އަގުބޮޑު ޓައި
މީހަކު ފިހާރައަކަށް ވަދެފައި ސޭޓާ ސުވާލު ކޮށްލިއެވެ.
"މި ޓައި ވިއްކަނީ ކިހައި ވަރަކަށް-؟"
ސޭޓު ބުންޏެވެ.
"ހަތަރު ސަތޭކަ ރުފިޔާ އަށް-"
އެ މީހާ ޙައިރާން ވެފައި ބުނެލިއެވެ.
"އަސްތާ، ހާދަހާ އަގު ބޮޑު ޓައިއެކޭ-! ހަތަރު ސަތޭކަ ރުފިޔާ އަށް ވުރެ އަގު ހެޔޮކޮށް އެންމެ މޮޅު ބޫޓެއްވެސް ގަންނަން ލިބޭނެ-!"
ސޭޓު ބުނެލިއެވެ.
"އާދެ- ތިޔަ ވިދާޅުވީ ތެދުފުޅެއް- އެހެންވީމާ ބޫޓެއް ބައްލަވައިގެންފައި އޮފީހަށް ވަޑައިގަންނަވާ އިރު ކަރުފުޅުގައި އަޅުއްވާ-!"
ދަޢުވާ
ވަކީލު: އެންމެ ރަނގަޅު- އަހަރެން ކަލޭގެ ވަކީލެއްގެ ގޮތުގައި ކޯޓަށް ހިނގައިދާނަން- އެކަމަކު އަހަރެންގެ ފީ ބަރާބަރަށް ދޭންވާނެ-
މުވައްކިލު: މައްސަލައެއް ނެތް- އެކަމަކު އަޅުގަނޑުގެ އަތަކު ފައިސާއެއް ނެތް- އަޅުގަނޑުގެ އަތުގައި ވަރަށް އާ މޮޓަރު ސައިކަލެއް އެބަހުރި- އެންމެ ރަނގަޅުތޯ-؟
ވަކީލު: ރަނގަޅު ވާނެ- އެކަމަކު ޝަރީޢަތް ފެށުމުގެ ކުރިން ސައިކަލު ދޭން ވާނެ-
މުވައްކިލު: މައްސަލައެއް ނެތް- ހަމަ މިހާރުވެސް ސައިކަލު ދީފާނަން-
ވަކީލު: އެންމެ ރަނގަޅު- ދެން ބުނޭ- ކަލޭގެ މައްޗަށް އުފުލިފައިވާ ދަޢުވާ އަކީ ކޮބާ-؟
މުވައްކިލު: ސައިކަލެއް ވަގަށް ނެގި މައްސަލަ-
މަސްތުވާތަކެތީގެ ގެއްލުން
މަސްތުވާ ތަކެތީގެ ގެއްލުމާ މެދު ވާހަކަ ދައްކައި މަޝްވަރާ ކޮށް ޢާއްމުންނަށް މަޢުލޫމާތު ދިނުމުގެ ގޮތުން ބޭއްވި ބައްދަލު ވުމެކެވެ. މި ބައްދަލުވުމުގައި ކަމާ ބެހޭ މާހިރަކު ޢާއްމުން ހޭލުންތެރި ކުރުވުމުގެ ގޮތުން ވާހަކަފުޅު ދައްކަވަނީއެވެ.
"ތިޔަބޭފުޅުންނަށް އެނގިވަޑައިގަނޭތޯ-؟ މަސްތުވާ ތަކެތީގެ ސަބަބުން އަޅުގަނޑުމެންގެ ހަށިގަނޑުގެ ހުރިހައި ގުނަވަނަކަށް ގެއްލުން ލިބޭ ހަމައެކަނި އެތެރެހަށްޓަށް ގެއްލުން ވަނީއެއް ނޫން- ލޮލުގެ ފެނުމަށްވެސް ބަދަލު އާދޭ- އަޅުގަނޑު މިސާލެއް ދައްކަފާނަން- އެ ދިމާ ދުރުގައި އެ އޮތް ހަތަރު ކާރަށް ނިކަން ބައްލަވާލަ ބައްލަވާ- މަސްތުވާ އެއްޗެއްގެ ބޭނުން ކޮށްގެން ހުރި މީހަކަށް އެ ހަތަރު ކާރުވެސް ފެންނާނީ ދެ ގުނަ ގިނައިން-"
މި ހިސާބަށް ވާހަކަފުޅު ދިޔަ ތަނާ އަޑު އަހަން ތިބި މީހުންގެ ތެރެއިން މީހަކު ވަރަށް ބާރަށް ގޮވައިލިއެވެ.
"ސާހިބާ- އެ ތާނގައި އޮތީ ހަތަރު ކާރެއް ނޫން- ދެ ކާރު-!"
