ޤައުމެއް ، ޤައުމެއްގެ ތަޞައްވުރުގައި ދެމިއޮވެ ، ކުރިއަރައިގެންދަނީ ، ޤައުމީވަންތަ ރައްޔިތެއްގެ ވާޖިބުން ވިލަރެސްވެގެންވާ އެކުވެރި ، ދުޅަހެޔޮ ޖަމާޢަތެއްގައި ، އިޖްތިމާޢީ ޢަދާލަތު ޤާއިމްވެފައި އޮވެގެންނެވެ. ފަރުދީ ޒިންމާއާއި މަސްއޫލިއްޔަތަށް އިހުމާލް ނުވާ ، ހެވާއިނުބައި ވަކިކޮށް ދަންނަ ، ޢިލްމާއި ޙިލްމާ އަދި ޙިކުމަތުން ސިކުނޑި ތަނަވަސް ފަރުދުންތަކެއްގެ ޙިމާޔަތް އެތަނެއްގައި ދެމިއޮވެގެންނެވެ. ޚިޔާނާތާއި ފަސާދަޔާ ދުރުހެލި ، ހެޔޮވެރިކަމެއްގެ ނަޟާޙަތްތެރިކަމުން ޒީނަތްތެރިވެގެންވާ ، ރައްޔިތުންގެ އަޑުއިވޭ ހެޔޮވެރިކަމެއް އެތަނެއްގައި އިންތިޒާމްކުރެވިފައި އޮވެގެންނެވެ. ޢަދުލުވެރި ޝަރުޢީ ނިޒާމަކުން ، އަބުރުވެރި ވެރިކަމެއްގެ އިޙްސާސް ރައްޔިތުންނަށް ލިއްބައިދޭ ، ޤާނޫނީ ޙުކޫމަތެއްގެ ހަރުދަނާ ބިންގަލުގެ މަތީގައި ޢިމާރާތް ކުރެވިގެންވާ ބިނާއެއްގެ ރައްކައުތެރިކަން ، އެޤައުމަކަށް ލިބިއޮވެގެންނެވެ. މިނިވަން ، ޒިންމާދާރު ، އުޅުމާއި ގުޅުމުން ކަސިޔާރުވެގެންނުދާ ، ފިކުރާއި ޚިޔާލާތުން ހިތަށް ފިނިކަން ގެނެސްދޭ ، އަމާންކަން ލިބިގެންވާ އޮޔާއި ވައި ދައުރުވަމުންދާ ، ދީނާ ރައްޓެހި ، އިންސާނިއްޔަވަންތަކަމުގެ ޙައްޤުތައް ކަށަވަރުކޮށްދޭ ރާގުތައް މެދުއުޑުގައި ގުގުމަމުންދާ ، ނަލަރީތި ވެށްޓެއްގެ އުއްމީދުން ، އެތަނަކަށް ދިރުން ލިބި ، ހިޔާއެޅިފައި އޮވެގެންނެވެ. މިއީ ފަރުދީ ޒިންމާއާއި ވެރިކަމުގެ ވާޖިބާއި ޙުކޫމަތުގެ އަސާސްތައް ، އެކަންކަމުގެ މައްޗަށް ސޫރަވެގެންވާ ބަހާތަކެވެ.
ޤައުމެއްގެ ތަޞައްވުރު ސިފަވެ ، ފެނިގެންދަނީ މަތީގައި ބަޔާންވެގެންވާ ބަހާތައް އެޤައުމެއްގައި ހިމެނި ، އެކުލެވިގެންވާ މިންވަރެއްގެ މައްޗަށެވެ. އަދުގެ ދުނިޔެއަކީ ، ބަވަނަވެގެންވާ ، މުޅިދުނިޔެއަށް މަޢުލޫމާތުގެ ވިއުގަ ފެތުރި މޫލާފައިވާ ދުނިޔެއެކެވެ. ދުނިޔޭގެ ކޮންމެ ޤައުމެއްޤައިވެސް ކަންހިނގަމުންދާގޮތް ވަގުތުން ފެންނަން އަދި ބެލެން ހުންނާނެއެވެ. ކަމެއް ސިއްރުކުރާވަރަކަށް ، އަދި ފޮރުވަން އުޅޭވަރަކަށް އެކަމެއް ފަޅާ އަރާނެއެވެ. އެޤައުމެއްގެ ޙަޤީޤީ ސޫރަ ފޮރުވައިގެންނެއް މިޒަމާނަކު ނޫޅެވޭނެއެވެ. ހެޔޮވެރިކަމެއްގެ ނިޔަތުގައި އަންނަ ސަރުކާރުތަކުން ގޯސްކޮށް ކުރާކަންކަން ، އިދިކޮޅަށްނޫނަސް ، އެންމެންނަށްވެސް އެނގި ފަހުމްވާނެއެވެ. އަޅައިނުލައި ނުވަތަ ކުރާނެކަމެއްނެތި ތިބެންޖެހުމަކީ އެހެން ކަމެކެވެ.
