އޮސްފޯޑް އަދި އާސްޓްރާޒެނެކާގެ ކޮވިޑް-19 ވެކްސިން ޖެހުމުން ލޭގެ ތެރޭގައި ގަނޑު ލޭކޮޅު އުފެދުމުގެ މައްސަލަަ ދިމާވާކަމަށް ބުނެ އެ ވެކްސިން ޖެހުން ހުއްޓާލި ޔޫރަޕުގެ ބައެއް ބޮޑެތި ގައުމުތަކުން އެ ވެކްސިން އަލުން ޖަަހަން ފެށުމަށް ނިންމައިފިއެވެ.
ޖަރުމަނު، ފްރާންސް، އިޓަލީ އަދި ސްޕޭނުން މި ގޮތަށް ނިންމާފައި ވަނީ އާސްޓްރާޒެނެކާ ވެކްސިނާއި ބައެއް މީހުންގެ ލޭގައި ގަނޑު ލޭކޮޅުތައް އުފެދުމާ "ގުޅުމެއް ނެތް" ކަަމަށް ޔޫރަޕިއަން ޔުނިއަން (އީޔޫ) ބޭހާ ބެހޭ އިދާރާ، ޔޫރަޕިއަން މެޑިިސިންސް އެެޖެންސީ (އީއެމްއޭ) އިން ބުނުމާ ގުޅިގެންނެވެ.
"ސައިންސުގެ ނަޒަރުން ބަލާއިރު އަހަރުމެންެގެ ނިންމުމަކީ މި ވެކްސިން (އާސްޓްރާޒެނެކާ ވެކްސިން) އަކީ ރައްޔިތުން ކޮވިޑް-19 އިން ރައްކާތެރިކުރުމަށް ބޭނުންކުރަން ރައްކާތެރި އަދި އޭގެ ނަތީޖާ ފެންނަ ޚިޔާރެއް ކަމަށް." އީއެމްްއޭ ވެރިޔާ އެމާ ކުކް ވިދާޅުވިއެވެ.
"ވެކްސިން ޖަހަން ޖެހެނީ އަހަންނަަށް ކަމަށް ވިއްޔާ، މާދަމާ އަހަރެންގެ ގަޔަށް އެ ވެކްސިން ޖަހާނެ." އޭނާ އިތުރަށް ވިދާޅުވިއެވެ.
އީއެމްއޭ މިހެން ބުނި ނަމަވެސް އަލުން ވެކްސިން ޖަހަން ފެށުމަކީ ކޮންމެ ގައުމަކުން ވަކިން ނިންމާ ނިންމުމެކެވެ. ސްވިޑަނުން ބުނެފައި ވަނީ އެކަމާމެދު ގޮތެއް ނިންމުމަށް އެގައުމަށް "ދުވަސްކޮޅެއް" ބޭނުންވާ ކަމުގައެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން ވެސް އިއްޔެ ވަނީ އާސްޓްރާޒެނެކާ ވެކްސިން ޖެހުން ހުއްޓާނުލައި ކުރިއަށް ގެންދިއުމަށް ގައުމުތަކަށް ގޮވާލާފައެެެވެ. އެ ވެކްސިނާ ގުޅޭގޮތުން ޑަބްލިޔުއެޗްއޯއިން ހެދި ދިރާސާގެ ނަތީޖާ މިއަދު ނެރޭނެއެވެ.
އޮކްސްފޯޑް-އާސްޓްރާޒެނެކާ ވެކްސިނަކީ ފައިޒާ-ބަޔޯންޓެކް ވެކްސިނަށް ފަހު ދުނިޔޭގެ އެންމެ ގިނަ ގައުމުން ބޭނުންކުރަމުންދާ ވެކްސިނެވެ. 72 ގައުމެއްގައި ފައިޒާ ވެކްސިން ބޭނުންކުރަމުން ދާއިރު، 71 ގައުމެއްގައި އާސްޓްރާޒެނެކާ ވެކްސިން ދަނީ ބޭނުންކުރަމުންނެވެ. މޮޑާނާ ވެކްސިން 32 ގައުމެއްގައި ބޭނުންކުރަމުން ދާއިރު، ޗައިނާގެ ސިނޮފާމް ވެކްސިން 19 ގައުމެއްގައި އެބަ ބޭނުންކުރެއެވެ. ރަޝިޔާގެ ސްޕަޓްނިކް-ވީ 18 ގައުމެއްގައި އަދި ޗައިނާގެ ސިނޮވެކް 11 ގައުމެއްގައި ދަނީ ބޭނުންކުރަމުންނެވެ.
އާސްޓްރާޒެނެކާ ވެކްސިން އެމެެރިކާގައި އަދި ބޭނުންކުރަން ފަށާފައި ނުވެއެވެ. އެ ކުންފުނިން ވަރަށް އަވަހަށް އެމެރިކާގައި ވެކްސިން ބޭނުންކުރުމުގެ ހުއްދައަށް އެދޭނެކަމަށް ވެއެެެވެ. އެމެރިކާގައި މިހާރު ބޭނުންކުރަމުން ދަނީ ފައިޒާ، މޮޑާނާ އަދި ޖޮންސަން އެންޑް ޖޮންސަން ވެކްސިނެވެ.
