"ފަންހާމަހާއި ޕްލާސްޓިކު ކޮތަޅު"ގެ ނަމުގައި ނެޝަނަލް އާޓުގެލެރީގައި މިހާރު ކުރިއަށް ގެންދާ ކޮންޓެމްޕޮރަރީ އާރޓް އެގްޒިބިޝަނަށް ރައީސް އިބްރާހީމް މުޙައްމަދު ޞާލިޙު މިއަދު ޒިޔާރަތް ކުރައްވައިފިއެވެ. މިއީ ކުރެހުންތެރިޔާ އީގާން ބަދީއު ބާއްވާ މައުރަޒެކެވެ.
މިއީ ޑިސެމްބަރ 7 އިން 11 އަށް ކުރިއަށް ގެންދާ މައުރަޒެކެވެ. އެ މައުރަޒަށް ރައީސް ކުރެއްވި މި ޒިޔާރަތުގައި މައުރަޒުގައި ބަހައްޓާފައިވާ ކުރެހުންތައް ބައްލަވައިލެއްވިއެވެ.
މި މައުރަޒުގައި ފެންކުލައިން ކުރަހާފައިވާ 11 ކުރެހުމަކާއެކު ޖުމްލަ 30 ކޮންޓެމްޕޮރަރީ އާރޓް ޕީސް ދައްކާލާފައިވެއެވެ. ބައެއް އާރޓް ޕީސް ތައްޔާރުކުރުމުގައި ޕްލާސްޓިކް ވެސް ވަނީ ބޭނުންކޮށްފައެވެ.
މި މައުރަޒުގެ ތީމް ކަމަށްވާ "ފަންހާމަހާއި ޕްލާސްޓިކު ކޮތަޅު" އިން ދައްކުވައިދޭ ފަންހާ މަސް ރަމްޒުކޮށްދެނީ ޤުދުރަތީ ރީތިކަމާއި ކަނޑުފަޅުތަކުގެ ދިރުންތަކެވެ. އަދި ޕްލާސްޓިކް ކޮތަޅު ރަމްޒުކޮށްދެނީ ޕްލާސްޓިކްގެ ސަބަބުން ތިމާވެއްޓަށް ދިމާވެފައިވާ ގޮންޖެހުންތަކެވެ.
