"އިންޑިއާ އައުޓް" ގޮވަމުން ގައުމީ ބަޔަކަށް ވެގެން އުޅެނީ ކުރީ ސަރުކާރުގެ ކޮރަޕްޝަން މައްސަލަތައް އޮއްބާލުމަށް ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ ވިދާޅުވެއްޖެއެވެ.
ރޮޒައިނާ މީހެން ވިދާޅުވެފައިވަނީ ދިވެހި ރާއްޖޭގެ އަޑުން ރޭ ފޮނުވި "އަހާށޭ ބުނާނަން" ޕްރޮގްރާމްގައި ވާހަކަ ދައްކަވަމުންނެވެ. މެމްބަރު ރޮޒައިނާގެ ވާހަކަފުޅުގައި ސީދާ އިދިކޮޅުގެ ނަން ބޭނުންމެއް ނުކުރައްވައެވެ. ނަމަވެސް އޭނާ މިފަދަ ގޮތަކަށް ވާހަކަ ދައްކަވައިފައިވަނީ، ރާއްޖޭގައި އިންޑިއާގެ ނުފޫޒާއި ބާރު ގަދަވަމުންދާތީއާ އިންޑިއާ ސިފައިން ރާއްޖޭގައި ގާއިމުވެ ތިބުމާ ދެކޮޅަށް "އިންޑިއާ އައުޓް" ހޭޝްޓެގް ގައި އިދިކޮޅުން އަޑުއުފުލަމުން ދާ ދަނޑިވަޅެއްގައެވެ.
މެމްބަރު ރޮޒައިނާ ވިދާޅުވީ އިންޑިއާއިން ރާއްޖޭގައި މާބޮޑަށް ބާރުގަދަކޮށްގެން އުޅޭތަން އޭނާއަށް ފެނިވަޑައި ނުގަންނަވާ ކަމަށެވެ. ކުރިން ނުކުރާ ކަންތައްތަކެއް ވެސް ބާރުގަދަ ކުރުމުގެ ގޮތުން އިންޑިއާއިން ރާއްޖޭގައި ކުރަމުން ނުދާކަމަށެވެ. ރާއްޖޭގެ ބޯޑަރު ބެލެހެއްޓުމާއި ސިފައިންނާ ގުޅިގެން ޓްރޭނިން ހެދުނއ ފަދަ ކަންކަމަކީ ކުރިންސުރެވެސް ކުރަމުން އަންނަ ކަންކަމަށެވެ. ލާމެހިފައި އޮންނަ ދުނިޔެއެއްގައި އެއްވެސް ބަޔަކު އަމިއްލައަށް އެބައިމީހުންގެ ކަންކަމެއް ނުނިމެންނޭކަމަށެވެ. ރާއްޖެއަކީ އދ. ގެ މެމްބަރު ގައުމަކަށް ވާއިރު ރާއްޖޭގެ ސިޔާދަތު ގެއްލޭ ހިސާބަށް ކަންކަން ދާނަމަ އެހެން ގައުމުތަކުގެ އެހީތެރިކަންވެސް ރާއްޖެއަށް ލިބިގެންދާނެކަމަށެވެ. އިދިކޮޅު ފަރާތްތަކުން އަޑު އުފުލަމުންދާ ކަންކަމަކީ ވަރަށް ނުބައި ނިޔަތެއް އޮވެގެން ހިންގާ ސިޔާސީ ކަމެއްކަމަށް ރޮޒައިނާ ވިދާޅުވިއެވެ.
