އޭޕްރީލް މަހުގެ 2 އިން އޯގަސްޓް 20 އާ ދޭތެރޭގައި ދުބާއީން ރާއްޖެއަށް އެތެރެވެފައިވާ ފައިސާގެ ތަފްޞީލް މާލިއްޔަތު ކޮމެޓީން ހޯއްދަވަން ނިންމަވައިފިއެވެ.
މާލިއްޔަތު ކޮމެޓީގެ އެންމެ ފަހު ބައްދަލުވުމުގައި މިގޮތަށް ހުށަހެޅުއްވީ ހަނިމާދޫ ދާއިރާގެ މެމްބަރ ޢަބްދުލްޣަފޫރު މޫސާއެވެ. އޭނާ ހުށަހެޅުއްވީ އެމުއްދަތުގައި ދުބާއީން ރާއްޖެއަށް އެތެރެވެފައިވާ 50 ހާސް ޑޮލަރަށްވުރެ މަތީގެ ޢަދަދުތަކުގެ ފައިސާގެ ތަފްޞީލް ފިނޭންސް މިނިސްޓްރީ މެދުވެރިކޮށް އެމްއެމްއޭއިން ހޯއްދެވުމަށެވެ. ނަމަވެސް އެވަގުތު ކޮމެޓީއަށް ޙާޒުރުވެވަޑައިގެން އިންނެވި ފިނޭންސް މިނިސްޓަރ އިބްރާހީމް އަމީރު ވިދާޅުވީ ސިދާ މާލިއްޔަތު ކޮމެޓީން ވެސް އެމަޢުލޫމާތު އެމްއެމްއޭ އިން ހޯއްދެވޭނެކަމަށެވެ. އެހެންކަމުން އެ މަޢުލޫމާތު އެމްއެމްއޭއިން ހޯއްދެވުމަށް ކޮމެޓީގެ ބައްދަލުވުމުގެ ރިޔާސަތު ބެލެހެއްޓެވި ނާއިބް މުޤައްރަރު ތިމަރަފުށީ ދާއިރާގެ މެމްބަރު ޢަބްދުﷲ ރިޔާޒު ނިންމެވިއެވެ.
ކޮވިޑާ ގުޅިގެން ކުރި ޚަރަދު ތަކުގެ ތެރޭގައި ދުބާއީ ކުންފުންޏެއްކަމަށް އެގެޒިކިއުޓަރސް އިން ވެންޓިލޭޓަރުތައް ހޯދުމުގައި ބޮޑެތި އޮޅުންވާލުންތައް ހުރިކަން ހެލްތް މިނިސްޓްރީގެ އޮޑިޓް ރިޕޯރޓުން ވަނީ ފާހަގަ ކުރެވިފައެވެ. އެމައްސަލަ މިހާރު ދަނީ އޭސީސީއާއި ފުލުހުން ގުޅިގެން ތަޙްޤީޤު ކުރަމުންނެވެ. އެޑްވާންސްގެ ގޮތުގައި އެއްބަސްވުމުގެ ޖުމްލަ އަގުގެ 90 އިންސައްތައަށްވާ 30.9 މިލިއަން ރުފިޔާ އެގްޒެކިއުޓަރސް ދެ ފަހަރެއްގެ މަތިން ދޫކޮށްފައިވާއިރު އެޑްވާންސް ޕޭމަންޓް ގެރެންޓީއެއް ހޯދައިފައެއް ނުވެއެވެ. އެކުންފުނީ މާލީ އަނދި ފަންނީ ޤާބިލްކަން ވެސް ބަލައިފައި ނުވާކަން ވަނީ ފާހަގަ ކޮށްފައެވެ.
ހެލްތްމިސްޓްރީގެ އޮޑިޓް ރިޕޯރޓާ ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމެޓީންވެސް ދަނިއެމައްސަލަ ބަލަމުންނެވެ. އެގޮތުން އިއްޔެ ބޭއްވި ބައްދަލު ވުމަކީ އެރިޕޯރޓާ ގުޅިގެން ފިނޭންމިސްޓްރީން މަޢުލޫމާތު ހޯދުމަށް ބޭއްވި ބައްދަލުވުމެވެ. ކުރިން ވަނީ ހެލްތް މިނިސްޓަރާއި އެމިނިސްޓްރީގެ ބިޑް ކޮމެޓީގެ ޗެއަރއާއި މެމްބަރުންނާއި ފައިނޭންޝަލް އެގެޒެކެޓިވްވެސް މާލިއްޔަތު ކޮމެޓީއަށް ހާޒިރުކޮށް ޖަވާބުދާރީ ކުރުވައިފައެވެ. އަދި އޮޑިޓިންނާ ބެހޭގޮތުން އޮޑިޓަރ ޖެނެރަލްގެ ފަރާތްޕުޅުން ވެސް ވަނީ ކޮމެޓީއަށް މަޢުލޫމާތު ހޯއްދަވައިފައެވެ.
