ބަންގްލާދޭޝްގައި ރެފިއުޖީންގެ ގޮތުގައި ދިރިއުޅޭ ރޮހިންޖާ މުސްލިމުން ގައުމަށް އަނބުރާ ގެންދިއުމުގެ މަސައްކަތް މިއަހަރުގެ ދެވަނަ ތިންމަހުގެ ތެރޭގައި ފަށާނެކަމަށް މިޔަންމާ (ބަރުމާ) އިން ބުނެފިއެވެ. މިޔަންމާއިން މިކަމަށް އެއްބަސްވެފައި ވަނީ ޗައިނާއިން އިންތިޒާމުކޮށްގެން މިޔަންމާއާއި ބަންގްލާދޭޝްގެ އޮފިޝަލުންގެ މެދުގައި ކުރިއަށް ދިޔަ ވާހަކަތަކަށް ފަހުގައެެވެ.
ރޮހިންޖާއިން މިޔަންމާއަށް އަނބުރައި ފޮނުވުމަށް ބަންގްލާދޭޝްއިން މަސައްކަތްކުރާތާ ކިތަންމެ ދުވަހެކެވެ. އެެހެންނަަމަވެސް، އެކަމަށް ބޭނުންވާ ވަސީލަތްތައް ގާއިމުނުކުރެވޭ ކަމަށް ބުނެ މިޔަންމާއިން އައީ މިކަން ލަސްކުރަމުންނެވެ.
"އަަަހަރުމެން ބާރުއަޅަމުން ދިޔައީ ފުރަތަމަ ތިންމަހުގެ ތެރޭގައި އެމީހުން ގައުމަށް އަނބުރާ ގެންދިއުމުގެ މަސައްކަތް ފަށަން. އެހެންނަމަވެސް، ވަސީލަތްތައް ހަމަޖެއްސުމަށާއި، ތަންތަނުގެ އިންތިޒާމު ހަމަޖެއްސުމަށް މިޔަންމާއިން އިތުރު ވަގުތު ބޭނުންވީ. އެހެންކަމުން އަހަރުމެން އެދުނީ އަނބުރާ ގެންދިއުމުގެ މަސައްކަތް ދެވަނަ ތިންމަހުގެ ތެރޭގައި ފަށަން. އެމީހުން ވަނީ އެކަމަށް އެއްބަސްވެފައި." މިޔަންމާގެ އޮފިޝަލުންނާއެކު ބޭއްވި ބައްދަލުވުމަށް ފަހު ވާހަކަދައްކަވަމުން ބަންގްލާދޭޝްގެ ފޮރިން ސެކްރެޓަރީ މަސްޢޫދު ބިން މޫމިން ވިދާޅުވިއެވެ.
މީގެ އިތުރަށް އަނބުރާ ގެންދާ މީހުން ތިބޭ ރަޚައިން ސްޓޭޓުގައި ބައިނަލްއަގުވާމީ އޮފިޝަލުން ބޭތިއްބުމަށް ބަންގްލާދޭޝްއިން ހުށަހެޅިހުށަހެޅުމަށް މިޔަންމާއާއި ޗައިނާއިން އެެއްބަސްވެފައިވާ ކަމަށްވެސް، ތިން ގަައުމުގެ މެދުގައި ވާޗުއަލްކޮށް ބޭއްވި ބައްދަލުވުމުގައި ބަންގްލާދޭޝްގެ ފަރާތުން އިސްކޮށް ހުންނެވި މަސްްޢޫދު ވިދާޅުވިއެވެ.
ފުރަތަމަ ފިޔަވަހީގައި ގައުމަށް އަނބުރާ ގެންދާ ރޮހިންޖާއިންނަށް ޗައިނާއިން ކޮވިޑް-19 ގެ ވެކްސިން ހިލޭ ޖަހައިދޭނެއެވެ.
ބަންގްލަދޭޝްއިން ހުށަހަޅާފައި ވަނީ އެކި އަވަށްތަކުގެ މީހުން ވަކިވަކިން ގަައުމަށް އަނބުރާ ގެންދިއުމަށެވެ. އެހެންނަމަވެސް، މިޔަންމާއިން ބޭނުންވަނީ ވަކި ތަރުތީބެއް ނެތި އެތަން މިތަނުން މީހުން ނަގައިގެން ގެންދާށެވެ.
އަންގާރަ ދުވަހު އޮތް ބައްދަލުވުމުގައި މިޔަންމާގެ ފަރާތުން އިސް ބޭފުޅަކަށް ހުންނެވީ ޑެޕިއުޓީ މިނިސްޓަރ އޮފް އިންޓަނޭޝަަނަލް ކޯޕަރޭޝަން ޔޫ ހައު ޑޯ ސުއާންއެވެ. މި ބައްދަލުވުމަށް ފަހު ނެރުނު ބަޔާނެއްގައި މިޔަންމާގެ ފޮރިން މިނިސްޓްރީން ބުނެފައި ވަނީ މިޔަަންމާއިން ވަނީ ރޮހިންޖާއިން ގައުުމަށް އަނބުރާ ގެންދިއުމުގެ ތައްޔާރީތައް ފުރިހަމަކޮށްފައި ކަމުގައެވެ. އަދި އެމީހެއްގެ ވަޒަން ގެއްލިފައިވާ މީހެއްކަން ކަށަވަރުކުރެވޭ ކޮންމެ މީހަކު އަނބުރާ ގެންދާނެކަމުގެ ޔަގީންކަން ދީފައެވެ.
ބައިނަލްއަގުވާމީ ޖަމާއަތްތަކުން ލަފާކުރާ ގޮތުގައި ރޮހިންޖާ މުސްލިމުންގެ 7 ލައްކަ 50 ހާސް މީހުން މިޔަންމާއިން ބަންގްލާދޭޝްއަށް ހިޖުރަކޮށްފައެވެ. އެއީ 2017 ވަނަ އަހަރުގެ އޮގަސްްޓް މަހުގެ ތެރޭގައި މިޔަންމާގެ ސިފައިން ހިންގި ނަސްލު ސާފުކުރުމުގެ ލާއިންސާނީ ޖަރީމާއަށް ފަހުގައެވެ. މި ޖަރީމާގައި ރޮހިންޖާ މުސްލިމުންގެ 24 ހާހަށްވުރެ ގިނަ މީހުން މަރައި، ދެ ލައްކައެއްހާ މީހުންނަށް ބޮޑެތި އަނިޔާތައް ދީފައި ވެއެވެ. އަދި މުސްލިމުންގެ 1 ލައްކަ 15 ހާސްގެ އަންދާލައި، 1 ލައްކައަށްވުރެ ގިނަ ގެ ލޫޓުވާފައި ވެއެވެ.