ޤައުމީވަންތަ ރައްޔިތެއް ދިރިއުޅޭ މުޖުތަމަޢެއްގައި ، ވެރިކަމުގެ ފަރާތުން ، ކޮންމެ ކޮންމެ ކަމެއް ކުރަން ޖެހިލުންވާނެއެވެ. ކޮންމެ ބަޔަކުވެސް ވެރިކަމަށް އަންނަނީ ، އިދިކޮޅުގައިތިބޭ ބަޔަކު ބަލިކުރުމަށްފަހުގައެވެ. އެހެންކަމުން ، އެލިބޭ ކާމިޔާބީ ދަމަހައްޓައި ، ގިނަދުވަހު ވެރިކަމުގައި ތިބެން ބޭނުންވާނެއެވެ. އެހެންނަމަވެސް ، ޒިންމާދާރު އިދިކޮޅެއް އޮންނަނަމަ ، ވެރިކަމުގައި ތިބޭބަޔަކު ޒިންމާދާރު ކުރުވަން ރައްޔިތުން ފުރުޞަތުދޭނެއެވެ. ކޮންމެ ބަޔަކުވެސް ، ވެރިކަމަށް އަންނަނީ ކުރެވެން ހުންނަ ހުރިހައިކަމެއް ކޮށްގެންނެވެ. ގަނެވެން އޮތްވަރަކަށް ވޯޓުވެސް ގަނެގެންނެވެ. އޮޅުވައިލެވެން އޮތްވަރަކަށް އޮޅުވައިވެސް ލައިގެންނެވެ. އިދިކޮޅަށް ފުރުޞަތު ނުލިބޭނީ ، އިތުބާރު ނުކުރެވޭތީއެވެ. މާޒީގައި ޖަހާފައިވާ ލަށްތައް ގިނަވުމުންނެވެ. ސަރުކާރުތައް ވެރިކަމަށް އަންނަނީ ރައްޔިތުންނަށް ހެޔޮވެރިކަމެއް ކޮށްދޭށެވެ. ރައްޔިތުންވެސް ބޭނުންވާ ގޮތަކީ އެއީއެވެ. ސިޔާސީ ކޮންމެ ފިކުރެއްގެ މީހެއްގެވެސް ބޭނުމަކީ ، ހެޔޮވެރިކަމެކެވެ. ހެޔޮވެރިކަން ، ސިފަކުރާނީ އެމީހެއްގެ އަމިއްލަ ވިސްނުމާއި ފިކުރާ ޚިޔާލާތުގެ މައްޗަށެވެ. އެއީ ޤައުމީވަންތަ ރައްޔިތެއްގެ އެންމެ ސާދާ އެއްސިފައެވެ. މުޅިޤައުމަށް ލާބައާއި މަންފާހުރިގޮތް އިޚުތިޔާރުކުރާ ދުޅަހެޔޮ ޖަމާޢަތެއް ނަމައެވެ.
