ސޯމާލިޔާގައި ނޮވެލް ކޮރޯނާ ވައިރަސްއިން ޖެހޭ ކޮވިޑް- 19 އާއި ދެކޮޅަށް މަސައްކަތްކުރުމަށް ބޭނުންވާ ތަކެތި އުފުލި ކާގޯ މަތިންދާބޯޓެއް ވެއްޓި އެއިން ދަތުރުކުރި 6 މީހުން މަރުވެއްޖެއެވެ.
ޓްރާންސްޕޯޓް މިނިސްޓަރު މިކަން ހާމަކުރެއްވި އިރު، މަތިންދާބޯޓު ވެއްޓުނު ސަބަބާ ބެހޭ ގޮތުން އެއްޗެއް ވިދާޅުވާން އޭނާ ވަނީ ދެކޮޅު ހައްދަވާފައެވެ. އެހެންނަމެވެސް ޚަބަރު ފަތުރާ ބޭރުގެ އެޖެންސީއަކާ ވާހަކަދައްކަވަމުން، އެއާޕޯޓު ކައިރިން އެ ބޯޓު ވެއްޓުނު މަންޒަރު ދުށް މީހުންނާ ހަވާލާދެއްވައި، ކުރީގެ ޑިފެންސް މިނިސްޓަރު ވިދާޅުވި ގޮތުގައި ބޯޓު ވެއްޓުނީ ބަޔަކު އެއަށް ހަމަލާދިނުމުގެ ސަބަބުންނެވެ.
ޓްރާންސްޕޯޓް މިނިސްޓަރު މުޙައްމަދު ޞަލާދު ވިދާޅުވިގޮތުގައި ވެއްޓުނު މަތިންދާބޯޓުން ދަތުރުކުރީ އޭގެ ޕައިލެޓާއި، ކޯޕައިލެޓާއި، ފްލައިޓް އިންޖިއަނަރާއި، ޓްރޭނީ ޕައިލެޓަކާއި، އެއާލައިނުގެ އިތުރު ދެ މުވައްޒަފުންނެވެ. އޭނާ ވިދާޅުވީ މިހާތަނަށް 5 މީހުންގެ ހަށިގަނޑު ފެނިފައިވާ ކަމުގައެވެ.
ސޯމާލިޔާގެ ރަސްމީ ނިއުސް އެޖެންސީ، ސޯމާލީ ނޭޝަނަލް ނިއުސް އެޖެންސީން ބުނި ގޮތުގައި، ކޮރޯނާ ވައިރަސް އާ ދެކޮޅަށް ކުރާ މަސައްކަތުގައި ބޭނުންކުރާ ސާމާނާއިގެން ދަތުރުކުރީ އެފްރިކަން އެކްސްޕްރެސް އެއާވޭޒްގެ މަތިންދާބޯޓެކެވެ.
"އެފްރިކަން (އެކްޕްރެސް) އެއާވޭޒް ގެ މަތިންދާބޯޓެއް މޮގަދިޝޫއިން ފުރައިގެން ބައިދޯއާއަށް ދަތުރުކޮށް، އެތަނުން ފުރައިގެން ދަތުރުކުރީ ބާރްދާލް އަވަށަށް. އެތަނަށް އެ މަތިންދާބޯޓުވެއްޓުނީ. ވެއްޓުނީ ކީއްވެގެން ކަމެއް ނޭނގޭ." ނިއުސް އެޖެންސީން ބުނެފައި ވެއެވެ.
ސޯމާލިޔާ ނޫސްވެރިންގެ ޖަމްއިއްޔާގެ ސެކްރެޓަރީ ޖެނެރަލް ޢަބްދުﷲ އަޙްމަދު މޫމިން ކުރެއްވި ޓުވީޓެއްގައި ވިދާޅުވި ގޮތުގައި ކެންޔާ އެއާލައިނެއްގެ އެ މަތިންދާބޯޓު ވެއްޓިފައި ވަނީ އެއަށް ރޮކެޓް ހަމަލާއެއް އަރައިގެންނެވެ.
އަލްޤާއިދާއަށް ނިސްބަތްވާ އައްޝަބާބު ޖަމާއަތް ދަނީ ސޯމާލިޔާގެ ސަރުކާރާ ދެކޮޅަށް ހަނގުރާމަކުރަމުންނެވެ. އެހެންނަމަވެސް، އެ ޖަމާއަތުން މި މަތިންދާބޯޓު ވެއްޓުމާމެދު އަދި އެއްވެސް އެއްޗެއް ބުނެފައި ނުވެއެވެ.
