ސޫދާނުގައި ވެރިކަން ކުރާ އަސްކަރީ ލީޑަރުންނާއެކު ވީ އެއްބަސްްވުމެއްގެ ދަށުން ދެވަނަ ފަހަރަށް މަގާމާ ހަވާލުވެވަޑައިގަތް ފަހުން ދެ މަސް ނުވަނީސް ސޫދާނުގެ މަދަނީ ބޮޑުވަޒީރު ޑރ. ޢަބްދުﷲ ޙަމްދޫކް އިސްތިއުފާދެއްވައިފިއެވެ.
އިސްތިއުފާދެއްވުމަށްފަހު ގައުމީ ޓީވީ މެދުވެރިކުރައްވައި ރައްޔިތުންނާ މުޚާޠަބުކުރައްވަމުން ޙަމްދޫކް ވިދާޅުވީ ސޫދާނު ސިޔާސީ ޑިމޮރަސީއަކަށް ބަދަލުކުރުމަށް ހުރިހާ ފަރާތްތަކެއް ބައިވެރިވާ ވަށްމޭޒު މަޝްވަރާތަކެއް ފަށަން ޖެހޭކަމުގައެވެ.
އަސްކަރީންނާއި މަދަނީންނާއި ބާރުތައް ހިއްސާކުރުމުގެ އެއްބަސްވުމެއްގެ ދަށުން 2019 ވަނަ އަހަރުގެ އޮގަސްޓު މަހުގައި ބޮޑުވަޒީރުކަމާ ހަވާލުވެވަޑައިގަތް ޑރ. ޙަމްދޫކު މަގާމުން ދުރުކޮށްފައިވަނީ ފާއިތުވި އޮކްޓޯބަރު މަހުގެ 25 ވަނަ ދުވަހުއެވެ. އެއީ ސިފައިންގެ ކުއްލި އިންގިލާބެއްގައެވެ. އެހެންނަމަވެސް، ސޫދާނުގެ ޢާއްމުންގެ ގިނަ ބަަޔަކާއި، ބައިނަލްއަގުވާމީ ބާރުތަކުން ކުރިމަތިކުރި ފިއްތުންތަކުގެ ސަބަބުން ފާއިތުވި ނޮވެންބަރު މަހުގެ 21 ވަނަ ދުވަހު އޭނާވަނީ މަގާމާ ހަވާލުވެވަޑައިގެންފައެެެވެ.
ރައްޔިތުންނާ މުޚާޠަބުކުރައްވައި ދެއްކެވި ވާހަކުފުޅުގައި އޭނާ ވިދާޅުވީ "ރައްޔިތުންގެ އުތުރިއެރުން އޮތީ ކުރިއަށް" ކަމުގައެވެ.
"އަހަރެން އިސްތިއުފާ ދޭން ގަސްތުކުރީ ފުރުސަތު ތަނަވަސްކޮށްދިނުމަށް. އަދި ސޫދާނުގެ ރައްޔިތުންނަަށް އެމީހުންގެ އަމާނާތް ރައްދުކޮށްދޭން. ގައުމު ކާރިސާއަކަށް ވެއްޓުމުން ސަލާމަތްކުރަން އަހަރެންނަށް ކުރެވުނު މަސައްކަތެއް ކުރިން." ޙަމްދޫކް ވިދާޅުވިއެވެ.
އަސްކަރީ އިންގިލާބުތަކުގެ ތާރީޚެއް އޮތް ސޫދާނުގައި ކުރީގެ ޚުދްމުޚްތާރު ވެރިޔާ ޢުމަރު ޙަސަން އަލްބަޝީރު ވެރިކަމުން ދުުރުކުރި އިންގިލާބަށް ފަހު 2019 ވަނަ އަހަރު ސިފައިންނާއި މަދަނީންނާ ގުޅިގެން އުފެއްދި އިންތިގާލީ ސަރުކާރު ފުރަތަމަ ދުވަހުއްސުރެ ދަތުރުކުރަމުން ދިޔަަ އުނދަގޫ ރާސްތާއެއްގައެވެ. އެންމެ ފަހުން ސިފައިން ވަނީ ފާއިތުވި އޮކްޓޯބަރު މަހު ގެނައި އިންގިލާބެއްގައި އިންތިގާލީ ސަރުކާރު އުވާލައި، ވެރިކަމުގެ ހުރިހާ ބާރެއް ސިފައިންގެ އަތް މައްޗަށް ގެނެސްފައެވެ.
އޭރުއްސުރެ އާއްމުންގެ ގިނަ ބަޔަކު ދަނީ މަދަނީ އިންތިގާލީ ސަރުކާރަކަށް ގޮވާލައި އިހުތިޖާޖުކުރަމުންނެވެ. އަދި އިހުތިޖާޖުތައް ރޫޅާލަން ސިފައިން ބާރުގެ ބޭނުންކުރުމުގެ ސަބަބުން އެތައް ބަޔަކު ވަނީ މަރުވެފައެވެ.
ޑރ. ޢަބްދުﷲ ޙަމްދޫކް އިސްތިއުފާދެއްވި ފަހުންވެސް އިހުތިޖާޖުތައް ވަނީ ކުރިއަށް ގޮސްފައެެވެ. މަދަނީ ސަރުކާރަކާ ވެރިކަން ޙަވާލުކުރާނެކަމަށް އަސްކަރީވެރިޔާ ޖެނެރަލް ބުރްހާން ވައުދުވެވަޑައިގަތް ނަަމަވެސް ގިނަ ބަޔަކު އޭނާއަށް އިތުބާރު ނުކުރެއެވެ.