ދުޅަހެޔޮ ޖަމާޢަތެއްގެ އެންމެ އަސާސީ ސިފަޔަކީ ، މުޖްތަމަޢުގެ ލާބައާއި މަންފާއެވެ. ވެރިކަމުގެ ނިޒާމު ސީދާކުރުމުގައި ، ދުޅަހެޔޮ ޖަމާޢަތެއްގެ ޒިންމާދާރުކަން ވަރަށް މުހިންމެވެ. ގޯޅި އަޅައިގެންދާ ހިނދު ، ސީދާމަގަށް މިސްރާބު ހިފައިދޭނެ ވަޞީލަތަކީ ، ދުޅަހެޔޮ މުޖުތަމަޢެކެވެ. ސަލާމަތާއި ރައްކާތެރިކަމުގެ މަންޒިލަށް ސަމުގާ ހިފައިދޭނެ ހަތިޔާރަކީވެސް ދުޅަހެޔޮ މުޖުތަމަޢެކެވެ. އެމުޖުތަމައެއްގެ ދުޅަހެޔޮކަމުގައި ، ކުށުގެވެށީގެ އަނދިރިކަން ފިލުވައިދީ ޙުކޫމަތު ޤާއިމްކޮށްދޭނީ ޢަދްލުވެރި ޝަރުޢީ ނިޒާމެކެވެ. ސަފުތައް ސީދާކޮށް އެއްވަރުކޮށްދޭނީ ، ހެޔޮވެރިކަމެއްގެ އަޅައިލުމާއި އޯގާތެރިކަމެވެ. އިޖްތިމާޢީ ޢަދާލަތު ޤާއިމްވެ ކަށަވަރުވެފައި އޮތުމީ ، ދުޅަހެޔޮ މުޖުތަމަޢެއް ބައިބައިވުމަށް ލެވިފައި އޮންނާނެ އުސް ފާރެކެވެ.
އިޖްތިމާޢީ ޢަދާލަތަކީ ، ކޮންމެ މުޖުތަމަޢަކަށްވެސް ، އެއާނުލައި ނޫޅެވޭފަދަ ، ނުހަނު މުހިންމު ބަހާއެކެވެ. ޢަދްލުވެރިކަމުގެ ސިފަތައް ނުދަންނަ ނުވަތަ އެސިފަތަކާ ބީރައްޓެހި މުޖުތަމަޢުތައް އޮންނާނީ ބިރުވެރިކަމާއި ނާމާންކަމުން ފުރިފައެވެ. ދުނިޔޭގެ ބޮޑެތި އިޤްތިޞާދުތަކުގައި އެންމެ އަގުބޮޑުކޮށް ވިއްކައިއުޅޭ އެއްޗަކީ ، ޢަދުލުގެ ނިޒާމެވެ. އެނިޒާމަށް ފައިސާގެ ނޫޓު ފެންނަނީ ، އިޖްތިމާޢީ ޢަދްލުގެ ނިޒާމުގެ ފަގީރުކަމުންނެވެ. ބޮޑުއަގުގައިވިކޭ ޙުކުމްތަކަށް ފުރުޞަތު ލިބެނީ އިޖްތިމާޢީ ޢަދްލުގެ ފޭރާން ވީދި ފަގީރުކަން ހިޔަނިއެޅިފައި އޮތުމުގެ ސަބަބުންނެވެ. އިޖްތިމާޢީ ޢަދާލަތަށް އެޅޭ ފަގީރުކަމުގެ ހިޔަނި ، އަލިކަމެއް އަމްދުންނެތް ކަނު އަނދިރި ޙާލަތަށް ގެންގޮސްދެނީ މުޖްތަމަޢުގައި ފަރުދީ ޒިންމާއާއި މަސްއޫލިއްޔަތަށް ވެވޭ އިހުމާލު ބޮޑުކަމުންނެވެ. އެނގިގެންނާއި ނޭނގިތިބެ ، ފަރުދީ ޒިންމާ އަދާކުރުމަށް ފަސްޖެހޭތީއެވެ.
