ތިބާ އަށް ފެންނަ ކޮންމެ އެއްޗެއް، ތިބާގެ ހަށިގަނޑާއި، އުޅޭ ގަެއާއި، އިށީންނަ ގޮނޑިއާއި، ބައްޕަ އާއި، މަންމަ އާއި، ގަސްގަހާގެއްސާއި، ދޫންޏާއި، މޭވާ އާއި މި ނޫނަސް ފެންނަ ކޮންމެ އެއްޗަކާއި، ޚިޔާލު ކުރެވޭ ކޮންމެ އެއްޗަކީ ބިގް ބޭންގ އޭ ކިޔާ ބޮޑު ގޮވުމެއްގެ ސަބަބުން އެޓޮމްތަކެއް އެއް ތަނަކަށް ޖަމާ ވުމުގެ ސަބަބުން އުފެދުނު އެއްޗެތިކަން އެނގޭ ހެއްޔެވެ؟ މި ބުނެވުނު ގޮވުމުގެ ސަބަބުން ކާއިނާތުގެ ކަންތައްތައް ވަކި ނިޒާމަކަށް ފެތިގެން ދިޔަކަން އެނގޭ ހެއްޔެވެ? އެންމެ ރަނގަޅެވެ. އެހެން ވެއްޖެއްޔާ އެ ކިޔާ ބިގް ބޭންގ ނުވަތަ ބޮޑު ގޮވުމަކީ ކޮބައި ހެއްޔެވެ؟
ފާއިތުވެ ދިޔަ ޤަރުނުގެ ތެރޭގައި ޓެކްނޮލޮޖީގެ ތަރައްޤީ އާއެކު ކުރެވުނު އެތައް ތަޖްރިބާ އަކާއި ބެލުނު އެތައް ބެލުމަކާއި ޖެހުނު އެތައް ހިސާބަކުން އެނގުނު ގޮތުގައި ކާއިނާތު ވުޖޫދަށް އައީ ކަނޑައެޅުނު ކޮންމެވެސް ވަގުތެއްގައެވެ. އާދެ، ކާއިނާތުގެ ފެށުމެއް އެބަ އޮތެވެ. ސައިންސްވެރިން އެއްބަސްވާ ގޮތުގައި މި ކާއިނާތު ދަނީ ކެނޑިނޭޅި ފުޅާވަމުން، ހެދި ބޮޑު ވަމުންނެވެ. އެހެންވީމާ، އެ މީހުން ޤަބޫލު ކުރާ ގޮތުގައި، މި ގޮތަށް ފުޅާ ވަމުން، ހެދި ބޮޑު ވަމުންދާ ނަމަ ނުވަތަ އެނބުރި އައި ތަނަށް ރުޖޫޢަވާ ކަހަލަ ގޮތަކަށް ބަދަލު އަންނަ ނަމަ، އެ ބޮޑު ވުމެއް ނުވަތަ ފުޅާ ވުމެއް ފެށިފައި ވާނީ ކަނޑައެޅޭ ވަކި ޕޮއިންޓަކުންނެވެ. ސައިންސްވެރިން ގަބޫލު ކުރާ ގޮތުގައި ކާއިނާތު އުފަންވީ މި ބުނެވުނު ޕޮއިންޓާ ހަމައިން ގޮވާފައިވާ ގޮވުމަކުންނެވެ. މި ގޮވުމަށް އިނގިރޭސި ބަހުން ކިޔާ ނަމަކީ ބިގް ބޭންގ އެވެ.
ބިގް ބޭންގ އަށް ފަހު ކާއިނާތުގެ ނިޒާމު ވަކި ހަމައަކަށް ހިނގަން ފެށި ފެށުމަކީ އެއްގޮތަކަށް ވެސް އާދައިގެ ކަމެއް ކަމުގައެއް ނުބެލެވޭނެއެވެ. ދުނިޔޭގައި ހިނގާ ގޮވުން ތަކަށް ނިކަން ބަލައިލަ ބަލާށެވެ. މި ދުނިޔޭގައި އެތައް ހާސް ވައްތަރެއްގެ އެއްޗެހި އެބަ ގޮވައެވެ. އެކަމަކު އެއިން ގޮވުމެއްގެ ނަތީޖާއެއްގެ ގޮތުން އެއްވެސް ކަހަލަ ނިޒާމެއް ތަޢާރަފެއް ނުވެއެވެ. މިޔާ ޚިލާފަށް އެއިން ކޮންމެ ގޮވުމެއްގެ ސަބަބުން ނުކުންނަނީ ހިތާމަވެރި، ހަލާކު ކުރުވަނިވި، ދެރަ ނަތީޖާ ތަކެވެ. މިސާލަކަށް އެޓޮމް ބޮމެއް ނުވަތަ ހައިޑްރޯޖަން ބޮމެއް ނުވަތަ އަލިފާން ފަރުބަދައެއް ގޮވުން ނުވަތަ މި ނޫނަސް އިރާއި ނުވަތަ އެ ނޫންވެސް ޤުދްރަތީ ކަމަކާ ގުޅިގެން ގޮވާ ގޮވުމެއްގެ ނަތީޖާ އަބަދު ވެސް ފެންނަނީ ގެއްލުންދެނިވި ގޮތަކަށެވެ. އެއްޗެއް ގޮވުމުގެ ސަބަބުން ބިނާކުރުވަނިވި ނަތީޖާއެއް ނުވަތަ ފައިދާކުރުވަނިވި ނަތީޖާއެއް ނުނުކުމެއެވެ.
