ދައުލަތުގެ ބެލުމުގެ ދަށުގައި ހުރި ކުޑަކުދީންގެ މަރުކަޒުތަކުގައި ދިރިއުޅޭ ކުދިންނަށް ލަކްސް ސައުތު އަރި އެޓޯލްގެ ފަރާތުން ބޮޑު ހަދިޔާއެއް މިއަދު ދީފިއެވެ. އެ ކުދިންނަށް ދިން ހަދިޔާއަކީ ސާދަ ހާސް އެމެރިކާ ޑޮލަރު ނުވަތަ ދެލައްކަ ފަނަރަ ހާސް އަށްސަތޭކަ އަށްޑިހަ ރުފިޔާއެވެ.
ފައިސާގެ މި ހަދިޔާ ހަވާލު ކުރުމުގެ ރަސްމިއްޔާތު މިއަދު ބާއްވާފައިވަނީ ލަކްސް ސައުތު އަރި އެޓޯލްގައެވެ. އެ ރިސޯޓުގެ ފަރާތުން އެހީ ޙަވާލުކޮށްދެއްވީ ޖެނެރަލް މެނޭޖަރ ޖޮނަސް އަމްސްޓަޑްއެވެ. މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ފަރާތުން އެހީއާ ޙަވާލުވެވަޑައިގެންނެވީ މިނިސްޓަރ ޝިދާތާ ޝަރީފު ކަމަށް މިނިސްޓްރީން ވިދާޅުވިއެވެ.
ފައިސާގެ މި ހަދިޔާ ދީފައިވަނީ ދެ މަރުކަޒަކަށެވެ. އެއީ ކުޑަކުދިންގެ ހިޔާއަށް ހަތް ހާސް ޑޮލަރާއި،ފިޔަވައްޗަށް ހަތް ހާސް ޑޮލަރު ކަމަށް ޖެންޑަރ މިނިސްޓްރީން ވިދާޅުވިއެވެ.
މިނިސްޓަރ ޝިދާތާ ވިދާޅުވީ އެފައިސާ ބޭނުން ކުރައްވާނީ ދައުލަތުގެ ބެލުމުގެ ދަށުގައިވާ މަރުކަޒުތަކުގައި ދިރިއުޅޭ ކުދިންނަށް އަމާން، ރައްކާތެރި އަދި ދިރިއުޅުމަށް ފަސޭހަ މާޙައުލެއް ގާއިމުކޮށް ދެއްވަން ކަމަށެވެ. އަމިއްލަ ފަރާތްތަކުގެ އިސްނެންގެވުމުގެ މަތިން ދެއްވާ މި ފަދަ އެހީތަކުގެ ސަބަބުން އެ ކުދިންގެ ދިރިއުޅުމަށް ހެޔޮ ބަދަލުތަކެއް ގެނެވޭ ކަމަށް މިނިސްޓަރ ޝިދާތާ ވިދާޅުވިއެވެ.
ދައުލަތުގެ ބެލުމުގެ ދަށުގައި މި ވަގުތު ޖުމުލަ 155 ކުދިން ދިރިއުޅެމުންދެއެވެ. އެ ކުދިންގެ ތެރެއިން 13 އަހަރުން ދަށުގެ 107 ކުދިން ދިރިއުޅެމުންދަނީ ފިޔަވަތީ ގައެވެ. އަދި 13 އަހަރުން މަތީގެ 48 ކުދިން ދިރިއުޅެމުންދަނީ ކުޑަކުދިންގެ ހިޔާގައި ކަމަށް ޖެންޑާ މިނިސްޓްރީން ވިދާޅުވިއެވެ.
