އިރާގުގެ ބޮޑުވަޒީރު ޙައިދަރު އަލްޢައްބާދީގެ އަމުރުފުޅަށް އެގައުމުގައި މަރަށް ހުކުމްކޮށްފައި ތިބި އިސްލާމިކް ސްޓޭޓް (އައިއެސް) ގެ ހަނގުރާމަވެރިންގެ ތެރެއިން 12 މީހެއްގެ މައްޗަށް އިއްޔެ މަރުގެ ހުކުމް ތަންފީޒުކޮށްފިއެވެ.
މި 12 މީހުން މަރާފައިވަނީ އައިއެސް އިން ހިފަހައްޓާފައި ތިބި 8 މީހަކު މަރާލުމުން އެކަމުގެ ބަދަލު ހިފުމުގެ ގޮތުންނެވެ. އަލްޢައްބާދީ އިއްޔެ އަމުރުކުރައްވާފައިވަނީ އައިއެސްގެ ހަނގުރާމަވެރިންގެ މައްޗަށް "ވަގުތުން" ހުކުމް ތަންފީޒުކުރުމަށެވެ. އިރާގު ސަރުކާރުން ބުނީ އެ 12 މީހުންނަކިވެސް އިސްތިއުނާފުގެ މަރުހަލާތައް ނިމިފައި ތިބިމީހުން ކަމުގައެވެ.
އެމީހުންގެ ހުކުމް ތަންފީޒުކުރީ ކޮން ގޮތަކަށް ކަމަށް އިރާގު ސަރުކާރުން ނުބުނި ނަމަވެސް އިރާގުގައި އާއްމުކޮށް މަރުގެ ހުކުމް ތަންފީޒުކުރަނީ ދަންޖައްސައިގެންނެވެ.
އީރާގުގައި އައިއެސްއާ ގުޅިގެ ހަނގުރާމަކުރުމުގެ ކުށުގައި 300 އެއްހާ މީހުން މަރަށް ހުކުމްކޮށްފައި އެބަތިއްބެވެ. އޭގެ ތެރޭގައި 100 އަންހެނުންވެސް ހިމެނެއެވެ. މީގެ އިތުރަށް އެތައް ސަތޭކަ ބަޔަކު އުމުރަށް ޖަލަށް ލާފައިވެސް އެބަތިއްބެވެ.
އައިސް އިން ހިފަހައްޓާފައި ތިބި އިރާގު މީހުންގެ ތެރެއިން 8 މީހަކު މަރާފައި ބަޣުދާދު އުތުރުގައި އޮތް ހައިވޭއެއްގެ ކައިރިއަށް އެއްލާލާފައި ވަނިކޮށް ފެނިފައި ވަނީ ބުރާސްފަތި ދުވަހުއެވެ.
ބޮޑުވަޒީރު އަލްޢައްބާދީގެ ކުއްލި އަމުރުފުޅު އައިސްފައި މިވަނީ އައިއެސްއާ މުޢާމަލާތްކުރެއްވުމުގައި އޭނާ މަޑުމައިތިރިގޮތް އިޚްތިޔާރުކުރައްވާކަމުގެ ޝަކުވާތައް ގިނަވެފައި ވަނިކޮށެވެ.
އީރާގުން ވަނީ އައިއެސްއާ ދެކޮޅަށް ފާއިތުވި ޑިސެންބަރު މަހު ހަނގުރާމަ އިއުލާނުކޮށް، އެމީހުންގެ ހިފައިގެން ތިބި ހުރިހާ ބޮޑެތި ރަށަކުން އެމީހުން ބޭރުކޮށްފައެވެ.
