންހެންކުދިންކުރެ، ޑްރަގާއި ރަލަށް ދެވިހިފާފައިތިބޭ ކުދިން ބޭރަށްފޮނުވައިގެން ފަރުވާދޭކަށް ނުޖެހެއެވެ. އެކުދިންނަށް ނުވަތަ ޝާހީޢާއިލާގެ ޅީދަރިންނަށް މިހާރު ފަރުވާދެވެމުންދަނީ ޤައުމުގައެވެ. ދާދިމިދާކށްދުވަހުވެސް، އަޅުގަނޑުގެ ތިމާގެ އަންހެންކުއްޖަކު، ކްލިނިކަށްގޮސް އުޅެނިކޮށްވަނީ ދިމާވެފައެވެ. އެކުދިންނަށް ފަރުވާދެވެނީ ވަރަށް ޝާހީގޮތެއްގައި، މަތީ ފެންވަރުގައެވެ. ކްލިނިކްތަކުގައި މަސައްކަތްކުރާ ޑޮކްޓަރުންނާއި މުއައްޒަފުންނަކީ، މުޅިންވެސް ބިދޭސީންނެވެ. ޝާހީ ޢާއިލާގެ ރާނީއެއް ނުވަތަ ޕްރިންސަސްއެއް ކްލިނިކަށް ޒިޔާރަތްކޮށްފިނަމަ، އެ ރާނީއަކަށް 5 ނަރުހުން ޚާއްޞަ ކުރެވޭނެއެވެ. އެކުދިންނަށްވެސް އެއީ ސުޢޫދީ ޢާއިލާގެ މުއްސަނދި ޝާހީ މެންބަރުންކަން އެނގޭނެއެވެ.
(ނުނިމޭ)
