މާލެ އަތޮޅު މާފުށިން 25 ހެކްޓަރުގެ ބިން ހިއްކުމުގެ މަސައްކަތް މިއަދު އިފްތިތާހު ކޮށްފިއެވެ. އެރަށުގައި ބޭއްވި ރަސްމިއްޔާތެއްގައި މިމަސައްކަތް ފަށްޓަވައި ދެއްވީ ރައީސް އިބްރާހީމް މުޙައްމަދު ޞާލިޙުގެ އެޑުވައިޒަރު މުޙައްމަދު ޝިހާބެވެ.
މާފުށީ ބިން ހިއްކުމުގެ މަސައްކަތް ޙަވާލުކޮށްފައިވަނީ އެމްޓީސީސީއާއެވެ. މި ރަސްމިއްޔާތުގައި އެމްޓީސީސީގެ ސީއީއޯ ޙަސަން ޝަހުއާއި ޕްލޭނިން މިނިސްޓަރ މުޙައްމަދު އަސްލަމް ބައިވެރިވެ ވަޑައިގެންނެވެ. މާފުށިން ބިންހިއްކުމުގެ މަސައްކަތް އެމްޓީސީސީއާ ޙަވާލުކޮށްފައިވަނީ 255 ދުވަހުން ނިންމާ ގޮތަށް 99,981,373.00 ރުފިޔާއަށެވެ.
އެމަސައްކަތް ނިންމަން 255 ދުވަސް ދީފައި އޮތަސް މިއަދުގެ ރަސްމިއްޔާތުގައި ޙަސަން ޝާހު ވިދާޅުވީ އެ މަސައްކަތް 75 ދުވަސް ތެރޭ ނިންމާލެވޭނެ ކަމަށެވެ. އެރަށުގެ ބިން ހިއްކަން ބޭނުންކުރަނީ އެމްޓީސީސީގެ މަހާޖައްރާފެވެ. އެރަށުން 25 ހެކްޓަރުގެ ބިން ހިއްކައި 1110 މީޓަރުގެ ރިވެޓުމެންޓެއް ޖެހުމަށްވެސް ވަނީ ހަމަޖެހިފައެވެ.
ޕްލޭނިން މިނިސްޓްރީން ވިދާޅުވީ އެރަށަށް ދިމާވެފައިވާ ގޯތިގެދޮރުގެ ދަތިކަމާއި، ތޮއްޖެހުމާއި، ގޮނޑުދޮށް ސަރަޙައްދުގެ ކުޑަވުމުގެ މައްސަލައަށް މި މަޝްރޫއުގެ ސަބަބުން ލުއިތަކެއް ލިބިގެންދާނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން މާފުށީ ކައުންސިލްގެ ރައީސް، އުސްމާން ރަޝީދު ވިދާޅުވީ މިއީ މާފުށީގެ ރައްޔިތުން ވަރަށް ގިނަ ދުވަސްތަކެއް ވަންދެން އުންމީދު ކުރި ދުވަހެއް ކަމަށެވެ. އޭނާ ވިދާޅުވީ މިއީ ރައީސް އިބްރާހީމް މުޙައްމަދު ޞާލިހުގެ ވަޢުދުފުޅެއް ކަމަށެވެ. މާފުށީ ރައްޔިތުންނަށް އެކަންކޮށްދެއްވައި މާފުށީ ރައްޔިތުންގެ އިތުބާރު ސަރުކާރުން ހޯއްދަވައިފިކަމަށް އުސްމާން ވިދާޅުވިއެވެ.
