ރައީސް ޔާމީން ސަރުކާރުގައި ޢިމާރާތްކުރި ކިންގް ސަލްމާން މިސްކިތުގައި މިއަދު ނަމާދުކުރަން ފަށާނެ ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ބުނީ މި މިސްކިތުގައި މިއަދު ނަމާދުކުރަން ފަށާއިރު، ހުކުރު ޚުތުބާ ދެއްވާ އިމާމުވެ ނަމާދު ކުރައްވާނީ ޝައިޚް އިލްޔާސް ޙުސައިން ކަމަށެވެ. އަދި ސަލްމާން މިސްކިތުގެ އިމާމެއްގެ ގޮތުގައި ހަމަޖައްސާފައިވަނީ ބ. ކެންދޫ އެއްގަމުގޭ ނަސްރުﷲ އަލީ ހަމަޖައްސާފައިވާ ކަމަށެވެ.
ކިންގް ސަލްމާން މިސްކިތުގައި މިއަދުން ފެށިގެން ހުރިހާ ވަގުތެއްގައި ވެސް ނަމާދުކޮށް، ތަރާވީހު ނަމާދާއި ދަމުނަމާދު ވެސް ކުރާނެ ކަމަށް އިސްލާމިކް މިނިސްޓްރީން ބުނެއެވެ.
އިސްލާމީ މަރުކަޒުގެ އިމާމެއްގެ ގޮތުގައި މިހައިތަނަށް ހުންނެވި ނަސްރުﷲ އަކީ މިސްރުގެ އަޒްހަރު ޔުނިވަރސިޓީން، އިސްލާމިކް ޝަރީއާއިން ފުރަތަމަ ޑިގްރީ ހާސިލް ކުރައްވާފައިވާ ބޭފުޅެކެވެ. އޭނާ އިސްލާމީ މަރުކަޒުގެ އިމާމެއްގެ ގޮތުގައި މަސައްކަތް ކުރައްވަން ފެއްޓެވީ 8 އެޕްރީލް 2019ގައެވެ.
ރައީސް އަބްދުﷲ ޔާމީންގެ ސަރުކާރުގައި ސައުދީ ރަސްގެފާނުގެ ހިލޭ އެހީގައި އިމާރާތް ކޮށްފައިވާ މި މިސްކިތަކީ ދިހަހާސް މީހުންގެ ޖާގައިގެ މިސްކިތެކެވެ. ހަ ފަންގިފިލާގެ މި މިސްކިތަށް 25 މިލިއަން ޑޮލަރު ވަނީ ޚަރަދުކޮށްފައެވެ.
ސަލްމާން މިސްކިތުގައި ޤުރްއާން ކިޔަވައިދޭ ސެންޓަރަކާއި ސެމިނަރ ހޯލްތަކާއި ކްލާސްރޫމްތަކާއި ދުނިޔޭގެ ފެންވަރުގެ ލައިބްރަރީއެއް ހުރެއެވެ.
މި މިސްކިތުގައި މިއަދު ނަމާދުކުރަން ފެށިނަމަވެސް ރަސްމީކޮށް ހުޅުވާނެ ތާރީޚެއް އަދިނޭނގެއެވެ.