ފަރުދީ ޒިންމާއާއި މަސްއޫލިއްޔަތަކީ ، ދުނިޔޭގެ ހުރިހައި ކަންކޮޅެއްގައިވެސް ، މިހާރަކަށް އައިސް އިހުމާލުވެވޭ ކަމެކެވެ. ކޮންމެ ކަމެއް ކޮންމެ ގޮތަކަށް ދާން ދޫކޮށްލައިގެން ، ތިމާއަށް ލިބޭ ބައި ބޮޑުކުރުމުގެ ވިސްނުން އެޖަމާޢަތެއްގައި ބޮޑުވާނެއެވެ. އެހެން އެއްވެސް ނަފުސަކަށް އަޅައިނުލައި ، ތިމާގެ އަމިއްލަ ނަފުސަށް ހުރިހައިމޮޅެއް އެދޭ ޙާލު ، އެމަގަށް ޢަމަލުތައް ބަށްޓަން ކުރުމުގެ ނަތިޖާއަކަށްވަނީ ، ޚުދުތިމާގެ އަމިއްލަ ނަފުސަށްވެސް އަޅައިނުލެވޭ ފަހަރު ގިނަވެގެން ދިއުމެވެ. އަމިއްލަ އެދުން އިސްކުރަމުންގޮސް ، ތިމާއަމިއްލަޔަށް ، ތިމާގެ އަމިއްލަ ނަފްސު ކަތިލައި މުސްތަޤްބަލް ބަނަކުރަމުން ދިއުމެވެ. މިއީ ހެވާއި ނުބައި ވަކިކޮށް ނުދަންނަ މުޖުތަމަޢެއްގައި އެބަޔަކު އަމިއްލަޔަށް ލިބިގަންނަ ހަލާކެކެވެ.
ހެވާއި ނުބައި ވަކިކޮށް ނުދަންނަ ޙާލަތަކަށް މުޖުތަމަޢެއް ވާޞީލުވަނީ މާޒީ ވަރަށް ހުރުތު ވެގެންނެވެ. ﷲ ސުބްޙާނަހޫ ވަތަޢާލާ ، އިންސާނާ ދުނިޔެއަށް ފޮނުއްވީ ، އެއިންސާނާ އުޅެންވީގޮތް އަންގަވާފައެވެ. ހެވާއި ނުބަޔަކީ ކޮބައިކަން ވަރަށް ސާފުކޮށް އަންގަވާފައެވެ. އަދި ، ކައުއިތުރު ރަސޫލާ ޞައްލަﷲ ޢަލައިހި ވަސައްލަމަވަނީ ، އެކަންކަމުގެ ރިވެތި ނަމޫނާތައް ދައްކަވައި ، ﷲ ގެ ރުއްސެވުން ލިބެން އޮތް ތެދުމަގާއި ހެޔޮގޮތާ އަދި ނުބައި މަގު ސާފުކޮށްދެއްވާފައެވެ. ސަލާމަތް ބުއްދިހުރި ކޮންމެ އިންސާނަކީ ، އޭނާގެ ވަށައިގެން ހިނގާ ކަންކަމުގެ ހެވާއަދި ނުބައި ވަކިކުރެވޭނެ މީހެކެވެ. އެހެން ނަމަވެސް ، ހެވަށް ހިތްނުކިޔައި ނުބަޔަށް ހިތްކިޔަމުންގޮސް އިންސާނާއަށް ، އޭނާގެ ދެދުނިޔެ ގެއްލޭއިރުވެސް އަމިއްލަ އެދުން ނޫންކަމެއް އިސްކުރެވޭގޮތެއް ނުވެއެވެ. މިވަބާއިން ސަލާމަތްވެ ، ބާއްޖަވެރިކަން ލިބިގެންދާނީ ، ޢިލްމާއި ޙިލްމާ އަދި ހުނަރުން ތަނަވަސްވެގެންވާ ސިކުނޑިތަކެއް އޭގެ ބޭނުން އެންމެ ފުރިހަމަގޮތުގައި ހިފައިގެންނެވެ.
