ފަލަސްޠީނުގެ ބިމަށް ގަދަބާރުން ވެރިވެގަނެ އެ ބިމުގައި އުފައްދާފައިވާ ޔަހޫދީ ދައުލަތް، އިސްރާއީލުގެ ސަރުކާރުން 2007 ވަނަ އަހަރުން ފެށިގެން ހިސާރުކޮށްފައިވާ ޣައްޒާ (ގާޒާ) ގެ ހިސާރަށް ކޮންމެވެސް ވަަރެއްގެ ލުއިތަކެއް ދިނުމާމެދު ވިސްނަމުންދާކަމަށް އިސްރާއީލުގެ ބައެއް ނޫސްތަކުން ބުނެފިއެވެ.
ޣައްޒާ ހިސާރުކޮށްގެން އިސްރާއީލު ހާސިލުކުރަން ބޭނުންވާ އަމާޒަކީ އެ ސަރަހައްދުގައި ވެރިކަންކުރާ އިސްްލާމިކް ރެސިސްޓެންސް މޫވްމަންޓް (ހަމާސް) ގެ ސަރުކާރު ބަލިކަށިކޮށް 'ކުޑަކަކޫ މައްޗަށް ތިރިކުން' ކަމަށް ވިޔަސް ހިިސާރަށް 14 އަހަރުވެގެން ދިޔައިރުވެސް، އެ އަމާޒަށް ވާސިލު ނުވެވުނެވެ. އަދި އިސްރާއީލާ ދެކޮޅަށް ޣައްޒާގައި ރުޅިވެރިކަން އިތުރުވެ އެ ގައުމަށް ވާ ގެއްލުން ވަނީ ބޮޑުވެފައެވެ.
އެހެންކަމުން، އިސްރާއީލުން މިހާރު ވިސްނަމުން ދަނީ ހިސާރަށް ކޮންމެވެސް ވަރެއްގެ ލުއިތަކެއް ދީގެން ޣައްްޒާއަށް ހަމަޖެހުން ގެނެސް، އިސްރާއީލާ ދެކޮަޅަށް ހިންގާ އަމަލުތައް މަދުކުރެވޭތޯ ބެލުމަށެވެ.
އިސްރާއީލުން ދޭން ނިންމާފައިވާ ލުއިތަކުގެ ތެރޭގައި ފެހި ރޮނގުގެ ތެރޭގައި (1948 އިސްރާއީލު އޮތް ސަރަހައްދުން ބޭރުގައި) މަސައްކަތްކުރުމުގެ (ވަޒީފާއަށް ދިއުމުގެ) ހުއްދަ ޣައްޒާގެ މީހުންނަށް ދިނުމާއި، އަދި އިސްރާއީލުން ޣައްޒާއަށް އެތެރެކުރުން މަނާކޮށްފައިވާ ބައެއް ބާވަތްތަކުގެ މުދާ އެެތެރެކުރަން ހުއްދަދިނުން ހިމެެެެނެއެެވެ.
އެގައުމުން ކޮށްފައިވާ އަނިޔާވެރި ހިސާރުގައި ދެކަމަށް ބޭނުންކުރެވިދާނެކަށް ބެލެވޭ (ހަތިޔާރު އުފެއްދުމަށް ނުވަތަ ހަމަލާދިނުމަށްވެެސް ބޭނުންކުރެވިދާނެކަމަށް ބެލެވޭ) މުދާ އެތެރެކުރުން މަަނާކޮށްފައި ވާއިރު، އެފަދަ މުދަލުގެ ތެރޭން ޣައްޒާއަށް އެތެރެކުރުމުގެ ހުއްދަ ދޭނެ މުދާ ކަނޑައެޅުމާ ގުޅޭގޮތުން އިސްރާއީލުން އދ.އާ މަޝްވަރާކުރަމުންދާ ކަމަށްވެސް ބައެއް ނޫސްތަކުން ބުނެފައި ވެއެވެ.
މީގެ އިތުރަށް، ޣައްޒާގެ ރައްޔިތުންނަށް ޤުދްސުގައި ހުންނަ މަސްޖިދުލް އަޤްޞާއަށް ޒިޔާރަތްކުރުމުގެ ހުއްދަދިނުމާމެދުވެސް އިސްރާއީލު ސަރުކާރުން ވިސްނަމުންދާ ކަމުގައި އިސްރާއީލުގެ ބައެއް ނޫސްތަކުން ބުނެފައި ވެއެވެ. މިފަދަ ބާވަތްތަކުގެ ތެރޭގައި ޣައްޒާގެ މަސްވެރިންގެ މަސް ބޯޓުތައް މަރާމާތުކުރުމަށް ބޭނުންވާ ފައިބަގްލާސް އަދި މުވާސަލާތީ ޚިދުމަތްތަކަށް ބޭނުންކުރާ ބައެއް ސާމާނު ހިމެނެއެވެ. މި ތަކެއްޗަކީ ޑްރޯންއާއި މިސައިލް ފަދަ ތަކެތި އުފެއްދުމުގައި ބޭނުންކުރެވިދާނެ ތަކެއްޗެވެ.
ހިސާރުގެ ސަބަބުން ޣައްޒާގެ ރައްޔިތުންނަށް ދަތި އުދަނގޫ ދިރިއުޅުމެއް އުޅެންޖެހިފައި ވާއިރު، ދޭތެރެ ދޭތެރޭން އިސްެރާއީލު ސިފައިންދޭ އުދުވާނީ ހަމަލާތަކުގައި ކުށެއް އެތައް އާއްމުންނެއް ޝަހީދުވަމުންދާކަން ވެސް ފާހަގަކޮށްލަން ޖެހެއެވެ.
ފާއިތުވި މޭ މަހު އިސްރާއީލުން ޣައްޒާއަށް ދިން އުދުވާނީ ހަމަލާގައި 206 މީހުން ޝަހީދުވެފައިވާއިރު، އެތައް ހާސް ބައެއްގެ ގެދޮރު ވަނީ ސުންނާފަތިވެފައެވެ.
