'އިސްލާމޮފޯބިޔާ'އާ ދެކޮޅަށް، ނުވަތަ އިސްލާމްދީނާމެދު ނަފްރަތު އުފެދޭފަދަ ވާހަކަދެއްކުމާ ކަންކަންކުރުމާ ދެކޮޅަށް މަސައްކަތްކުރާ އޮފީހެއް އެމެރިކާގެ ސްޓޭޓް ޑިޕާޓްމަންޓް (ޚާރިޖީ ވުޒާރާ) ގެ ދަަށުން އުފެެއްދުމާ ބެހޭ ބިލެއް އެމެރިކާގެ ގާނޫނުހަދާ މަޖިލީހުގެ ދަށުގެ، ހައުސް އޮފް ރެޕްރެޒެންޓެޓިވްސްއިން ފާސްކޮށްފިއެވެ. ހައުސްގައި އަޣުލަބިއްޔަތު އޮތް ޑިމޮކްރެޓިކް ޕާޓީގެ ފަރާތުން މިނެސޯޓާ ތަމްސީލުކުރައްވާ މުސްލިމް މެންބަރު އިލްހާން ޢުމަރު އެކުލަވާލެއްވި މި ބިލް ފާސްވީ 219 ވޯޓުންނެވެ. މި ބިލާ ދެކޮޅަށް 212 މެންބަރުން ވޯޓުދެއްވާފައި ވެއެވެ.
މި ބިލް ހަައުސް އޮފް ރެޕްރެޒެންޓެޓިވްސްއަށް ހުށަހަޅަން ޑިމޮކްރެޓިކް ޕާޓީން ނިންމީ ހައުސްގައި ރިޕަބްލިކަން ޕާޓީ ތަމްސީލުކުރައްވާ މެންބަރެއް ކަމުގައިވާ ލޯރެން ބޯބާޓް، އިލްހާން ޢުމަރުއާ ދިމާކުރައްވައި އިސްލާމްދީނަށް ފުރައްސާރަކުރައްވައި ވާހަކަދެއްކެވުމާ ގުޅިގެންނެވެ.
މެންބަރު އިލްހާން ޢުމަރު އެކުލަވައިލެއްވި މި ބިލުގައި ވާގޮތުން އިސްލާމްދީނާމެދު ނަފްރަތު އުފައްދާ ވާހަކަތަކާއި އަމަލުތައް މޮނިޓަރކޮށް އެކަމާ ދެކޮޅަށް މަސައްކަތްކުރާ ޚާއްސަ މަންދޫބުގެ މަގާމު އުފައްދަން ޖެހެއެވެ. އަދި ގައުމުތަކުގެ ސަރުކާރުން މުސްލިމުންނާ ދެކޮޅަށް ހިނގާ އަނިޔާވެރި އަމަލުތަކުގެ މައުލޫމާތޫ ސްޓޭޓް ޑިޕާޓްމަންޓްގެ އިންސާނީ ހައްގުތަކާބެހޭ އަހަރީ ރިޕޯޓުގައި ހިމަނަން ޖެހެއެވެ.
"އިސްލާމްދީނާ ދެކޮޅަށް ހަރުކަށި އަަމަލުތައް ހިންގުމާއި، މުސްލިމުންނާމެދު ތަފާތުކުރުން ހައިރާންވާފަދަ މިންވަރަކަށް އިތުުރުވެފައިވާ ދުވަސްވަރެއްގައި އަހަރުމެން އުޅެމުން މިދަނީ.... އިސްލާމްދީނާމެދު ނަފްރަތު އުފެދޭ ވާހަކަތަކާއި އަމަލުތައް ވެފައިމިވަނީ ދުނިޔޭގައި އާއްމުވެފައި. މިކަމާ ދެކޮޅަށް ކުރެވޭ ބައިނަލްއަގުވާމީ މަސައްކަތުގައި އަހަރުމެން އިސްކޮށް ހަރަކާތްތެރިވާން ޖެހޭ." މި ބިލާމެދު ހައުސްގެ ތަޅުމުގައި ވާހަކަފުޅު ދައްކަވަމުން އިލްހާން ޢުމަރު ވިދާޅުވިއެވެ.
މެންބަރު ލޯރެން ބޯބާޓް ވަނީ ސޯމާލިޔާއަށް އުފަން އިލްހާން ޢުމަރުއަކީ "ޖިހާދީ ގްރޫޕެއް"ގެ މެންބަރެއްގެ ގޮތުގައި ސިފަކުރައްވައި ފާއިތުވި ނޮވެންބަރު މަހު ވާހަކަދައްކަވާފައެވެ. އޭނާގެ މިއަމަލާ ގުޅިގެން އޭނާ ހައުސްގެ ކޮމިޓީތަކުގެ މެންބަރުކަމުން ވަކިކުރުމަށް ޑިމޮކްރެޓިކް މެންބަރުން ގޮވައިލެއްވިއިރު، ރިޕަބްލިކަން މެންބަރު ނޭންސީ މޭސްވެސް ވަނީ އޭނާގެ މިއަމަލު ކުށްވެރިކުރައްވާފައެވެ.
މެންބަރު ލޯރެން ބޯބާޓް ވަނީ އޭނާއަށް ކުރިމަތިވި ގިނަ ފާޑުކިއުންތަކަށް ފަހު، "މުސްލިމް މުޖުތަމައުގެ އެއްވެސް މީހަކަަށް އަހަރެންގެ ފަރާތުން ނޭދެވޭ ވާހަކައެއް ރައްދުކުވެވިފައިވާނަމަ އެކަމަށް މާފަން އެދެން" ކަމަށް ވިދާޅުވެފައެވެ. އެެެހެން ނަމަވެސް ޑިމޮކްރެެޓިމް މެންބަރުން ވަނީ އެއީ އިލްހާން ޢުމަރުގެ ކިބައިން މާފަށްއެދުން ކަމުގައި ނެބެލެވޭނެކަމަށެވެ.
ކުޑަކުއްޖެއްގެ ގޮތުގައި ސޯމާލިޔާއިން އެމެރިކާއަށް ހިޖުރަކުރި އިލްހާން ޢުމަރު ވަނީ ހައުސްގެ މެންބަރުކަމަށް ދެވަނަ ދައުރަކަށް ހޮވިވަޑައިގެންފައެވެ. އޭނާއަކީ ހައުސްެގެ ފްރިން ރިލޭޝަންސް ކޮމިޓީގެ މެންބަރެކެވެ. އޭނާ ގެންދަވަނީ މުސްލިމުންނާ، ފަލަސްޠީނުގެ ރައްޔިތުންގެ ހައްގުގައި އަޑުއުފުއްލަވަމުންނެވެ.
