އީރާނުގެ އެންމެ އިސް ނިއުކުލިޔާ ސައިންސުވެރިޔާ އަދި އެ ގައުމުގެ ނިއުކުލިޔާ ޕްރޮގްރާމުގެ 'ބައްޕަ' ކަމުގައި ބެލެވޭ މުޙްސިން ފަޚްރީޒާދޭ-މަހާބާދީ އަވަހާރަކޮށްލައިފިއެވެ.
އީރާނުގެ ޚަބަރުފަތުރާ ވަސީލަތްތަކުން ބުނިި ގޮތުގައި އޭނާ އަވާރަވެފައި ވަނީ ކާރުކޮޅުގައި ވެރިރަށް ތެހެރާންގެ އިރުމަތީ އަވަށެއް ކަމުގައިވާ އަބްސަރްދުގައި ދަތުރުކުރައްވަމުން ދަނިކޮށެވެ. ކާރުކޮޅަށް ޓެރަރިސްޓުން ހަމަލާދިނުމުން، އޭނާގެ ހަށިފާރަަވެރިންނާއި، ޓެރަރިސްޓުންނާ ދެމެދު ބަދަލުކުރެވުނު ހަމަލާގައި ވަރަށް ބޮަޑަށް ޒަޚަމްވެވަޑައިގެން ހޮސްޕިޓަލުގައި ފަރުވާދެމުން ދަނިކޮށެވެ.
އީރާނުގެ ޚާރިޖީ ވަޒީރު މުޙައްމަދު ޖަވާދު ޒަރީފު ތުހުމަތު ކުރެއްވި ގޮތުގައި ފަޚްރީޒާދޭ އަވަހާރަކޮށްލުމުގެ ފަހަތުގައި ވަނީ އިސްރާއީލެވެ.
"ޓެރަރިސްޓުން ވަނީ މިއަދު އީރާނުގެ އިސް ސައިންސުވެރިއަކު އަވާރަކޮށްލާފައި. މި ފިނޑި އަމަލުން (އޭގެ އިސްރާއީލުގެ ދައުރެއް ވާކަމުގެ ސީރިޔަސް އިޝާރާތްތައް ލިބިފައިވާ) ދައްކައިދެނީ މަކަރުވެރި ރޭވުންތައް ރާވައި އުދުވާނީ ހަމަލާދޭ މީހުންގެ މާޔޫސްކަން." ޖަވާދު ޒަރީފު ކުރެއްވި ޓުވީޓެއްގައި ވެއެވެ.
އީރާނުން ލިބޭ ޚަަބަރުތައް ބުނާ ގޮތުގައި މިއަދު މެންދުރު ފަހުގެ ވަގުތެއްގައި ދިން މިހަމަލާގައި ޓެރަރިސްޓުންގެ ބައެއް މީހުންވެސް ވަނީ މަރުވެފައެވެ.
އިސްރާއީލުން މި ހަމަލާއާ ބެހޭ ގޮތުން އަދި އެއްޗެއް ބުނަން ދެކޮޅުހަދާފައެވެ. އެޕްރީލް 2018 ގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަމުން ފަޚްރީޒާދާއާ ބެހޭ ގޮތުން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނެފައި ވަނީ އެއީ އޭނާ "ފަޚްރީޒާދޭ، އެއީ ހަނދާން ހުންނަ" ނަމެއް ކަމުގައެވެ. މީގެ ދިހަ އަހަރުކުރިން އީރާނުގެ ނިއުކުލިޔާ ސައިންސުވެރިންނަށް އަމާޒުކޮށް ދިން ހަމަލާތަކުގެ ފަހަތުގައި ވަނީވެސް އިސްރާއީލުކަމަށް ބެލެވިފައި ވެއެވެ.
މިއަދު އަވަހާރަކޮށްލި ފަޚްރީޒާދޭ ހުންނެވީ އީރާނުގެ އޮގަނައިޒޭޝަން އޮފް ޑިފެންސިވް އިނޮވޭޝަން އެންޑް ރިސާޗްގެ ވެރިޔާގެ މަގާމުގައެވެ. އީރާނުގެ މިނިސްޓްރީ އޮފް ޑިފެންސްގެ ދަށުން ހިންގާ މި އިދާރާއަކީ އީރާނުގެ ނިއުކުލިޔާ ހޯދުންތަކުގެ ބެލެނިވެރި އިދާރާއެވެ. ފަޚްރީޒާދޭ ބެލެެވެނީ އީރާނުގެ ނިއުކުލިޔާ ޕްރޮގްރާމުގެ ފަހަތުގައިވާ ރޭވުންތެރި ސިކުނޑި ކަމުގައެވެ. 1958 ވަނަ އަހަރު އުފަންވެވަޑައިގަތް ފަޚްރީޒާދޭއަކީ ނިއުކުލިޔާ ޕްރޮގްރާމުގައި މަސައްކަތްޕުޅުކުރެއްވުމުގެ އިތުރަށް އިމާމު ޙުސައިން ޔުނިވަސިޓީގައި ކިޔަވައިދެއްވާ ފިޒިކްސް ޕްރޮފެސަރެކެވެ.
ފަޚްރީޒާދޭ އަވަހާރަކޮށްލަން ދިން ހަމަލާގެ ޒިންމާ އަދި އެއްވެސް ފަރާތަކުން އުފުލާފައި ނުވެއެވެ.
އީރާނުގެ ދީނީ ޒައީމު އާޔަތުﷲ ޢަލީ ޚާމަނައީގެ އަސްކަރީ މުސްތަޝާރު ވަނީ ފަޚްރީޒާދޭ އަވަހާކޮށްލިި މީހުންގެ ކިބައިން ބަދަލުހިފާނެ ކަމުގެ އިންޒާރުދެއްވާފައެވެ.
"އެ ޝަހީދު އަވަހާރަކޮށްލި މީހުންނާ ދެކޮޅަށް ހޮނުއެޅުން ފަދަ ހަމަލާއެއް އަހަރުމެން ދޭނަން. އަދި އެމީހުންގެ އަމަލާ މެދު އެމީހުން ހިތާމަކުރަންޖެހޭ ވަރު އަހަރުމެން ކުރާނަން." ސިފައިންެގެ ކޮމާންޑަރު ޙުސައިން ދަހްްޤާން ކުރެއްވި ޓުވީޓެއްގައި ވެއެވެ.