އެމް.އެމް.ޕީ.އާރް.ސި ގެ ޚިޔާނާތުގެ ފައިސާ ލިބުނު މީހުންގެ ނަންތައް ހާމަނުކޮށް އުޅެނީ ކީއްވެގެންތޯ މެމްބަރު ރޮޒައިނާއަށް ކުރެއްވި ސުވާލަކަށް ޖަވާބު ދެއްވަމުން ވިދާޅުވީ ތަހުގީގު ފުރިހަމަ ނުވަނީސް ނަންތައް ހާމަކުރުމުން ހެކި ފޮރުވުމާއި އެކި ގޮތްގޮތުން ތަހުގީގަށް ހުރަސް އެޅޭ ކަމަށެވެ. އަދި އެބަޔަކަށް ރާއްޖެއިން ފުރައިގެން ދިއުމަށް ވެސް ފުރުސަތު ލިބިގެންދާނެކަމަށެވެ.
އެމައްސަލައިގައި ޕީޖީ އާއި އޭސީސީއާ ވާހަކަ ދެއްކުމުންވެސް ތަހުގީގު ފުރިހަމަ ނުވަނިސް ނަންތައް ހާމަކުރުމުން ހެކި ލިބުމުމަށާއި ތަހުގީގު ކުރިއަށް ގެންދިއުމުގައި ހުރަސް އެޅޭކަން ފާހަގަ ކުރައްވައިފައިވާ ކަމަށް ވިދާޅުވިއެވެ. ރޮޒައިނާ ވިދާޅުވީ މިހާރުވެސް އެތައް ބަޔަކަށް ދައުވާ ކުރުމަށް ފޮނުވަމުންދާ ކަމަށެވެ. އެހެންކަންކަން ނަގައިގެން އަޑުއުފުލަމުން ދިއުމުން، އެކަންކަމަށް ދޭން ޖެހޭ ސަމާލުކަން ރައްޔިތުންނަށް ވެސް ދެވިފައިނުވާކަން ގަބޫލުކުރެވޭ ކަމަށެވެ. ނަމަވެސް އެކި އެކި ބޭފުޅުންގެ ކޮރަޕްޝަންގެ މައްސަލަތައް ދައުވާކުރަން ފޮނުވަމުންދާތަން ފެންނަމުންދާކަމަށް ވިދާޅުވިއެވެ. އެގޮތުން ކުރީގެ އިސްލާމިކް މިނިސްޓަރާއި ކުރީގެ ފިނޭންސް މިނިސްޓަރުންނާއި ނާއިބް ރައީސްގެ މައްސަލަތައް ފާހަގަ ކުރެއްވިއެވެ. އަދި އެގޮތަށް އަޑު އުފުލަމުން ދަނީ ކޮވިޑްގެ ދުވަސްވަރު ވެސް ރައްޔިތުންނަށް ޚިދުމަތް ދިނުމާއި ތަރައްގީގެ ކަންކަން ހުއްޓުމެއްނެތި މިސަރުކާރުން ކުރަމުން ގެންދާތީ ކަމަށްވެސް މެމްބަރު ރޮޒައިނާ ފާހަގަކުރެއްވިއެވެ.
"އެކި ބޭފުޅުންގެ މައްސަލަތައް ދައުވާކުރުމަށް ފޮނުވަމުންދާތަން އަޅުގަނޑުމެންނަށް އެބަފެނޭ، އެހެންނަމަވެސް އެވާހަކަތައް ދެކެވުނަ ނުދޭންވެގެން، އެކަންކަން އޮއްބާލަންވެގެންނޭ އަޅުގަނޑަށް ގަބޫލުކުރެވެނީ އެހެން ވާހަކަތަކެއް ކުރިއަށް ލައިގެން މާބާރަކަށް މާގައުމީ ބަޔަކަށް ވެގެން، މިއުޅެނީ" ރޮޒައިނާ ވިދާޅުވިއެވެ.
ރޮޒައިނާ ރޭ ވިދާޅުވީ އެމްއެމްޕީއާރުސީގެ ފައިސާ އޭނާއަށް ލިބިފައި ނުވާކަމަށެވެ. ކުރީގެ ނާއިބް ރައީސް އަދީބަކީ އެއްވެސް އިރެއްގައި އޭނާއާ މާބޮޑު ގުޅުމެއް އޮތް ބޭފުޅެއް ނޫންކަމަށެވެ.
