ހަރުކަށި ފިކުރަކީ ދަންނަ އެއްޗެއް ނޫންކަމަށް އައްޝައިޚް މުޙައްމަދު ޙަސަން ވިދާޅުވެއްޖެއެވެ.
މުޙައްމަދު ޙަސަނަކީ ދީނީ ނަސޭހަތް ދިނުމަށް ސަރުކާރުން އޭނާއަށް ދީފައިވާ ހުއްދަ ބާތިލް ކޮށްފައިވާ ޝައިޚެކެވެ. އޭނާގެ އިތުރުން އެހެން ދެ ޝައިޚަކަށް ދީފައިވާ ހުއްދަވެސް ވަނީ ބާތިލް ކުރައްވައިފައެވެ. އެބޭފުޅުންނަށް ދެއްވާފައިވާ ހުއްދަ ބާތިލް ކުރެއްވީ ހަރުކަށި ފިކުރު ފަތުރަން މަސައްކަތް ކުރައްވާ ކަމުގެ ތުހުމަތުގައެވެ.
މަކުތަބާ ސަލަފިއްޔާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އޭނާ ވިދާޅުވީ ދީނީ ނަސޭހަތް ދިނުމަށް އޭނާއަށް ދީފައިވާ ހުއްދަ ސަރުކާރުން ބާތިލްކޮށްފައިވަނީ ދީނީ ހަރުކަށި ފިކުރު ފަތުރާކަމުގެ ތުހުމަތުގައި ކަމަށް ވިޔަސް އެއީ ޙަގީގަތެއް ނޫންކަމަށެވެ. އެފަދަ ނުބައިކަންކަމުން ދުރެވެގެން ވާކަމަށް އޭނާ ވިދާޅުވިއެވެ.
މުޙައްމަދު ޙަސަން ވިދާޅުވީ ދީނީ ނަސޭހަތް ދިނުމަށް އޭނާއަށް ދެއްވާފައިއޮތް ހުއްދަ އަލުން ހޯދުމުގެ މަސައްކަތް އޮންނަ އުސޫލުގެ މަތިން ކުރައްވާނެ ކަމަށެވެ. "އަޅުގަނޑާއި އަޅުގަނޑާއެކު އުޅޭ އެއްވެސް މީހަކީ ހަރުކަށި ފިކުރަށް ތާއިދުކުރާ އަދި އެއަށް ބާރުދީ ފަތުރަން އުޅޭބައެއްނޫން. އެއީ އަޅުގަނޑުމެން ދަންނަ ވެސް ކަމެއްނޫން،" އޭނާ ވިދާޅުވިއެވެ.
ރާއްޖޭގައި ހަރުކަށި ފިކުރުފަތުރައި އެކަމަށް ހިތްވަރުދެނީ ކޮންބައެއްތޯ ވިދާޅުވެ އޭނާ ވަނީ ބައެއް މީހުންކޮށްފައިވާ ޓުވީޓުތައް މީޑިއާއާ ހިއްސާކޮށްފައެވެ.
މުޙައްމަދު ޙަސަން ވިދާޅުވީ އޭނާއަކީ ވެކްސިން ޖެހުމާވެސް ދެކޮޅު މީހެއް ނޫންކަމަށެވެ. އޭނާގެ ތިން ދަރިންނަށް ވެސް ހުންނާނީ ވެކްސިން ޖަހައިފައި ކަމަށް ވިދާޅުވިއެވެ.
އޭނާ ވިދާޅުވީ ސީރިއާގައި ހިނގަމުންދަނީ ޝަރުޢީ ޖިހާދެއް ކަމަށް ބުނެ ޖިހާދުކުރުމުގެ ނަމުގައި އެތަނަށް ދިޔުމަށް ހިތްވަރުދޭ މީހުންވެސް ރާއްޖޭގައި އެބައުޅޭ ކަމަށެވެ. އެހެންނަމަވެސް އޭނާ ވިދާޅުވީ ގައުމުން ބޭރުގައި ހިނގާ ހަނގުރާމައެއްގައި ޖީހާދު ކުރުމުގެ ނަމުގައި ބައިވެރިވެވޭނީ ވަލިއްޔުލް އަމްރުގެ ހުއްދަ އޮވެގެން ކަމަށެވެ. ތިމާގެ ގައުމުން ބޭރުގައި ހިނދާ ދާޚިލީ ހަނގުރާމައެއްގައި ބައިވެރިވެ ހަނގުރާމަ ކުރުމަކީ ޖިހާދަކަށް ނުވާނެ ކަމަށް ވެސް އޭނާ ވިދާޅުވިއެވެ.
މުޙައްމަދު ޙަސަން ވިދާޅުވީ ވެރިޔާއަކީ މުސްލިމެއް ކަމަށްވާނަމަ އޭނާއަށް އަބަދުވެސް ކިޔަމަންވާން ޖެހޭނެ ކަމަށެވެ. އަދި ވެރިޔާއަކީ މުސްލިމެއް ކަމަށްވާނަ އޭނާއާ ދެކޮޅަށް ނުކުތުން ވެސް އެއީ އޮތްކަމެއް ނޫންކަމަށް ވިދާޅުވިއެވެ. ބަޣާވާތް ކުރުމާއި ހައްދުފަހަނަޅައި ދިޔުމާއި ޓެރަރިޒަމަކީ އިސްލާމްދީން އެއްގޮތަށް ވެސް ބާރުއަޅާ ކަންކަން ނޫން ކަމަށް ވިދާޅިވިއެވެ.
އޭނާއަކީ ހަރުކަށި ފިކުރަށް ތާއިދުކޮށް އެފިކުރު ފަތުރާ މީހެއް ކަމަށްބުނާނަމަ އެކަމުގެ ދަލީލު ދައްކަންޖެހޭނެ ކަމަށެވެ. "އެފަދަ ކަންކަމުން އަޅުގަނޑުމެން ވަނީ ބަރިއްޔަވެގެން،" އޭނާ ވިދާޅުވިއެވެ.
ދީނީ ނަސޭހަތް ދެއްވުމުގައި ދުވަހަކުވެސް އަމިއްލަ ވާހަކައެއް ނުވަތަ އަމިއްލަ ފިކުރެއް އިސްކުރައްވާފައި ނުވާނެކަމަށް ވެސް އޭނާ ވިދާޅުވިއެވެ. މުޅިން ވެސް ދައްކަވާފައިވާ އިސްލާމްދީނުގެ ބޮޑެތި ޢިލްމުވެރިންގެ ފޮތްތަކުން އެނގެންހުރި ވާހަކަތައް ކަމަށްވެސް ވިދާޅުވިއެވެ. މަދީނާއިން ކިޔަވައިގެން ރާއްޖެ އައިފަހުން އަދާ ހަމައަށް ވެސް އަމަލުކުރައްވަނީ ޔުނިވަރުސިޓީން ކިޔަވައިދެއްވި އެއްޗެއްގެ މައްޗަށް ކަމަށް ވެސް ވިދާޅުވިއެވެ.
ސީރިއާގައި ހިނގަމުންދަނީ ޝަރުޢީ ޖީހާދެއް ނޫންކަމަށާއި އެއީ އެފަދަ ޖިހާދެއް ކަމަށް ބުނެ އެހެން މީހުންގެ ބޮލުގައި އެކަންއެޅޭ ގޮތަށް އެއްވެސް ބަޔަކު ފަތުވާ ނުނެރުމަށް ވެސް އޭނާ އެދިވަޑައިގެންނެވިއެވެ.