އެކަމަކު މި ޒަމާނުގެ ޓެކްނޮލޮޖީގެ ބޭނުން ކޮށްގެން ސައިންސްވެރިން އެއްކޮށްފައިވާ މަޢުލޫމާތަށް ބަލާ އިރު މި ގޮވުން ނުވަތަ ބިގް ބޭންގ ގެ ސަބަބުން ނެތުމުގެ ތެރެއިން އެއްޗެއް ވުޖޫދަށް އައީއެވެ. ހަމައެކަނި މިއެއް ނޫނެވެ. ވުޖޫދަށް އައި އެއްޗަކީ ވަރަށް ފުރިހަމަ ނިޒާމެއްގެ ދަށުން ހިނގާ އެއްޗަކަށް ވެސް ވީއެވެ.
މިސާލެއް ނަގަމާ ހިނގާށެވެ. ބިމުގެ އަޑީގައި ޑައިނަމައިޓް ބޭނުން ކޮށްގެން އެއްޗެއް ގޮއްވާލަނީއެވެ. މި ގޮވުމުގެ ނަތީޖާއެއްގެ ގޮތުން ދުނިޔެ ދުވަހަކު ވެސް ދެކެފައި ނުވާ ކަހަލަ ގަނޑުވަރެއް ކުއްލިއަކަށް ވުޖޫދަށް އަންނަނީއެވެ. އެ ގަނޑުވަރުގައި ހުރީ ނުލާހިކު ރީތި ކުޑަދޮރު ތަކެކެވެ. އެހާމެ ރީތި ފަރުނީޗަރެވެ. މި ގަނޑުވަރު ވުޖޫދަށް އައީ އެއްވެސް މީހަކު ނުވަތަ އެއްވެސް ފަރާތަކުން ކުރި ކަމަކާ ނުލައި އަމިއްލައަށޭ ބުނުމަކީ ގަބޫލު ކުރެވޭނޭ ވާހަކަ އަކަށް ވާނެ ހެއްޔެވެ؟ އެ ފަދަ ތަނެއް އަމިއްލައަށް އުފެދިދާނެ ހެއްޔެވެ؟ އެއްގޮތަކަށް ވެސް ނުއުފެދޭނެއެވެ.
ބިގް ބޭންގ ގެ ސަބަބުން ވުޖޫދަށް އައި ކާއިނާތަކީ ނުލާހިކު ފުރިހަމަ، އެހައިމެ ތަނަވަސް ތަނެކެވެ. އެ ތަނުގެ ނިޒާމަކީ ވެސް އެހައި ފުރިހަމަ ނިޒާމެކެވެ. ދުނިޔޭގެ ގަނޑުވަރަކާއި އެ ކާއިނާތާ އަޅައި ބެލުމަކީ ކުރެވޭނޭ ކަމެއް ނޫނެވެ. މި ފަދަ ހަމަތަކެއްގެ މަތީން ވިސްނާ އިރު ކާއިނާތު ވުޖޫދަށް އައީ އަމިއްލައަށޭ ބުނުމަކީ ހަމަ ބުއްދި ގަބޫލު ކުރާ ކަހަލަ ވާހަކަ އަކަށް ނުވާނެއެވެ. ކާއިނާތު ވުޖޫދަށް އައީ ނެތުމުގެ ތެރެއިންނެވެ. މި މިސާލުން އެނގެނީ މި ފަދަ ފުރިހަމަ ތަނެއް ނެތުމުގެ ތެރެއިން ނެރުއްވި ކޮންމެވެސް ފަރާތެއް ވާނެ ކަމެވެ. އެ ކާއިނާތުގެ ކޮންމެ ކަމެއްވެސް ފުރިހަމަ ކޮންޓްރޯލެއްގެ ދަށުން ހިންގަވަނީ އެ ފަރާތުންނެވެ. އެ ފަރާތަކީ ﷲ އެވެ. ހުރިހައި ކަމަކަށް ކުޅަދުންވަންތަ ﷲ އެވެ. (ހާރޫން ޔަޙްޔާގެ ލިޔުއްވުމެއްގެ ތަރުޖަމާ)
