ފަލަސްޠީނުގެ ޒައިތޫނި ދަނޑުތަކުން ޒައިތޫނި ބިންނަ މޫސުން އައިސްފައިވާއިރު، ދަނޑުވެރިންނަށް ވަނީ ބޮޑު ގެއްލުމަކާ ކުރިމަތިލާން ޖެހިފައެެވެ. އެއީ ހުޅަނގު އައްސޭރީގައި ބައިނަލްއަގުވާމީ ގާނޫނުތަކާ ޚިލާފަށް ހަދާފައިވާ ޔަހޫދީ އާބާދީތަކުގައި ދިރިއުޅޭ ޔަހޫދީ ވަޒަންވެރިން ދަނޑުތަކަަށް ހަމަލާދީ ގެއްލުން ދިނުމެވެ.
ޒައިތޫނީ ބިންނަ މޫސުން މި އޮކްޓޯބަރު މަހުގެ 12 ވަނަ ދުވަހު ފެށިފައިވާއިރު، ޔަހޫދީ ވަޒަންވެރިން ދަނީ ދަނޑުވެރިންނަށް ހަމަލާދީ އަނިޔާކުރުމުގެ އިތުރަށް ގަސްތައް ހަލާކުކޮށް، އުފުރަމުންނެވެ.
ފަލަސްޠީނު ދަނޑުވެރިންގެ އިތުރަށް، މަދަނީ ޖަމާއަތްތަކުންނާއި، ފަލަސްޠީނުގެ އަދި އެހެން ގައުމުތަކުގެ ދަރުމަވެރިން ވަނީ ޔަހޫދީ ވަޒަންވެރިން ފަލަސްޠީނުގެެ ޒަައިތޫނި ދަނޑުތަކުން ގަސް އުފުރާ މަންޒަރާއި، ބިނދެފައި ހުރި ޒައިތޫނި ވަގަށް ގެެންދާ މަންޒަރާއި، ބައެއް ދަނޑުތަކުގައި ރޯކުރާ މަންޒަރު ވީޑިއޯކޮށްފައެވެ.
ހުޅަނގު އައްސޭރީގެ މަސްރަހު ގާތުން ބަލައި ދިރާސާކުރާ ފަރާތްތަކުން ބުނާގޮތުގައި މިފަދަ ހަމަލާތައް އެންމެ ގިނައިން ދީފައި ވަނީ ހިފާފައިވާ ހުޅަނގު އައްސޭރީގެ އުތުރުގައި ނާބުލުސް އަދި ސަލްފިތު އަވަށްތަކުގެ ކައިރީގައެވެ.
ފަލަސްޠީނު ދަނޑުވެރިންނާ ދެކޮޅަށް ދޭ ހަަމަލާތައް ދިރާސާކުރާ ޣައްސާން ދަޣުލާސް ބުނި ގޮތުގައި މި އަހަރުގެ ޒައިތޫނި ބިންނަ މޫސުން ފެށުނު ފަހުން އެފަދަ 58 ހަމަލާ ރިކޯޑުކުރެވިފައި ވެއެވެ. އަދި ނާބުލުސް ކައިރީގައި އޮންނަ ބޫރީން އަވަށުގައި އެކަނިވެސް 9 ހަމަލާ ދީފައި ވެއެެވެ.
"މިއީ ހަމަ އެހެން ތިބެފައި ކުރާ ކަމެއް ނޫން. ރާވައިގެން ކުރާ ކަމެއް." އޭނާ ބުންޏެވެ.
ޒައިތޫނި ގަސް ހެއްދުމަކީ ފަލަސްޠީނުގެ އެންމެ ގިނަ ބަޔަކު އާމްދަނީ ހޯދުމަށް ކުރާ މަސައްކަތެވެ. 80 ހާހާއި 1 ލައްކައާއި ދެމެދުގެ އާއިލާތަކަށް އާމްދަނީ ލިބެނީ ޒައިތޫންޏާއި،ޒައިތޫނި ތެލުންނެވެ.
ފަލަސްޠީނުގެ ނިއުސް އެޖެންސީ 'ވަފާ'އިން ބުނިގޮތުގައި މި މަހުގެ 12 ވަނަ ދުވަހު ޔަހޫދީ ވަޒަންވެރިން ވަނީ ހުޅަނގު އައްސޭރީގެ ސަބަސްޠިޔާ އަވަށަށް އަރައި 900 ޅަ ގަސް އުފުލާފާއެވެ. އަދި ބިނދެފައި ހުރި ޒައިތޫނި ވަގަށް ގެންގޮސްފައެވެ. ފަލަސްޠީނުގައި ހުންނަ އދ.ގެ އޮފީހުން އަންދާޒާކުރާ ގޮތުުގައި 2020 ވަނަ އަހަރުން ފެށިގެން މިހާތަނަށް ޔަހޫދީ ވަޒަންވެރިން ދިން ހަމަލާތަކުގައި ފަލަސްޠީނު ދަނޑުވެރިންގެ 9 ހާސް ޒައިތޫނި ގަސް އަންދާލާފައި ނުވަަތަ އުފުރާލާފައި ވެއެވެ.
އިސްރާއީލުގެ ދިފާއީ ވަޒީރު ބުނީ ފަލަސްޠީނު ޒައިތޫނި ދަނޑުތަކަަށް ދޭ ހަަމަލާތައް ހުއްޓުވުމަށް "ރޭވުންތެރިކަމާ، ބާރުވެރިކަމާއެކު، ދޫދިނުމެއް ނެތި" މަސައްކަތްކުރުމަށް އިސްރާއީލުގެ ދީފާއީ ބާރަށް އަންގާފައިވާ ކަމުގައެވެ. އެހެންނަމަވެސް، ފަލަސްޠީނު މީހުން ދެކޭ ގޮތުގައި އިސްރާއީލުން މި ހަމަލާތައް ހުއްޓުވަން އެކަށީގެންވާ މަސައްކަތެއް ނުކުރެއެވެ.
