2019 ވަނަ އަހަރު އީސްޓާ (ނަސާރާއިންގެ އީދެއް) އާ ދިމާކޮށް ސްރީލަންކާގައި ދިން ޓެރަރިސްޓް ހަމަލާއަށް ދެ އަހަރު ފުރެން ކައިރިވެފައި ވަނިިކޮށް އެގައުމުން ހަރުކަށި ފިކުރުގެ 11 އިސްލާމީ ޖަމާއަތެއް މަނާކޮށްފިއެވެ.
ރައީސު ގޮތާބޭ ރާޖަޕަކްސާ އިއްޔެ ނެރުއްވައި ގެޒެޓްގައި ޝާއިއުކުރެއްވި އަމުރުގައިވާ 11 ޖަމާއަތުގައި ބައިވެރިވުމަކީ 20 އަހަރުގެ ޖަލު ހުކުމެއް އަންނާނެ ކުށެކެވެ. މި ޖަމާއަތްތަކުގެ ތެރޭގައި އިސްލާމިކް ސްޓޭޓް (އައިސިސް) އާއި އަލްގާއިދާ ފިޔަވައި ދެން ހިމެނެނީ ސްރީލަންކާގެ ޖަމާއަތްތަކެވެ.
ސްރީލަންކާއިން މި ޖަމާއަތްތައް މަނާކުރީ "ގައުމުގައި ސުލްހަ ދެމިއޮތުން ކަަށަވަރުކުރުމާއި، ގައުމީ ސަލާމަތާއި، އަމަންއާއްމާއި، ގާނޫނުގެ ބާރުވެެރިކަމުގެ ހައްގުގައި ހެޔޮ ނިޔަތުގަ"އެެވެ.
މި އަމުރު އިއްޔެ ނެރެފައި މިވަނީ 269 މީހުން (ހަމަލާ ދިން 7 މީހުން ނުލައި) މަރުވި މިހަމަލާ ދިން މީހުންނާ ދެކޮޅަށް ފިޔަވަޅުއެޅުމުގައި ސަރުކާރު ނުކުޅެދިފައި ވާކަމަށް ބުނެ އިހުތިޖާޖަށް ނުކުންނާނެކަމުގެ އިންޒާރު ނަސާރާ ޖަމާއަތްތަކުން ދީފައި ވަނިކޮށެވެ.
ސްރީލަންކާގެ ކެތޮލިކް ފައްޅީގެ ވެރިޔާ ކާޑިނަލް މެލްކަމް ރަންޖީތު ބުނެފައި ވަނީ ހަމަލާ ދިން މީހުންގެ އިތުރަށް، ހަމަލާ ހުއްޓުވުގައި ނާކާމިޔާބުވި ސިޔާސީ ވެރިންނާ ދެކޮޅަށް ވެސް ފިޔަވަޅު އަޅަން ޖެހޭނެ ކަމުގައެވެ.
އީސްޓާ ހަމަލާއާ ގުޅިގެން ހިންގި ތަހުގީގުގެ ރިޕޯޓުގައި ވާގޮތުން ހަމަލާގެ 17 ދުވަސް ކުރިން އޭރުގެ ރައީސު މައިތުރިޕާލާ ސިރިސޭނާއާ އޭނާގެ އިންޓެލިޖެންސް އިދާރާތަކުގެ ވެރިންނަށް އިންޑިޔާއިން އޮތީ ހަމަލާއެއް އަތުވެދާނެކަމުގެ އިންޒާރު ދީފައެވެ.
ހަމަލާގައި ބައިވެރިވި ޖަމާއަތްތަކުގެ އިތުރަށް، ހަމަލާއަށް ފަހު ސްރީލަންކާގައި ދީނީ އަދި ނަސްލީ ހަމަނުޖެހުން އުފެއްދި ބުޑީސްޓް ޖަމާއަތްތައް މަނާކުރުުމަށްވެސް މިއަހަރުގެ ކުރީކޮޅު ނެރުނު އެ ރިޕޯޓުގައި ގޮވާލާފައި ވެއެވެ، އެހެންނަމަވެސް، މިއަދު ނެރުނު އަމުރުގައި އެފަދަ ބުޑިސްޓް އެއްވެސް ޖަމާއަތެއް ހިމެނިފައި ނުވެއެވެ.
އައިސިސްއާއި އަލްގާއިދާގެ އިތުރަށް އިއްޔެގެ އަމުރުގައި ހިމެނިފައިވާ ޖަމާއަތްތަކަކީ: 1- ޔުނައިޓެޑް ތައުހީދު ޖަމާއަތު، 2- ސިލޯން ތައުހީދު ޖަމާއަތު، 3- ސްރީލަންކާ ތައުހީދު ޖަމާއަތު، 4- އޯލް ސިލޯން ތައުހީދު ޖަމާއަތު، 5- ޖަމްއިއްޔަތުލް އަންސާރިއް ސުންނަތިލް މުޙައްމަދިއްޔާ، 6- ދާރުލް އަޠުހަރު އައްތައްވާބިއްޔާ، 7- ސްރީލަންކާ އިސްލާމިކް ސްޓޫޑަންޓް މޫވްމަންޓް، 8- ސޭވް ދަ ޕާލް ސޮސައިޓީ، 9- ސުފަރ މުސްލިމް މިޖަމާއަތްތަކެވެ.
21 އެޕްރީލް 2019 ގެ ހަމަލާ ދިނުމުގައި އަމަލީގޮތުން ހަރަކާތްތެރިވި 7 މީހުންވެސް މަރުވެފައިވާއިރު، މިހަމަލާއާ ގުޅިގެން އެއްވެސް މީހެއްގެ މައްޗަށް އަދި ދައުވާ އުފުލާފައި ނުވެއެވެ.