ޢިލްމާއި ޙިލްމާ އަދި ޙިކުމަތުން ތަނަވަސް ވެގެންވާ ސިކުނޑިތަކެއްގެ ބޭނުން ، ހެވާއިނުބައި ވަކިކުރަން ދަންނަ މުޖުތަމަޢަކަށް ވަރަށް މުހިންމެވެ. ވަށައިގެން ހިނގަމުންދާ ކަންކަމުގެ މައްޗަށް ވިސްނުމާއި ފިކުރުގެ ބާރުފޯރާފަދަ ވެށްޓަކަށް ، ދިރިއުޅުމުގެ ޙާލަތު ނިއުޅިގެންދާނީ ، ޢިލްމު ލިބިގެންވާ ، ޙިލްމުގެ ބޭނުންހިފައި ، ޙިކުމަތު ޢަމަލީ އިސްކުރަން ދަންނަ މުޖްތަމަޢަކަށެވެ. ރައްޔިތުންގެ އަޑުއިވޭ ހެޔޮވެރިކަމެއްގެ ބިންގާ އެޅިގެންދާނީ މިފަދަ ވެށްޓެއްގައެވެ. އަބުރުވެރި ވެރިކަމެއްގެ އިޙުސާސް ، ރައްޔިތުންނަށް ލިބިގެންދާނީވެސް މިފަދަ ވެށްޓެއްގައެވެ. ކޮންމެ ކަމެއް ވަރިހަމަ ، އަމިއްލައެދުން އިސްކުރާ ފިކުރުތަކަށް ޖާގަނުލިބި ، ޢަދްލު އިސްސާފުގެ މަގަށް ދޮރުތައް ހުޅުވިގެންދާނީވެސް ، ޢިލްމުވެރި ތަޢުލީމީ ޤާބިލު ފަރުދުންނަށް ފުރުޞަތުލިބިގެންދާގޮތަށް ބަށްޓަންކުރެވިފައި އޮންނަ ހެޔޮވެރިކަމެއްގައެވެ. ވަކިފިކުރެއްގެ ނިވަލުގައި ވަކިބާރެއްގެ ތައްޕާހުގައި ބާރުލިބި ކަންހިންގަން ފުރުޞަތުލިބޭ ވެށްޓެއްގައި ޢަދްލު އިންސާފާއި ހަމަޖެހުން ޤާއިމެއް ނުކުރެވޭނެއެވެ. ނަޟާޙަތްތެރިކަން ގެއްލި ، އަމިއްލަ ސުފުރާމަތިން ފެށިގެން ، ނިޔާއިއްވޭ ދަރުބާރުތަކާހަމަޔަށް ފަސާދަފެތުރިގެންދާން މަގުފަހިވެގެންދަނީ ، ޤާބިލް ނަފުސުތައް އެއްފަރާތްކުރެވި ، މިތުރުންނާއި އެކުވެރިންނާ އަދި ވާގިވެރިންނަށް މަގުކޮށައިދެވޭ މުޖްތަމަޢުތަކުގައެވެ.
ނަލަރީތިވެށްޓަކުން ، އަޑިނޭނގޭ ފުންކަނޑުގެ ބަގީޗާތަކުން ހިތްއުފައުކުރުމަށް ، ބިދޭސީން ޒިޔާރަތްކުރަމުންދާ މި ކުޑަކުޑަ ޤައުމުގެ ޙާލަތުވެސް ދުނިޔެއަށް ސިއްރުވެގެންނެއް ނުވެއެވެ. ސޫރަކުރެވޭ ނަލަކަމާއި ރީތިކަމުގެ ފަހަތުގައި ފޮރުވިފައިވާ ސިއްރުތައް ދުނިޔެއަށް އެނގެއެވެ. ކުށްވެރިން ކުށުގެވެށިން ފަސޭހަކަމާއެކު ސަލާމަތްވަމުން އެބަގެންދެއެވެ. ކުށްކުރާމީހުން ސަލާމަތްކޮށްދިނުމަށް ބައިހަދާފައި މަގުމައްޗަށް ނުކުމެ ، ޙައްޤުނޫން އަޑުތައް އުފުލާމީހުން މަދެއްނޫނެވެ. ނަފްސުގެ އަޅުންނަށްވެ އަމިއްލަ ނަފްސު ވިއްކަމުންގެންދާ މީހުންވެސް މަދެއްނޫނެވެ. ނުވިއްކާ އެކައްޗެއްވެސް ނޯންނަ ހިސާބަށް ޤައުމުގެ ޙާލަތުވަނީ ބަދަލުވެފައެވެ. ދުޢާއަކީ ، މިކުޑަކުޑަ އިސްލާމީ ޤައުމު ، ހުރިހައި ނުބައިކަމަކުން ސަލާމަތް ކޮށްދެއްވައި ، ސަލާމަތްކަމާއި އަމާންކަން ލިބިގެންވާ އިސްލާމީ އުއްމަތުގެ ޙިއްޞާއެއްގެ ގޮތުގައި ތާއަބަދަށް ދެމިއޮތުމެވެ.
