އިރާގުގެ ވެރިރަށް ބަޣުދާދުގެ ތޮއްޖެހިފައިވާ ބާޒާރެއްގައި ބޮމެއް ގޮއްވާލުމުގެ ސަބަބުން 35 މީހުން މަރުވެއްޖެއެވެ.
މިބޮން ގޮއްވާލާފައި ވަނީ ބަޣުދާދުގެ ސަދްރު ސިޓީގެ އަލްވުޙައިލާތު ޕަބްލިކް މާރކެޓްގައި ރޭ އީދަށް ބާޒާރުކުރާ މީހުން އެންމެ ގިނަވި ވަގުތުގައެވެ. ސަލާމަތީ ބާރުތަކުގެ ފަރާތުން ވާހަކަދެއްކި މީހަކު ބުނި ގޮތުގައި މަރުވި މީހުންގެ ތެރޭގައި 7 ކުޑަކުދިންނާއި، 8 އަންހެނުން ހިމެނެއެވެ. އަދި 60 މީހަކު ޒަޚަމްވެފައި ވެއެވެ.
ރޭ ބޮން ގޮއްވާލި އަވަށަކީ އިރާގުގައި ނުފޫޒުގަދި ޝީޢާ ލީޑަރު މުޤްތަދާ އައްޞަދްރުއަށް ތާއީދުކުރާ މީހުން އެންމެ ގިނަ އެއް އަވަށެެވެ.
ހަރުކަށި ހަނގުރާމަވެރި ޖަމާއަތް އިސްލާމިކް ސްޓޭޓް (އައިއެސް) އިން ވަނީ މިހަމަލާގެ ޒިންމާ އުފުލާފައެވެ. އެ ޖަމާއަތަށް ތާއީދުކުރާ ވެބްސައިޓެއްގައި ބުނެފައިވާ ގޮތުގައި މިހަަމަލާދީފައި ވަނީ އެ ޖަމާއަތުގެ 'އަބޫޙަމްޒާ' ކިޔާ މީހަކު އޭނާގެ ގައިގާ ހަރުކޮޮށްފައިވާ ގޮވާ ތަކެތި ޝީޢާއިންގެ ގިިނަ ބަޔަކު އެއްވެފައި ތިބި ތަނެއްގައި ގޮއްވާލައިގެންނެެެވެ.
ސިއްޙީ ދާއިރާގެ އޮފިޝަލުން ޚަބަރުދޭ ގޮތުގައި ޒަޚަމްވެފައިވާ ބައެެއް މީހުންްގެ ހާލު ދެރަކަމުން، މަރުވާ މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.
ސަލާމަތީ ބާރުތަކުގެ ފަރާތުން ވާހަކަދެއްކި އޮފިސަރަކު ބުނިގޮތުގައި ބޮންގޮއްވާލި ސަހަރައްދުގެ ފެޑެރަލް ޕޮލިސް ރެޖިމެންޓްގެ ކޮމާންޑަރު މިހާރު ވަނީ ބޮަޑުވަޒީރު މުސްޠަފާ އަލްކާޡިމީގެ އަމުރުފުޅަށް ހައްޔަރުކޮށްފައެވެ.
މިއީ މިި އަހަރުގެ ތެރޭގައި ބަޣުދާދުގެ ޞަދްރް ސިޓީގައި ބޮމެއް ގޮއްވާލި ތިންވަނަ ފަހަރެވެ. ޖޫން މަހުގެ ތެރޭގައި އެ ސިޓީގެ މާރުކޭޓެއްގެ ކިއޮސްްކެއްގައި ބާއްވާފައި އޮތް ބޮމެއް ގޮވުމުގެ ސަބަބުން 15 މީހުން މަރުވެފައި ވެއެވެ. އެޕްރީލް މަހުގެ ތެރޭގައި ބާޒާރެއްގައި ކާރު ބޮމެއް ގޮއްވާލުމުގެ ސަބަބުން 4 މީހުން މަރުވެފައި ވެއެވެ.
