ކެންޔާއިން ސޯމާލިޔާއަށް ގެންދިޔަ ކޮވިޑް- 19 ގެ އެހީގެ ތަކެއްޗާއެކު ފާއިތުވި ހަފުތާގައި ދަތުރުކުރި މަތިންދާބޯޓު ވައްޓާލީ އިތިޔޯޕިޔާގެ ސިފައިން ކަމަށް އެގައުމުން އެއްބަސްވެއްޖެއެެވެ. މިިކަން ހާމަކޮށްފައި ވަނީ އެގައުމުން އެފްރިކަން ޔުނިއަން (އޭޔޫ) އަަށް ފޮނުވި ބަޔާނެއްގައެވެ.
ކެންޔާގެ އެފްރިކަން (އެކްސްޕްރެސް) އެއާވޭޒްގެ މަތިންދާބޯޓު ސޯމާލިޔާގެ ބަރްދާލް އެއާޕޯޓަށް ޖައްސަން ދަނިކޮށް އެބޯޓު ވައްޓާލާފައި ވަނީ އެރަށުގައި ހަރަކާތްތެރިވާ އިތިއޯޕިޔާ ސިފައިންނެވެ. މި ހާދިސާގައި އެ ބޯޓުގައި ތިބި 6 މީހުން މަރުވެފައިވާއިރު، އެމީހުންގެ ތެރޭގައި ގިނައީ ކެންޔާގެ މީހުންނެވެ.
އަލްގާއިދާއާ ގުޅިގެން ސޯމާލިޔާގައި ހަރަކާތްތެރިވާ އައްޝަބާބު ހަނގުރާމަވެރި ޖަމާއަތުގެ ހަރަކާތްތައް ހުއްޓުވުމަށް ސޯމާލިޔާގެ ބަރްދާލްގައި އޭޔޫގެ ސުލްހަބަލަަަހައްޓާ ސިފައިންގެ ގޮތުގައި ސޯމާލިޔާގެ ސިފައިންގެ އިތުރަށް އިތިއޯޕިޔާއާއި ކެންޔާގެ ސިފައިން ހަރަކާތްތެރި ވެއެވެ.
އިތިއޯޕިޔާގެ ބަޔާނުގައި ވާގޮތުގައި، ބަލްދާލްގައި ތިބި އިތިއޯޕިޔާ ސިފައިންނަށް އެ މަތިންދާބޯޓު އަންނަ ކަމުގެ އެއްވެސް މައުލޫމާތެއް ލިބިފައި ނުވެއެވެ. އެހެންކަމުން، އެމީހުންނަށް ވިސްނުނީ އެއީ 'ޖާނުން ފިދާވުމުގެ' ހަމަލާއެެއް ދޭން އަންނަ މަތިންދާބޯޓެއް ކަމުގައެވެ. އެހެންވެ، އަމިއްލަ ނަފުސުގެ ދިފާއުގައި އަޅާ ފިޔަވަޅެއްގެ ގޮތުގައި މަތިންދާބޯޓު ވައްޓާލީއެވެ.
"މަތިންދާބޯޓު ވައްޓާލެވުނީ ގުޅުންކުޑަވުމާއި، ހޭލުންތެރިކަން ކުޑަވުމުގެ ސަބަބުން." އިތިއޯޕިޔާގެ ބަޔާނުގައި ވެއެވެ. "މި ހާދިސާ ތަހުގީއާ ގުޅިގެން ހަގީގަތް ހޯދުމަށް ސޯމާލިޔާ، އިތިއޯޕިޔާ އަދި ކެންޔާގެ ގުޅިފައިވާ ތަހުގީގީ ޓީމަކުން ގުޅިގެން ތަހުގީގެއް ހިންގަން ޖެހޭ."
ކެންޔާއާއި އިތިއޯޕިޔާގެ ދެމެދު ގުޅުން ކުރީއްސުރެވެސް ކިލަނބުވެފައި ވާއިރު، މި ހާދިސާގެ ސަަބަބުން ދެ ގައުމުގެ ގުޅުން ވަނީ އިތުރަށް ގޯސްވެފައެވެ. ދެ އަވަށްޓެރިންނަށް ވާއިރު، އެ ގައުމުގެ ދާޚިލީ ކަންކަމާ އިތިއޯޕިޔާއިން ބެހޭކަމަށް ކެންޔާއިން އަބަދުވެސް ތުހުމަތުކުރެއެވެ.
5ވައި-އޭއެކްސްއޯ މަރުކާގެ މަތިންދާބޯޓުން ދަތުރުކުރި މީހުންގެ ތެރޭގައި ހިމެނެނީ ކެންޔާގެ ތިން މީހުންނާއި، ސޯމާލިޔާގެ ދެމީހުންނާއި އެހެން ގައުމެއްގެ މީހެކެެވެ.
