ޔޫރަޕްގައި އާ ހަނގުރާމައެއް ފެށުނަ ނުދޭން އެމެރިކާއާއީ ޔުރަޕުން މަސައްކަތްކުރަމުން ދާއިރު، ރަޝިޔާއިން ޔުކްރޭނަށް އަރައިގަތުމަކީ ވަރަށް ގާތުގައި އޮތް ކަމެއް ކަމުގައި އެމެރިކާގެ ރިޔާސީ ގަނޑުވަރު ވައިޓް ހައުސްއިން އިއްޔެ ބުނެފިއެވެ.
"އަހަރުމެން ގަބޫލުކުރާ ގޮތުގައި އަހަރުމެން މިހާރު މިތިބީ ރަޝިޔާއިން ކޮންމެ ވަގުތަކުވެސް ޔުކްރޭނަށް ހަމަލާދީފާނެ މަރުހަލާއެއްގައި. އަހަރެން ބުނާނީ އަހަރުމެން އެކަން އޮތީ އަހަރުމެން ކުރިން ދެކެމުން އައި ވަރަށްވުރެ މާ ބޮޑަށް ފާޅުކޮށް ކަމުގައި." ޔުކްރޭންގެ ސަރަހައްދީ ރޮނގު ކައިރީގެ ހާލަތު "އިންތިހާއަށް ނުރައްކާ" ކަމުގައި ސިފަކުރަމުން ވައިޓް ހައުސްގެ ތަރުޖަމާނު ޖެން ސާކީ އިއްޔެ ބުނެފައި ވެއެވެ.
ޔުކްރޭންގެ ބައެއްގެ ގޮތުގައި ކުރިން އޮތް ކްރައިމިޔާއަށް އަރައި 2014 ވަނަ އަހަރު އެތަން ހިފި ރަޝިޔާގެ އެތައް ހާސް ސިފައިން ޔުކްރޭންގެ ސަރަަހައްދީ ރޮނގު ކައިރިއަށް ޖަމާކުރަމުން ދާތާ އެެތައް ހަފުތާއެއް ވެއްޖެއެވެ. މިކަމާ ގުޅިގެން ހުޅަނގުގެ ގައުމުތަކުން ބުނަމުން ދަނީ ރަޝިޔާ ސިފައިން ޔުކްރޭނަށް އަރައިގަންނަން ތައްޔާރުވަމުން ދާކަމުގައެވެ. އެހެންނަމަވެސް، ރަޝިޔާއިން ބުނަމުން ދަނީ ޔުކްރޭނަށް އަރައިގަތުމުގެ ވިސްނުމެއް ނެތްކަމުގައެވެ.
ޔުކްރޭންގެ މައްސަލައިގައި ރަޝިޔާއާ، ހުޅަނގުގެ ގައުމުތަކާ ދެމެދު ނުތަނަވަސްކަން އިތުރުވެފައި ވާއިރު، އެމެރިކާގެ ބައެެއް ޚަބަރު ފަތުރާ ބައެއް ވަސީލަތްތަކުން މިއަދު ބުނެފައިވާ ގޮތުގައި އެމެރިކާގެ އިސް ބޭފުޅުން ގެންދަވަނީ ޔުކްރޭނަށް އަސްކަރީގޮތުން އެހީވެވިދާނެ ގޮތްތަކާމެދު ވިސްނަމުންނެވެ. އޭގެތެރޭގައި ރަޝިޔާ ސިފައިންނާ ކުރިމަތިލުމަށް ޔުކްރޭން ސިފައިންގެ ގާބިލުކަން އިތުރުކުރުމާ، ބަޑިބޭހާ، މޯޓަރު ބަޑިޔާ، އެންޓި ޓޭންކް މިސައިލާ، އެންޓި އެއާކްރާފްޓް މިސައިލް ސިސްޓަމް ޔުކްރޭނަށް ދިނުން ހިމެނެއެެވެ.
ކެނެޑާއާއި، އިނގިރޭސިވިލާތުން ވެސް ދަނީ ޔުކްރޭނަށް އަސްކަރީ އެހީ ފޮނުވުމާ މެދު ވިސްނަމުންނެވެ.
އަނެއްކޮޅުން ނޭޓޯ (ނޯތު އެޓްލާންޓިކް ޓްރީޓީ އޮގަނަައިޒޭޝަން) ގެ ސެކްރެޓަރީ ޖެެނެރަލް ޖެން ސްޓޯލްޓެންބާގް ވަނީ ޔުކްރޭންގެ މައްސަލައިގައި އުފެދިފައިވާ ނުތަނަަވަސްކަން ކުޑަކުރުމަށް ރަޝިޔާއާ ނޭޓޯއާ ދެެމެދު މަޝްވަރާގެ އާ ބުރެއް ފެށުމަށް އިއްޔެ ގޮވައިލައްވާފައެވެ.
"ނޭޓޯގެ ބަައިވެރިން ތިބީ އަނެއްކާވެސް (ރަޝިޔާގެ ބޭފުޅުންނާ) ބައްދަލުކުރަން ތައްޔާރަށް.... ހަރުދަނާ ހުށަހެޅުންތަކެއް ހުށަހެޅުމަށާ، ލިޔެފައިވާ ހުށަހެޅުންތަކެއް މޭޒުމަށްޗަށް ގެނައުމަށާ، ބިނާކުރަނިވި ނަތީޖާއަކާ ހަމަައަށް ވާސިލުވުމަށް." ޖަރުމަނުގެ ޗާންސެލާ އޮލާފް ޝޮލްޒްއާއެ ބޭއްވެވި ނޫސްވެރިންގެ ބައްދަލުވުމުއްގައި ސްޓޯލްޓެންބާގް ވިދާޅުވިއެވެ.
އެހެންނަމަވެސް، ރަޝިޔާއިން ވަނީ އެގައުމުގެ ހުށަހެޅުންތަކަށް ނޭޓޯއިން އިޖާބަ ނުދެނީސް މަޝްވަރާތައް ފެށުމަށް ދެކޮޅުހަދާފައެވެ. ޚާރިޖީ ވަޒީރު ސަރްގޭ ލަވްރޯވް ވިދާޅުވީ ހުޅަނގުން އެކަށީގެންވާ ޖަވާބެއް ނުދެނީސް ވާހަކަތައް ފެށެން ނެތްކަމުގައެވެ.
