ނީލަ ކޯރު ހުރަހަށް އިތިއޯޕިޔާއިން ބިނާކުރާ ގްރޭޓް އިތިއޯޕިޔަން ރިނައިސެންސް ޑޭމް (ރިނައިސެންސް ޑޭމް) ގެ މައްސަލައިގައި ނީލަ ކޯރުގެ ފެން ހިއްސާކުރާ ތިން ގައުުމު ކަމަށްވާ އިތިއޯޕިޔާ، ސުދާން އަދި މިސްރުގެ މެދުގައި ދެކެވުނު ވާހަކަތައް ނާކާމިޔާބުވެގެން ނިމުމަށް ފަހު އިތިއޯޕިޔާއާއެކު ސުދާން އަދި މިސްރުގެ ގުޅުން އިތުރަށް ގޯސްވެއްޖެއެވެ. މިސްރުގެ ރައީސު ޢަބްދުލްފައްތާޙު ސީސީ ދެއްކެވި ވާހަކަފުޅެއްގައި އޭނާ ވަނީ މިމައްސަލައި ބާރުގެ ބޭނުންކުރަން ޖެހިއްޖެނަމަ އެކަންވެސް ކުރައްވާނެ ކަމުގެ އިންޒާރުދެއްވާފައެވެ.
ނީލަ ކޯރުން ތިރިއަށް (ސޫދާނާއި މިސްރަށް) ދެމޭ ފެންގަނޑުގެ ބޮޑުބައެއް ހިފަހަައްޓައި، ޑޭމް ފުރާލުމުގެ ފުރަތަމަ ބުރު އިތިއޯޕިިޔާއިން ނިންމާލީ ފާއިތުވި 2020 ވަނަ އަހަރުގެ ޖުލައި މަހުގެ ތެރޭގައެވެ. މިކަމާމެދު އެންމެ ބޮޑަށް މައްސަލަޖެއްސީ މިސްރުންނެވެ. އިގްތިސާދުގެ ބޮޑުބައެއް ދަނޑުވެރިކަމުގެ މައްޗަށް ބިނާވެފައި އޮތް މިސްރުގެ ދަނޑުވެރިން އެމީހުންގެ ދަނޑުތަކަށް ފެންދިނުމަށް ބަރޯސާ ވަނީ ނީލަ ކޯރުގެ ފެނަށެވެ. އިތިއޯޕިޔާއިން ޑޭމް ބިނާކޮށް އެތަނަށް ނީލަކޯރުގެ ފެނުގެ ބޮޑުބައެއް ދާގޮތަށް ހެދުމުން ކޯރުން މިސްރަށް ލިބޭ ފެން މަދުވުމުން އޭގެ ބޮޑު އަސަރެއް ކުރަނީ މިސްރުގެ ދަނޑުވެރިންނަށެވެ.
މިސްރުގެ ރައީސު ސީސީ މިހާރު ވަނީ ރިނައިސަންސް ޑޭމްގެ މައްސަލައިގައި ހަނގުރާމައަކަށް ދާން ޖެހިއްުޖެނަމަ އެކަންވެސް ކުރައްވާނެ ކަމުގެ އިންޒާރު ދެއްވާފައެެވެ.
"ނީލަ ކޯރުގެ ފެނަކީ ރަތް ރޮނގެއް. އަހަރުމެންނަށް ލިިބިފައިވާ ފެނުގެ ހައްގަށް އަރައިގަތުމުގެ ފުރުސަތު އެއްވެސް ބަޔަކަށް އަހަރުމެން ނުދޭނަން. މިސްރުގެ ފެނާ އެއްވެސް ވަރަކަށް ކުޅެފިނަމަ، އެކަމަށްދޭ ރައްދުން މުޅި ސަރަހައްދުގެ ހަމަޖެހުމަށް ނުރައްކާވާނެ." ސީސީ ވިދާޅުވިއެވެ.
މިސްރުގެ އިތުރަށް ސޫދާނުންވެސް ވަނީ މައްސަލަ ހައްލުނުވެ ހަނގުރާމައަަކާ ދިމާމައަށް ދާކަމުގެ އިންޒާރު ދީފައެވެ.
ސޫދާނުގައި ވެރިކަން ކުރާ ސޮވެރިން ކައުންސިލްގެ މުސްތަޝާރު ބްރިގޭޑިއާ ޖެނެރަލް އައްޠާހިރު އަބޫހާޖާ އިއްޔެ ވިދާޅުވީ ބައިނަލްއަގުވާމީ މުޖުތަމައުން ފިޔަވަޅު ނާޅައިފިނަމަ، ފެނުގެ ހަނގުރާމަ ނުފެށި ނުދާނެކަމުއެެވެ.
މިސްރާއި ސޫދާނު އިންޒާރާއެކުވެސް އިއްޔެ އިތިއޯޕިޔާއިން ބުނެފައިވަނީ ރިނައިސަންސް ޑޭމް ފުރުމުގެ ދެވަނަ ފިޔަވައި އަންނަ ޖުލައި މަހުގައި ފެށޭ ވިއްސާރަ މޫސުމާއެކު ކުރިއަށް ގެންދާނެކަމުގައެވެ. މިކަން ފަށައިފިނަމަ ނީލަ ކޯރުން ސޫދާނަށާއި މިސްރަށް ލިބޭ ފެން އަނެއްކާ މަދުވެގެން ދާނެއެވެ.
މި މައްސަލައިގައި އެފްރިކަން ޔުނިއަން (އޭޔޫ) މެދުވެރިއެެއްގެ ގޮތުގައި އޮވެގެން ކިންޝާސާގައި ބޭއްވި ވާހަކަތަކުގައި ސޫދާނާއި މިސްރުން ހުށަހެޅި ހުށަހެޅުންތައް ގަބޫލުނުކޮށް އިތިއޯޕިޔާއިން ވަނީ ޑޭމް ފުރާލުމުގެ ދެވަނަ ފިޔަވަހި ކަނޑައެޅިފައިވާ ގޮތަށް ކުރިއަށް ދާނެ ކަމަށް ބުނެފައެެވެ.
މިސްރުން މިހާރު ވަނީ އދ.އާއި އީޔޫއާއި އެމެރިކާއިން މިމައްސަލައިގެ ތެރެއަށް ވަނުމަށް ގޮވާލާފައެވެ.
