އީރާނުގެ ނަތަންޒް ނިއުކުލިޔާ މަރުކަޒު ކައިރީގައި ރޭގެ ވަގުތެއްގައި ގޮވި ބާރުގަދަ ގޮވުމާ ބެހޭ ތަފްސީލު އީރާނުން ހާމަކޮށްފިއެވެ. އެ މަަރުކަޒަކީ މީގެ ކުރިން އިސްރާއީލުގެ ޓެރަރިސްޓު ހަމަލާގެ ޝިކާރައަކަށް ވެފައިވާ ތަނަކަށް ވާތީ، ރޭގެ ގޮވުމާ މެދުވެސް ކަންބޮޑުވުން އޮތީ އުފެދިފައެވެ.
ރޭ 8:15 (ރާއްޖޭ ގަޑިން ރޭގަނޑު 9:45) ހާއިރު ނަތަންޒު ނިއުކުލިޔާ މަރުކަޒާ 20 ކިލޯމީޓަރު ދުރުގައި އޮން ބަދްރޫދްގައި ބާރުގަދަ ގޮވުމެއް ގޮވައި ގަދަ އައްޔެއް ވަނީ އަރައިގެން ގޮސްފައެވެ.
މި ގޮވުމާ ގުޅިގެން ފުރަތަމަ އަޑު ފެތުރުނީ ނަތަންޒް މަރުކަޒާ ދިމާއަށް ކޮންމެވެސް ފަރާތަކުން ފޮނުވި މިސައިލެއް ވައްޓާލަން އީރާނުގެ ވައިގެ ދިފާއީ ބާރުން މިސައިލް ވައްޓާލާ މިސައިލެއް ފޮނުވީ ކަމަށެވެ.
ނަމަވެސް، އީރާނުގެ ސަލާމަތީ ބާރުތަކާ ގާތް ގުޅުމެއް އޮންނަ ނޫރްނިއުސްއިން ވަނީ ރޭގެ ގޮވުމުގެ ހަގީގަތް ހާމަކޮށްފައެވެ. އެ އޮންލައިން ނޫހުން ހާމަކުރި ގޮތުގައި ބިމުން ޖައްވަށް ފޮނުވާ މިސައިލެއް ވަނީ ވައިގެެ ތެރޭގައި ގޮއްވާލާފައެވެ. އެއީ، ހަަމަލާއަކަށް އަވަހަށް ރައްދު ދިނުމަށް ކުރިއަށް ތަމްރީނެއްގައި ކުރި ޓެސްޓެކެެވެ.
ނަތަންޒް މަރުކަޒުގެ ވަަށައިގެން ހިނގާ ކަންކަމާމެދު ސަމާލުކަން އިތުރުވެފައި ވަނީ އީރާނަށް ދުވަހަކުވެސް ނިއުކުލިޔާ ހަތިޔާރު އުފުއްދުމުގެ ފުރުސަތު ނުދޭނެކަމަށާ، އެކަން ހުއްޓުވަން އީރާނަށް އަސްކަރީ ހަމަލާވެސް ދޭނެކަމަށް އިސްރާއީލުން އިންޒާރުދެމުން ދާތީއެވެ
އީރާނުގެ ރަސްމީ އިދާރާތަކުން ބުނެފައި ވަނީ ނަތަންޒް ކައިރީގައި މިހާރު ކުރިއަށްދާ ތަމްރީނުތަކަކީ އެތަނުގެ ވަށައިގެން ދިފާއު ވަރުގަދަ ކުރުމަށް ބާއްވަމުން އަންނަ ތަމްރީނުތަކުގެ ބައެއް ކަމުގައެވެ. އަދި ރޭގެ ގޮއްވާލުމަކީ ކޮންޓްރޯލްކޮށްގެން ގޮއްވާލި ގޮއްވާލުމެއް ކަމުގައްޔާއި، އެ ގޮވުމުގެ ސަބަބުން އެެއްވެސް ތަނަކަށް ގެއްލުންވެފައި ނުވާކަމުގައެވެ.
އިސްރާއީލުގައި މިހާރުވެސް މަދުނޫން އަދަދަކަށް ނިއުކުލިޔާ ހަތިޔާރު ހުރިއިރު، އީރާނުން ބުނެފައި ވަނީ އެގައުމުން އެއް އިރެއްގައި ނިއުކުލިޔާ ހަތިޔާރު އުފަންދަން މަސައްކަތް ނުކުރާ ކަމަށެވެ. އީރާނުން ތުހުމަތުކުރާ ގޮތުގައި ފާއިތުވި އަހަރު ނަތަންޒް ނިއުކުލިޔާ މަރުކަޒަށް ދިން ދެ ހަމަލާއާއި، ކަރާޖްގައި ހުންނަ ސެންޓްރިފިއުޖް ވޯކްޝޮޕަށް މިއަހަރު ދިން ހަމަލާއަކީ އިސްރާއީލުން ދީފައިވާ ހަމަލާތަކެކެވެ. އަދި އެގައުމުން ސިފަކުރާ ގޮތުގައި އެއީ ނިއުކުލިޔާ ޓެރަރިޒަމެވެ.
އަނެއްކޮޅުން، ދުނިޔޭގެ ބޮޑެތި ބާރުތަކާއެކު އީރާނުން ވެފައިވާ ނިއުކުލިޔާ އެއްބަސްވުމުން އެމެރިކާ ވަކިވުމުގެ ސަބަބުން އުފެދިފައިވާ ނުތަނަަވަސްކަން ކުޑަކޮށް އެމެރިކާ އަލުން އެ އެއްބަސްވުމަށް އެނބުރި އައުމާ ގުޅޭ ގޮތުން އޮސްޓްރިޔާގެ ވެރިރަށް ވިއެނާގައި ކުރިއަށްދާ މަޝްވަރާތަކުގެ ހަތް ބުރު ނިމުނު އިރުވެސް، އެދެވޭ ކުރިއެރުމެއް ލިބިފައިނުވާތީ، މަޝްވަރާތަކުގެ އަށްވަނަ ބުރެއް ފެށުމަށް މިހާރު އަންނަނީ ތައްޔާރުވަމުންނެވެ.
