ދޫނިދޫ ޖަލުގައި ތިބި ގައިދީންތަކެއް ބަނޑުހައިހޫނު ކަމުގެ ހަޅުތާލެއް ފަށައިފިއެވެ. އެމީހުން އެ ހަޅުތާލު ފަށައިފައިވަނީ އިއްޔެއެވެ.
ފުލުހުން ވިދާޅުވީ އެމީހުން ކެއުމަށް އިންކާރުކޮށް ކެއުމާ ދުރުވެފައިވަނީ މޯލްޑިވްސް ކަރެކްޝަނަލް ސާވިސް (އެމްސީއެސް) އާ ޙަވާލު ނުކޮށްގެން ކަމަށެވެ.
ފުލުހުން ވިދާޅުވީ އެމްސީއެސްއާ ޙަވާލުކުރަންޖެހޭ 58 ގައިދީއަކު ދޫނިދޫގައި އެބަތިބި ކަމަށެވެ. އިއްޔެއިން ފެށިގެން ކެއުމަށް އިންކާރުކުރީ އޭގެ ތެރެއިން 8 މީހުން ކަމަށާއި އެމީހުން ކާން އިންކާރު ކުރީ 2 ނަމްބަރު ޖަލުގައި ތިބެގެން ކަމަށެވެ.
ކެއުމަށް އިންކާރުކުރި 8 މީހުންގެ ތެރެއިން 7 މީހަކު މިއަދު ހެނދުނުން ފެށިގެން ވަނީ ކާންފަށާފައި ކަމަށް ފުލުހުން ވިދާޅުވިއެވެ. އެހެންނަމަވެސް ދެންހުރި މީހާއާ ބެހޭ ޙަލަތާބެހޭ ގޮތުން ފުލުހުން އެއްޗެއް ވިދާޅެއް ނުވެއެވެ.
މޯލްޑިވްސް ކަރެކްޝަނަލް ސާވިސަސްއާ ހަވާލު ކުރަންޖެހޭ 58 ގައިދީންގެ ތެރެއިން 50 މީހުންނަކީ ހުކުމް ތަންފީޒު ކުރުމަށްޓަކައި ހަވާލު ކުރަންޖެހޭ މީހުން ކަމަށާއި އަނެއް 8 މީހުންނަކީ ރިމާންޑު ޖަލާ ހަވާލު ކުރަންޖެހޭ މީހުން ކަމަށް ފުލުހުން ވިދާޅުވިއެވެ. "ނަމަވެސް އެމްސީއެސް ގެ ޖަލުތައް ފުރި ޖާގަ ނެތިގެން އެމްސީއެސް އިން އެމީހުންނާ ހަވާލުވުމަށް އުޒުރުވެރިވާތީ ދޫނިދޫގައި ތިބީ. ދޫނިދޫގައި އެކަހެރި ޖަލެއް ނުހުރޭ،" ފުލުހުން ވިދާޅުވިއެވެ.
މަޢުލޫމާތު ލިބިފައިވާ ގޮތުގައި ގައިދީން ހަޅުތާލު ކުރީ އެމީހުންނަށް ލިބެޖެހޭ ހައްގުތައް ގެއްލިފައިވާތީ ކަމަށް ބުނެއެވެ.
